Tíntɔ́n Xónusɔ́ɖóte
Xónusɔ́ɖóte
Wěma élɔ́ e è nɔ ylɔ́ ɖɔ “TÍNTƆ́N SÍN KANNUMƆGBÉNU” ɔ́, nǔ tají tají e jɛ dó togun Izlayɛ́li tɔn ɔ́ jí lɛ́ɛ ɖokpó sín tan wɛ è kpi d'é mɛ; lě e Izlayɛ́li ví lɛ́ɛ tɔ́n sín Ejípu tomɛ gbɔn ɔ́ sín tan wɛ.
Wěma élɔ́ ɔ́, akpá ɖaxó atɔn wɛ è mǎ ɖó:
Nǔ e ɖo akpá nukɔntɔn ɔ́ (1—13) mɛ lɛ́ɛ ɖíe: Jakɔ́bu ví lɛ́ɛ ɖo Ejípu; yě nyí kannumɔ ɖo fínɛ́ bó ji ya ɖésú. Mawu Mavɔmavɔ sɔ́ Mɔyízi bɔ é ná hwlɛ́n yě bó ná ɖe yě tɔ́n sín Ejípu.
Nǔ e ɖo akpá wegɔ́ ɔ́ (14—18) mɛ lɛ́ɛ ɖíe: togun Izlayɛ́li tɔn ɔ́ xwe Sinayíi só, só mímɛ́ Mawu tɔn ɔ́ kɔn. Nǔ énɛ́ hun xomɛ nú Ejípu xɔ́sú ɔ́ ǎ. Énɛ́ ɔ́, é sɛ́ ahwangɔnu tɔn dó bónú é ná yi wlí togun ɔ́. Lo ɔ́, Mawu bló nǔjíwǔ ɖé lɛ́ɛ bó hwlɛ́n togun tɔn gán. Togun ɔ́ ɖo yiyi wɛ, bɔ Mawu nɔ́ ná ɛ sin kpó nǔɖuɖu kpó.
Nǔ e ɖo wěma ɔ́ sín akpá atɔngɔ́ ɔ́ (19—40) mɛ lɛ́ɛ ɖíe: togun ɔ́ ɖo Sinayíi só ɔ́ kɔn. Mawu jɛ akɔ xá togun tɔn ɖo fínɛ́. É ɖe éɖée xlɛ́ Mɔyízi. É ná ɛ sɛ́n wǒ lɛ́ɛ kpódó sɛ́n ɖěvo ɖěvo lɛ́ɛ kpó. Mawu tín lě e è ɖǒ ná nɔ́ sɛn ɛ gbɔn ɔ́ mɛ. É ɖɔ bɔ è nǎ bló goxɔ ɖokpó n'i.
Togun ɔ́ ɖo Mawu lɔ mɛ; lo ɔ́, awakanmɛ yá wǔ kú i bɔ é bló nǔmɛsɛn é ɖésúnɔ tɔn. Mawu ká ɖɔ n'i ɖɔ:
“Nyɛ wɛ nyí Mawu Mavɔmavɔ, Mawu towe; nyɛ wɛ ɖe we tɔ́n sín Ejípu fí e a nyǐ kannumɔ ɖe é. Ma sɛn nǔ ɖěvo zɛ nyɛ wú ó.” (20.2-4)
Nǔ tají tají e ɖo wěma ɔ́ mɛ lɛ́ɛ
Togun Izlayɛ́li tɔn ɔ́ nyí kannumɔ (1)
È ji Mɔyízi bɔ é wá su (2)
Mɔyízi kpó Aalɔ́ɔn kpó ɖɔ xó nú Ejípu xɔ́sú ɔ́ (3—6)
Mawu sɛ́ awě wǒ dó (7—11)
È ɖu Dǐndínwáyixwe ɔ́ azɔn nukɔn nukɔntɔn (12—13)
Togun ɔ́ dín gbɔn Xu Vɔvɔ ɔ́ mɛ bó ɖidó Sinayíi só ɔ́ kɔn (14—18)
Mawu ná sɛ́n wǒ lɛ́ɛ (19—24)
Mawu ɖɔ bɔ è nǎ bló goxɔ ɖokpó n'i (25—27)
Vɔ̌sánú-xwlémawutɔ́ lɛ́ɛ sín azɔ̌, vɔ̌ lɛ́ɛ kpódó gbɔjɛzán ɔ́ kpó (28—31)
Togun ɔ́ bló nǔmɛsɛn ɖokpó (32)
Aklúnɔ lɛ́ vɔ́ akɔ jɛ xá Izlayɛ́li ví lɛ́ɛ (33—34)
Goxɔ ɔ́ sín azɔ̌ bɛ́ (35—39)
È sɔ́ goxɔ ɔ́ ɖó vo nú Mawu (40)
Currently Selected:
Tíntɔ́n Xónusɔ́ɖóte: FONDC
Highlight
Share
Copy
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.