Daniyɛ́li Glɛ̌sigbe 13
13
Tomɛxó we yí wǎn nú Suzánu
1Nya ɖé tíin bó nɔ́ nɔ Babilɔ́nu; nyǐkɔ tɔn nɔ́ nyí Jowakímu. 2É da nyɔ̌nu ɖokpó bɔ è nɔ ylɔ́ ɛ ɖɔ Suzánu, vǐ nyɔ̌nu Ɛlikiyási tɔn wɛ, é nyɔ́ ɖɛkpɛ ɖésú, bó ɖó sísí nú Aklúnɔ. 3Mɛjitɔ́ tɔn lɛ́ɛ ɖo gbejí nú Mawu, bó xwedó Mɔyízisɛ́n ɔ́ dó kplɔ́n vǐ yětɔn. 4Jowakímu ɔ́, dɔkunnɔ ɖaxó ɖé wɛ, bó ɖó kanlinkpó ɖaxó ɖokpó bɔdó xwé tɔn wú. Judéenu lɛ́ɛ nɔ nyi ahwan wá xwé tɔn gbe, ɖó gbɛtɔ́ nukúnɖéjí wɛ é nyí ɖo yě mɛ.
5Xwe nɛ́ ɔ́ xwe ɔ́, è fɔ mɛxó we, bónú yě ná nɔ ɖɔ hwɛ gbo nú togun ɔ́. Aklúnɔ ɖɔ xó dó yě wú hwenu e é ɖɔ: “Nǔ nyanya ɔ́, Babilɔ́nu wɛ é gosín. É gbɔn mɛxó e è sɔ́, bónú yě ná ɖɔ hwɛ gbo nú mɛ lɛ́ɛ jí, bó gbɔn yě mɛ e nɔ wa nǔ ɖi mɛ e nɔ xlɛ́ ali togun ɔ́ é ɖɔhun.” 6Tomɛxó nɛ́ lɛ́ɛ nɔ́ yi Jowakímu xwé gbe hwɛhwɛ, bó nɔ́ ɖɔ hwɛ gbo nú mɛ e hu hwɛ lɛ́ɛ. 7Gan wěwe mɛ, hwenu e mɛ bǐ gbadó ɔ́, Suzánu nɔ yi ɖi sa gbɔn asú tɔn sín jikpá mɛ. 8Mɛxó we lɛ́ɛ nɔ mɔ ɛ, bɔ é nɔ byɔ́ jikpá ɔ́ mɛ, bɔ nǔ tɔn jɛ nukún yětɔn mɛ nyɔ́ jí. 9Taglomɛ yětɔn flí, bɔ yě ɖe ayi sín Mawu jí, bó sɔ́ ba ná kpɔ́n Mawu e ɖo jǐxwé é ǎ, yě sɔ́ flín hwɛjijɔ e yě ɖó ná nɔ́ dó é ǎ.
10Akpakpa Suzánu tɔn nɔ sɔ́ yě mɛ we lɛ́ɛ, yě ká glá bó hun mɛ nú yěɖée ǎ. 11Nǔgbó wɛ, winnyá hu yě, ɖó yě mɛ we lɛ́ɛ bǐ wɛ jló ná ɖó xó xá Suzánu, 12É ɖo mɔ̌ có, ayǐhɔ́ngbe ayǐhɔ́ngbe tɛgbɛ ɔ́, yě nɔ́ ɖo cícɔ́ ɛ wɛ, bó ná mɔ ɛ ɖó nukún wú vɔ́vɔ́. 13É wá su gbe ɖokpó, ɖo gan wěwe mɛ mɔ̌, bɔ mɛ ɖokpó ɖɔ nú wegɔ́ tɔn ɖɔ mǐ ní yi xwé gbe ɖó nǔɖuɖu hwenu su, bɔ yě tɔ́n, bó wlí ali yětɔn yětɔn. 14Énɛ́ gúdo ɔ́, yě lɛ̌ lɛ́ kɔ bó wá mɔ yěɖée ajijimɛ ɖo tɛn ɖokpó ɔ́ mɛ; yě gbɔ bó kan nǔ byɔ́ yěɖée, bó ɖɔ xomɛ nú yěɖée; yě wá ɖó gbe kpɔ́, bó ba hwenu e ná nyɔ́ bɔ yě ná sixú mɔ Suzánu ɖokpónɔ géé ɔ́.
Mɛxó lɛ́ɛ dó hwɛ Suzánu
15Hǔn, mɛxó lɛ́ɛ ɖo te kpɔ́n hwenu e é ná nyɔ́ é. Gbe ɖokpó wá su, bɔ Suzánu byɔ́ jikpá ɔ́ mɛ, lě e é kó bló gbɔn azǎn we e wá yi lɛ́ɛ é mɛ é. Nyɔ̌nuví mɛsɛntɔ́ we ka xwedó e. É jló ná lɛ wǔ ɖo jikpá ɔ́ mɛ, ɖó yǒzo hwenu wɛ. 16Mɛ ɖěbǔ ɖo tɛn ɔ́ mɛ zɛ mɛxó we e hɔn hwlá, bó ɖo cícɔ́ ɛ wɛ lɛ́ɛ é wú ǎ. 17É sɛ́ nyɔ̌nuví lɛ́ɛ dó bónú yě ná yi sɔ́ nǔsáwǔ kpódó célu kpó wá n'i; é ká ɖɔ nú yě ɖɔ: “Mi dɔn jikpá ɔ́ sín hɔn lɛ́ɛ sú, bónú má lɛ wǔ.” 18Nyɔ̌nuví we lɛ́ɛ ká se gbe n'i. Yě sú jikpá ɔ́ sín hɔn lɛ́ɛ, bó ká tɔ́n gbɔn hɔn ɖěvo nu, bó ná yi sɔ́ nǔ e Suzánu zɔ́n yě lɛ́ɛ, yě ká mɔ mɛxó we lɛ́ɛ ǎ, ɖó yě ɖo hwlǎhwlá. 19Ée nyɔ̌nuví lɛ́ɛ tɔ́n tlóló ɔ́, mɛxó we lɛ́ɛ kán wezun wá Suzánu gɔ́n, 20bó ɖɔ n'i ɖɔ: “A mɔ a, jikpá ɔ́ sín hɔn lɛ́ɛ ɖo súsú, mɛ ɖěbǔ mɔ mǐ ǎ, nǔ towe wɛ nyɔ́ mǐ nukún mɛ, bo gbɔ nú mǐ na ɖó xó xá we. 21Ényí a gbɛ́ ɔ́, mǐ ná ɖó nǔvú dó nu towe ɖɔ mǐ mɔ hwi ɖokpónɔ kpó dɔ̌nkpɛvú ɖokpó kpó ɖo jikpá ɔ́ mɛ, énɛ́ wútu wɛ a ɖe ɖɛ nyɔ̌nuví lɛ́ɛ.” 22 Suzánu wɛn azɔn, bó ɖɔ: “É ján mì gbɔn fí bǐ, ɖó ényí un wa nǔ e zɔ́n mì wɛ mi ɖe ɔ́, é ná nyí kú nú mì; ényí un ka gbɛ́ ɔ́, mi na wa nǔ xá mì. 23É ɖo mɔ̌ có, é nyɔ́ nú mì ɖɔ má nɔ xomɛvɔ́, nú mi ná wa nǔ xá mì hú má hu hwɛ ɖo Aklúnɔ nukɔn.”
24Ée é ɖɔ mɔ̌ ɔ́, é jɛ xó sú jí syɛ́nsyɛ́n; mɛxó we lɛ́ɛ lɔmɔ̌ jɛ xó sú jí, lobo jɛ hwɛ dó e jí. 25Mɛxó lɛ́ɛ ɖokpó kán wezun bo yi hun jikpá ɔ́ sín hɔn. 26Ée mɛ e ɖo xwé ɔ́ gbe lɛ́ɛ se xósúsú ɖo jikpá ɔ́ mɛ ɔ́, yě nyi ahwan gbɔn hɔn ɖě ɔ́ nu bó wá, bó ná kpɔ́n nǔ e ɖo jijɛ wɛ ɔ́. 27Ée mɛxó lɛ́ɛ wlí adingban bo ɖó dó Suzánu nu ɔ́, winnyá hu mɛsɛntɔ́ lɛ́ɛ bǐ, ɖó mɛɖé se nǔ mɔ̌hunkɔ dó wǔ tɔn gbeɖé ǎ!
28Ayǐhɔ́ngbe tɔn ɔ́, togun ɔ́ bǐ wá kplé ɖo Jowakímu, Suzánu sín asú ɔ́ sín xwé gbe. Tomɛxó we lɛ́ɛ wá kpó nǔ nyanya e ɖo ayi yětɔn mɛ lɛ́ɛ kpán, nú è nǎ ɖó kúhwɛ nú Suzánu, bo hu i. Ɖo mɛ bǐ nukún mɛ ɔ́, yě ɖe gbeta tɔ́n ɖɔ 29è nǐ ylɔ́ Suzánu Ɛlukiyási ví e nyí Jowakímu sín asi é wá togun ɔ́ bǐ nukɔn. Énɛ́ ɔ́, è jɛ gbě tɔn mɛ tlóló. 30É wá, bɔ mɛjitɔ́ tɔn lɛ́ɛ kplá ɛ, vǐ tɔn lɛ́ɛ kpódó hɛ̌nnumɔ tɔn lɛ́ɛ kpó. 31Suzánu nyɔ́ ɖɛkpɛ ɖésú, bó ɖó jijɔ ɖagbe. 32É sɔ́ avɔ ɖé bú dó ta. Tomɛxó dídá we lɛ́ɛ zɔ́n ɖɔ è ni ɖe avɔ e é bú dó ta ɔ́ sín i; énɛ́ ɔ́, yě ná mɔ tɛn bo kpɔ́n ɖɛkpɛ tɔn dó gbɔ jlǒ yětɔn ná. 33Mɛ tɔn lɛ́ɛ kpódó mɛ e mɔ ɛ dó nukún wú lɛ́ɛ kpán bǐ ɖo avǐ ya n'i wɛ. 34Hwenɛ́nu ɔ́, degénɔ we lɛ́ɛ wá sí te ɖo agun ɔ́ nukɔn, bó ɖ'alɔ ta n'i. 35Suzánu zé ta yi jǐ bó ɖo avǐ ya wɛ, ɖó é gbó adɔ dó Aklúnɔ wú kpódó ayi tɔn bǐ kpó. 36Degénɔ we lɛ́ɛ wlí xó bó ɖɔ: “Mǐ mɛ we lɛ́ɛ ɖo sa ɖi wɛ ɖo jikpá ɔ́ mɛ; hwenɛ́nu wɛ Suzánu wá kpódó mɛsɛntɔ́ nyɔ̌nuví we kpán; é wá ɖe yě tɔ́n, bó sú jikpá ɔ́ sín hɔn. 37Dɔ̌nkpɛvú ɖé ka ko bɛ ɖo jikpá ɔ́ mɛ, bó sɛ yá ɛ, bó ɖó xó xá ɛ. 38Midɛɛ lɛ́ɛ ká ɖo jikpá ɔ́ sín gɔngɔn mɛ, bó mɔ nǔ nyanya nɛ́ ɔ́, bó kán wezun wá yě gɔ́n, 39bó wá gbo yě dó; mǐ kpé wú bó wlí dɔ̌nkpɛvú ɔ́ ǎ, ɖó é dó hlɔ̌nhlɔ́n hú mǐ; é hun jikpá ɔ́ sín hɔn lobo hɔn yi. 40Lo ɔ́, mǐ wlí Suzánu bó kan mɛ nǎhún e dɔ̌nkpɛvú ɔ́ nyí ɔ́ byɔ́ ɛ. 41É ká jló ná yí gbe nú mǐ ǎ; mǐ mɔ nǔ mɔ̌hun, bó nyí kúnnuɖetɔ́ tɔn.”
Agun ɔ́ bǐ ɖi nǔ nú xó yětɔn, ɖó lě e yě nyí mɛxó, bó ká lɛ́ nyí hwɛɖɔtɔ́ ɔ́ wútu, bɔ yě ɖó kúhwɛ nú Suzánu. 42Suzánu sú xó tlílí, bó ɖɔ: Áo! Mawu Mavɔmavɔ, a tunwun nǔ e ɖo hwlǎhwlá é. A tunwun nǔ bǐ cóbɔ é nɔ́ jɛ. 43A tunwun ɖɔ yě ɖe kúnnu agɔ dó wǔ ce. A ɖo mimɔ wɛ a? Kú ɖíe kú gbe un ja e, có un ka wa nǔ ɖěbǔ ɖo nǔ e dǐdá yětɔn zɔ́n, bɔ yě ɖo hwɛ tɔn dó mì wɛ lɛ́ɛ mɛ ǎ. 44Aklúnɔ ka ɖótó vosisa Suzánu tɔn.
Daniyɛ́li ɖe xomɛvɔ́ Suzánu tɔn xlɛ́
45Hwenu e yě kplá Suzánu xwe huhu gbé ɔ́, Yɛ Mawu tɔn ɖɔ xó dó ayi mɛ nú dɔ̌nkpɛvú wínnyáwínnyá e è nɔ ylɔ́ ɖɔ Daniyɛ́li ɔ́, 46bɔ é sú xó syɛ́nsyɛ́n ɖo agun ɔ́ tɛ́ntin, bó ɖɔ: “Nyɔ̌nu élɔ́ ɔ́, xomɛvɔ́nɔ wɛ, un ba nú è hu i ǎ.” 47Agun ɔ́ bǐ nɔ te bo kanbyɔ́ Daniyɛ́li ɖɔ: “Nɛ̌ ɖɔ gbɔn wɛ a ɖe, bo ɖo mɔ̌ ɖɔ wɛ?” 48Daniyɛ́li ka wá nɔ te ɖo agun ɔ́ tɛ́ntin bó yí gbe ɖɔ: Taɖu wɛ mi ka hun a, Izlayɛ́li ví e mi? Mi ɖó kú hwɛ nú Izlayɛ́li ví nyɔ̌nu ɖokpó, ma kan xó byɔ́ ɛ, mi ka ba do nú nǔ e jɛ lɛ́ɛ ǎ. 49Mi lɛ́ kɔ yi hwɛɖɔxɔsá, ɖó mɛ élɔ́ lɛ́ɛ ɔ́, kúnnu agɔ wɛ yě ɖe dó Suzánu wú. 50Togun ɔ́ bǐ lɛ́ kɔ wá hwɛɖɔxɔsá dó yǐyá jí, bɔ tomɛxó ɖě lɛ́ɛ ɖɔ nú Daniyɛ́li ɖɔ: “Wǎ jínjɔ́n ayǐ ɖo mǐ mɛ fí, bó ná ɖɔ nǔ e a lin ɔ́, ɖó Mawu ná mɛxó sín Sɛ́núnywɛ́ we.” 51Daniyɛ́li ɖɔ nú yě ɖɔ: “Mi ɖe mɛ élɔ́ lɛ́ɛ ɖě ɖó vo nú ɖě, bónú má kan nǔ byɔ́ mɛ ɖokpó ɖokpó.” 52É klán yě mɛ we lɛ́ɛ nǔgbó, bɔ Daniyɛ́li ylɔ́ mɛ nukɔntɔn ɔ́ ɖo yě mɛ, bó ɖɔ n'i ɖɔ: “Hwɛ ɔ́, a wa nǔ nyanya káká bó kpo degénɔ. Adǎka e a xo lɛ́ɛ bǐ ɖo te kpɔ́n we. 53 A nɔ dó hwɛ agɔ bó nɔ́ ɖó kúhwɛ nú xomɛvɔ́nɔ, bó nɔ́ ɖe hwɛhutɔ́ sín hwɛ mɛ.” Có Aklúnɔ ká ɖɔ: “A na hu xomɛvɔ́nɔ abǐ hwɛjijɔnɔ ǎ.” 54Din ɔ́, ényí a mɔ Suzánu nǔgbó bɔ é kpódó dɔ̌nkpɛvú ɖé kpó ɖo nǔ nyanya wa wɛ hǔn bo ɖɔ atín e sa a mɔ yě ɖe, bɔ yě ɖo xó ɖó wɛ é? É yí gbe ɖɔ un mɔ yě ɖo kpasátín sá. 55Daniyɛ́li ɖɔ: “Nǔvú e ná lɛ́ flɛ́ jɛ ta nú we ɔ́ ɖíe a ɖǒ e. Ɖó Mawu kó ná gbe wɛnsagun tɔn lɛ́ɛ ɖokpó ɖɔ é ní zɛ we ɖó we.” 56Énɛ́ gúdo ɔ́, Daniyɛ́li jó e. É zɔ́n ɖɔ è nǐ kplá mɛ wegɔ́ ɔ́ wá, bɔ é ɖɔ n'i ɖɔ: Hwɛ ɔ́ Kanáa ví wɛ nú we, a nyí Judáa ví ǎ. Nyɔ̌nu nɛ́ ɔ́ sín ɖɛkpɛ flí taglomɛ nú we, bɔ jlǒ nyanya gba ayi towe dó. 57Mɔ̌ wɛ mi ko nɔ bló gbɔn xá Izlayɛ́li nyɔ̌nuví lɛ́ɛ ɖ'ayǐ xóxó é nɛ́, bɔ yě nɔ́ ɖi xɛsi, bó nɔ́ jó yěɖée nú mi. Lo ɔ́, Judáa nyɔ̌nu ɖěbǔ sixú yí gbe nú walɔ dídá mitɔn ǎ. 58Din ɔ́, bo ɖɔ atín e sá a gbo yě dó ɖe é. É yí gbe ɖɔ Cɛ́nitín sá. 59Daniyɛ́li ɖɔ n'i ɖɔ: “Nǔvú e ná lɛ́ flí jɛ ta nú hwi ɖésúnɔ ɔ́ ɖíe a ɖǒ e. Ɖó wɛnsagun Mawu tɔn ɖo te dɛnkpe ɖo alɔ mɛ, bó ná vlɔ́ we ɖó we. É ná hu mi mɛ we lɛ́ɛ.”
60Bɔ agun ɔ́ bǐ sú xó tlílí, bó xomlá Mawu e nɔ hwlɛ́n mɛ e nɔ ɖó nukún i lɛ́ɛ é. 61Énɛ́ ɔ́ gúdo ɔ́, yě lílɛ́ kpan ta tomɛxó hwɛɖɔtɔ́ we lɛ́ɛ, ɖó gbɔn nǔkanbyɔ́ Daniyɛ́li tɔn gbla mɛ ɔ́, yě ɖésúnɔ ɖe xlɛ́ ɖɔ émí ɖe kúnnu agɔ, bɔ togun ɔ́ xwedó linlin nyanya e yě ɖó dó Suzánu wú ɔ́ dó gbo hwɛ ɔ́ ná. 62 È hu yě lě e Mɔyízisɛ́n zɔ́n gbɔn é. Azǎn nɛ́ ɔ́ gbe ɔ́, xomɛvɔ́nɔ ɖokpó gán. 63Ɛlikiyási kpódó asi tɔn kpó kpa susu nú Mawu, ɖó vǐ yětɔn Suzánu e è mɔ xomɛvɔ́nɔ tɔn é tamɛ; mɔ̌ jɛ́n Jowakímu, Suzánu sín asú ɔ́ kpódó hɛ̌nnumɔ tɔn lɛ́ɛ kpán xomlá Mawu é nɛ́.
64Sín gbe nɛ́ gbe ɔ́, togun ɔ́ bǐ wɛ nɔ mɔ Daniyɛ́li dó mɔ Mɛ ɖaxó ná.
Bɛlu kpódó Dan Ðaxó ɔ́ kpó
Currently Selected:
Daniyɛ́li Glɛ̌sigbe 13: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.