3 Jǎan 1
1
Gbedómɛ
1 Nyɛ Agunmɛxó ɔ́ wɛ ɖo wěma élɔ́ wlán sɛ́ dó mɛvívɛ́ná ce Gayiwúsi e un ɖó wǎn yíyí nǔgbó nǔgbó ná é wɛ.
2Mɛvívɛ́ná ce, un jló ɖɔ nǔ bǐ ní yi nú we ganjí, lanmɛ towe ní nɔ ganjí lě e a ɖo ganjí ɖo nǔɖiɖi mɛ gbɔn é. 3Ée nɔví ɖé lɛ́ɛ wá bó ɖɔ lě e a ɖo gbejí ɖo nǔgbó ɔ́ mɛ gbɔn, kpódó lě e a kpo ɖo gbɛ towe zán wɛ gbɔn ayǐhɔ́ngbe ayǐhɔ́ngbe ɔ́ nú mì ɔ́, xomɛ hun mì tlala. 4Un se ɖɔ vǐ ce lɛ́ɛ ɖo gbɛ zán wɛ ɖo nǔgbó mɛ ɔ́, nǔɖé sɔ́ nɔ hun xomɛ nú mì hú mɔ̌ ǎ.
Gbejíninɔ Gayiwúsi tɔn
5Mɛvívɛ́ná ce, a nɔ gbejí ɖo nǔ e a nɔ wa nú nɔví lɛ́ɛ é mɛ káká bó nɔ lɛ́ nɔ gbejí ɖo nǔ e a nɔ bló nú nɔví e nyí jǒnɔ lɛ́ɛ é lɔ mɛ. 6Yě ɖe kúnnu nú wǎn yíyí e a ɖǒ ɔ́ ɖo agun ɔ́ nukɔn; gɔ̌ alɔ nú yě lě e Mawu jló gbɔn é, nú yě ná yi to e mɛ yě xwe ɔ́. 7Đó Jezu Klísu wú wɛ yě ma yí nǔɖé ɖo mɛ e ma nyí klísusɛntɔ́ ǎ lɛ́ɛ sí cóbó jɛ ali ǎ. 8Mǐ mɛ klísusɛntɔ́ lɛ́ɛ ɔ́, mǐ ɖó ná d'alɔ gbɛtɔ́ mɔ̌hun lɛ́ɛ, bó ná sixú wa azɔ̌ xá yě, nú nǔgbó ɔ́ ná yi nukɔn.
Diotlefɛ́si kpódó Demɛtliwúsi kpán
9Un wlán wěma kléwún ɖé sɛ́ dó agun ɔ́; lo ɔ́, Diotlefɛ́si e nɔ yí wǎn nú gǎnɖuɖu ɖo yě nu ɔ́ ka gbɛ́ ɖɔ émí kún ná kpé nǔɖé xá mǐ ó. 10Énɛ́ ɔ́ wú ɔ́, hwenu e un ná wá mi gɔ́n ɔ́, un ná ɖɔ nǔ nyanya e é nɔ́ dó sin lɛ́ɛ nú mi, bó ná ɖɔ nǔyá e é ɖɔ nú mǐ ɔ́ kpódó adingban e é ɖó dó mǐ nu ɔ́ kpán nú mi; énɛ́ kɛ́ɖɛ́ ká wɛ ǎ; é nɔ́ yí nɔví e nɔ wá lɛ́ɛ ɖě ǎ; mɛ ɖěvo lɛ́ɛ ka jló ná yí yě ɔ́, é nɔ lɛ́ lɔn nú yě ǎ, bó nɔ lɛ́ ba ná ɖe yě sín agun ɔ́ mɛ.
11Mɛvívɛ́ná ce, ma nɔ wa nǔ mɛ e nɔ wa nǔ nyanya é ɖɔhun ó; lo ɔ́, nɔ wa nǔ mɛ e nɔ wa nǔ ɖagbe é ɖɔhun. Mɛ e nɔ wa nǔ ɖagbe ɔ́, Mawu tɔn wɛ é nyí, bɔ mɛ e ka nɔ wa nǔ nyanya ɔ́ mɔ Mawu ǎ.
12Mɛ bǐ wɛ nɔ ɖɔ Demɛtliwúsi xó ɖagbe; nǔgbó ɔ́ ɖésúnɔ ɖe kúnnu n'i; mǐ lɔ ɔ́, mǐ nɔ́ ɖe kúnnu ɖagbe n'i; a ka tunwun ɖɔ xó nǔgbó wɛ mǐ nɔ́ ɖɔ.
Gbedómɛ gǔdo gúdo tɔn lɛ́ɛ
13Un ɖó xó gěgé bó ná ɖɔ nú we; un ka jló ná wlán yě dó wěma jí sɛ́ dó we ǎ. 14Un ɖo linlin wɛ ɖɔ un ná wá mɔ we ɖo malín málín mɛ, bɔ mǐ ná kpé nu bó ɖɔ xó.
15Fífá ní nɔ kpɔ́ xá we.
Xɔ́ntɔn towe lɛ́ɛ dó gbe sɛ́ dó we. Dǒ gbe xɔ́ntɔn mǐtɔn lɛ́ɛ ɖokpó ɖokpó nú mǐ.
Currently Selected:
3 Jǎan 1: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.