Ɛsitɛ́ɛ Glɛ̌sigbe 9
9
1 [1] Mɛ bǐ ní mɔ wěma e axɔ́sú ɔ́ wlán bó sɛ́ dó é gbɔn to ɔ́ bǐ sésé mɛ, ɖo sunzán wěwegɔ́ ɔ́ abǐ Adáa sun ɔ́ sín azǎn wǎtɔngɔ́ ɔ́ gbe. 2 Gbe nɛ́ gbe ɖokpó ɔ́ jɛ́n è vǐvá kún nú kɛntɔ́ Jwifu lɛ́ɛ tɔn lɛ́ɛ bǐ; mɛɖé glá nɔ te ǎ, ɖó è ɖi xɛsi nú yě. 3 Afɔsɔ́ɖótetɔ́ axɔ́sú ɔ́ tɔn lɛ, tonukún lɛ́ɛ kpódó axɔ́súzɔ́watɔ́ lɛ́ɛ kpó nɔ́ hɛn Jwifu lɛ́ɛ kɛ́ɖɛ́ kɛ́ɖɛ́, ɖó yě ɖi xɛsi nú Maadocée. 4 Ɛɛn, wěma e axɔ́sú ɔ́ ɖe tɔ́n bɔ nyǐkɔ tɔn gbakpé axɔ́súɖuto ɔ́ bǐ sésé mɛ é zɔ́n bɔ 6 Jwifu lɛ́ɛ hu gbɛtɔ́ afɔwe kanwe ko (500) ɖo Suzi tomɛ. 7 Yě lɛ́ hu Faasanɛsitɛ́ɛn, Dɛlufɔ́ɔn, Fasigáa, 8 Faadata, Baléya, Saabaki, 9 Maamasimu, Alufayi, Aasayi kpódó Zabutayi kpán. 10 Yě lɛ́ hu kɛntɔ́ yětɔn ɖaxó Hamáa e è nɔ ylɔ́ ɖɔ Bagayosi, bɔ é nyí Hamadatɔ́si ví é sín vǐ wǒ. Énɛ́ gúdo ɔ́, yě bɛ̌ dɔkun yětɔn lɛ́ɛ bǐ. 11 Gbe énɛ́ gbe tlóló jɛ́n é yi ɖó mɛ nabí e yě hu ɖo Suzi é sín gbe nú axɔ́sú ɔ́. 12 Hwenɛ́nu ɔ́, axɔ́sú ɔ́ wá ɖɔ nú Ɛsitɛ́ɛ ɖɔ: “Jwifu lɛ́ɛ kó hu mɛ afɔwe kanwe ko (500) ɖo Suzi. Ɖo ayi towe mɛ ɔ́, nɛ̌ yě ká wa nǔ gbɔn ɖo to ɖě lɛ́ɛ mɛ tawun? A lɛ̌ byɔ́ mì nǔ ɖěbǔ ɔ́, un ná ná we.” 13 Ɛsitɛ́ɛ yí gbe nú axɔ́sú ɔ́ bó ɖɔ: “Kɛnklɛ́n un hɛn afɔ nú we; un ná gbe Jwifu e ɖo Suzi tomɛ lɛ́ɛ é, bónú lě e yě wa nǔ gbɔn éhɔ́nmɛ é ɔ́, yě ní lɛ́ bló gbɔn mɔ̌ sɔ. Énɛ́ ɔ́, yě ná mɔ tɛn bó ná blá Hamáa ví wǒ lɛ́ɛ sín cyɔ ɖó atín wú.” 14 É ná gbe ɖɔ nǔ ní cí gbɔn mɔ̌, bó ká wlán wěma ɖokpó bó tɛ́, bó dó ná gbe Jwifu e ɖo to ɔ́ mɛ lɛ́ɛ é ɖɔ yě ní blá Hamáa ví wǒ lɛ́ɛ sín cyɔ dó atín wú. 15 Jwifu e ɖo Suzi lɛ́ɛ wá xo yěɖée kplé ɖo azǎn wɛ̌nɛgɔ́ ɔ́ Adáa sun ɔ́ tɔn gbe. Yě hu gbɛtɔ́ afɔɖé kanwe ko (300); lo ɔ́, yě ká sɔ́ bɛ́ nǔ yětɔn lɛ́ɛ ɖěbǔ ǎ.
16 Jwifu e ɖo tokpɔn ɖě lɛ́ɛ mɛ ɖo axɔ́súɖuto ɔ́ mɛ lɛ́ɛ é wá sɛ yěɖée kplé, bó ná dó dó alɔ yěɖée. Yě hu gbɛtɔ́ děgba atɔn afɔwó-afatɔ́n (15.000) ɖo azǎn wǎtɔngɔ́ ɔ́ Adáa sín sunzán ɔ́ tɔn gbe, bó ná dó mɔ agbɔ̌n ɖo kɛntɔ́ lɛ́ɛ sí; yě ká hɛn nǔ ɖěbǔ gblé ɖo to ɔ́ mɛ ǎ. 17 Yě gbɔjɛ́ ɖo azǎn wɛ̌nɛgɔ́ ɔ́ sun ɖokpó énɛ́ ɔ́ tɔn gbe. Gbɔjɛzán énɛ́ ɔ́, yě ɖu ɖo awǎjijɛ kpó agbojlaka kpó ɖúɖú mɛ. 18 Jwifu e ɖo Suzi tomɛ, bɔ yě lɔmɔ̌ sɛ yěɖée kplé ɖo azǎn wɛ̌nɛgɔ́ ɔ́ sun ɔ́ tɔn gbe, ma yi gbɔjɛ́ lɛ́ɛ é ɔ́ lɔ sɔ́ azǎn afɔtɔngɔ́ ɔ́ dó ɖu xwe ná ɖo awǎjijɛ mɛ. 19 Énɛ́ wú wɛ Jwifu e gbɔn fí ɖé fí ɖé ɖo axɔ́súɖuto ɔ́ sín tokpɔn lɛ́ɛ mɛ lɛ́ɛ é nɔ́ nyi gbɔjɛzán ɔ́ ɖo Adáa sun ɔ́ sín azǎn wɛ̌nɛgɔ́ ɔ́ gbe. Yě nɔ́ ɖu xwe kpódó awǎjijɛ kpó; yě nɔ́ sɛ́ nǔ dó yěɖée. Mɛ e ka ɖo to ɖaxó ɖaxó lɛ́ɛ mɛ é nɔ́ nyi azǎn afɔtɔngɔ́ ɔ́ Adáa sun ɔ́ tɔn. Yě lɔ nɔ ɖu xwe énɛ́ ɔ́ kpódó awǎjijɛ kpó, lobo nɔ sɛ́ nǔ dó yěɖée.
Nǔbakpɔ́n ɖo Mawu mɛ sín xwe
20 Maadocée wlán nǔ énɛ́ lɛ́ɛ e jɛ lɛ́ɛ é bǐ dó wěma ɖokpó mɛ sɛ́ dó Jwifu e ɖo axɔ́sú Aatazɛɛzɛsi sín axɔ́súɖuto mɛ lɛ́ɛ é bǐ; ée ɖo xwé lɛ́ɛ kpó ée ɖo gle lɛ́ɛ bǐ kpó. 21 É byɔ́ yě ɖɔ yě ní nɔ kpɔ́ bó ɖu xwe ɖo Adáa sun ɔ́ sín azǎn wɛ̌nɛgɔ́ ɔ́ kpódó afɔtɔngɔ́ ɔ́ kpó gbe. 22 Azǎn énɛ́ lɛ́ɛ gbe wɛ Jwifu lɛ́ɛ mɔ agbɔ̌n ɖo kɛntɔ́ yětɔn lɛ́ɛ sí. Adáa sín sun ɖokpó énɛ́ ɔ́ mɛ wɛ ninɔmɛ yětɔn húzú. Yě gosín aluwɛ mɛ, bó byɔ́ awǎjijɛ mɛ, lobɔ alěnínázán wá húzú xwezán nú yě. Hǔn, sun énɛ́ ɔ́ bǐ wɛ nyí awǎjijɛ kpódó agbojlaka kpó ɖúɖú sín hwenu nú Jwifu lɛ́ɛ, lobɔ è ká ná sɛ́ nǔ dó xɔ́ntɔn mɛtɔn lɛ́ɛ kpódó wamamɔnɔ lɛ́ɛ kpó.
23 Jwifu lɛ́ɛ bǐ nɔ kpɔ́, bó yí gbe nú nǔ e Maadocée wlán sɛ́ dó yě lɛ́ɛ é; 24 [24] é ɖɔ lě e Masedwaninu, Hamáa e nyí Hamadatɔ́si ví é tɔ́n ahwan yě gbɔn, lě e é ɖe sɛ́n tɔ́n bó ná dó sú kún yětɔn dó gbɔn é sín xó, bɔ é wá yi ba nǔ kpɔ́n dó ta tɔn mɛ, bó ná mɔ tɛn dó ɖó kúzán yětɔn. 25 É hun káká yi axɔ́sú ɔ́ gɔ́n, bó byɔ́ ɖɔ è nǐ ká Maadocée nyi atín jí. Lo ɔ́, nǔ nyanya e é lin ná wa nú Jwifu lɛ́ɛ é ɔ́, é ɖésú jí wɛ bǐ lɛ́ wá flí jɛ. Éyɛ́ kpódó vǐ tɔn lɛ́ɛ kpó wɛ è wǎ ká nyi atín ɔ́ jí.
26 Nǔ e wú wɛ è ylɔ̌ azǎn énɛ́ lɛ́ɛ ɖɔ byɔ̌wá énɛ́: ɖó hɛn sín sɛ́ mɛ wú, ɖó é kpɔ́n alɔ e jí è wlǎn wěma énɛ́ ɔ́ dó é, bó mɔ ya e yě ji ɖó nǔ énɛ́ lɛ́ɛ bǐ tamɛ é, kpódó nǔ e gbo yě lɛ́ɛ é bǐ kpó. 27 Maadocée sɔ́ azǎn énɛ́ lɛ́ɛ húzú xwezán, lobɔ Jwifu lɛ́ɛ yí gbe nú azǎn énɛ́ lɛ́ɛ nú yě ɖésú, kúnkan yětɔn lɛ́ɛ, nú mɛ e ɖo yětɔn jí lɛ́ɛ bǐ. Yě dó akpá ɖɔ émídɛɛ lɛ́ɛ ná nɔ gbejí nú azǎn énɛ́ lɛ́ɛ, lobo ka ná nɔ́ ɖu xwe tɔn ganjí. 28 Azǎn énɛ́ lɛ́ɛ ɔ́, è nǎ nɔ́ wa hunnú yětɔn hwebǐnu ɖó nǔ e kó jɛ wá yi lɛ́ɛ é ɔ́, è ɖǒ ná nɔ́ lɛ́ flín tɛgbɛ.
29 Axɔ́si Ɛsitɛ́ɛ, vǐ nyɔ̌nu Aminadábu tɔn kpódó Maadocée Jwifu ɔ́ kpó nɔ kpɔ́, bó wlán nǔ e yě wa lɛ́ɛ é bǐ; mɔ̌ wɛ yě wa bó dó dó zǒgbé nǔ ba ɖo Mawu mɛ sín azǎn ɔ́ jí. 31 Maadocée kpódó axɔ́si Ɛsitɛ́ɛ kpó dó xwe énɛ́ ɔ́ wá nú yě ɖésú lɔmɔ̌, lobɔ gbetakɛ́n e yě ɖe tɔ́n é ɖó ná wa ɖagbe nú yě lɔmɔ̌. 32 Nǔ zɔ́n mɛ Ɛsitɛ́ɛ tɔn lɛ́ɛ wɛ nyí tɔn, bɔ xwe ɔ́ húzú hwɛndo titewungbe ée ná ɖo te tɛgbɛ káká sɔ́yi é; è dǒ xó énɛ́ lɛ́ɛ bǐ wěma mɛ, lobo nú è ma wá wɔn ó.
Mɛ zé d'aga
Currently Selected:
Ɛsitɛ́ɛ Glɛ̌sigbe 9: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.