2 Makabée 3
3
Sinmɔ́ɔ da alɛ
1Hwenu e Oniyási nyí vɔ̌sánú-xwlémawutɔ́ ɖaxó ɔ́, mɛ e ɖo Jeluzalɛ́mu, toxo mímɛ́ ɔ́ mɛ lɛ́ɛ mɔ fífá, bɔ nǔ vɔ ɖ'é wú. Yě nɔ́ xwedó sɛ́n lɛ́ɛ titewungbe tɔn. Ɖó Oniyási yí wǎn nú Mawu bó ɖe kɔ dó nǔ nyanya wiwa. 2Axɔ́sú lɛ́ɛ lɔmɔ̌ ɖó sísí nú Sinsɛnxɔ ɔ́, bó nɔ́ ná nǔ ɖagbe ɖagbe e jɛ xá lɛ́ɛ. 3Mɔ̌ wɛ Selekúsi, axɔ́sú Azíi tɔn ɔ́ nɔ sɔ́ dɔkun é ɖésúnɔ tɔn dó xɔ nǔ e yě ná dó sá vɔ̌ é nɛ́.
4Nya ɖé tíin bɔ è nɔ ylɔ́ ɛ ɖɔ Sinmɔ́ɔ, bó nyí vɔ̌sánú-xwlémawutɔ́ ɖo gbɛ̌ta Biluga tɔn mɛ, bó nɔ́ kpé nukún Sinsɛnxɔ ɔ́ wú. Ɖo nǔ e kan nukún kpé dó axi toxo ɔ́ mɛ tɔn lɛ́ɛ li nu ɔ́, é nɔ jɛ kpɔ́ xá vɔ̌sánú-xwlémawutɔ́ ɖaxó Oniyási ǎ. 5É kpé wú bó ɖu ɖo Oniyási jí ǎ. É wá yi mɔ Apoloniwúsi, Tlaseyasi ví ɔ́. É wɛ ɖo gǎn ɖu wɛ ɖo Silíi ɖaxó ɔ́ kpódó Fenisíi kpán nu. 6È ɖɔ n'i ɖɔ: Sinsɛnxɔ Jeluzalɛ́mu tɔn sín dɔkun d'agba, bɔ nǔ xɔ akwɛ́ e ɖ'é mɛ lɛ́ɛ gégé. È sixú xa akwɛ́ nabí e ɖ'é mɛ é ǎ. É hú gǎn akwɛ́ nabí e è nǎ dó sá vɔ̌ ná é. È sixú xa yě dó axɔ́sú ɔ́ sín dɔkun lɛ́ɛ mɛ.
Eliodɔ́ɔ yi Jeluzalɛ́mu
7Énɛ́ gúdo ɔ́, Apoloniwúsi wá yi tagbesɔ kpódó axɔ́sú ɔ́ kpán. È wǎ gba akpá dɔkun e xó Sinmɔ́ɔ ɖɔ n'i ɔ́ tɔn. Axɔ́sú ɔ́ ká wá nyi gǎn hɔn-yitɔ́ tɔn nukɔntɔn e è nɔ ylɔ́ ɖɔ Eliodɔ́ɔ ɔ́ sɛ́ dó Jeluzalɛ́mu. É zɔ́n ɛ ɖɔ é ní bɛ́ dɔkun nɛ́ lɛ́ɛ wá. 8Eliodɔ́ɔ ka ɖidó azɔn ɖokpó. Bɔ é nyí ɖɔ é ná yi ba do nú Silíi ɖaxó ɔ́ kpódó Fenisíi kpán. Lo ɔ́, nǔ e axɔ́sú ɔ́ lin ɔ́ wa gbé wɛ é xwe.
9Hwenu e Eliodɔ́ɔ ka wá Jeluzalɛ́mu ɔ́, vɔ̌sánú-xwlémawutɔ́ ɖaxó ɔ́ kpódó toxo ɔ́ mɛ nu lɛ́ɛ kpán yí i lě e é jɛ xá gbɔn é. É tín nǔ e wú é wá ɔ́ mɛ nú yě. É wlí nǔ e è ɖɔ dó Sinsɛnxɔ ɔ́ sín dɔkun wú ɔ́ ɖɔ nú yě, bó ká kanbyɔ́ yě ɖɔ: “Nǔ ká nyí mɔ̌ nǔgbó a?”
10-11Vɔ̌sánú-xwlémawutɔ́ ɖaxó ɔ́ wá ɖe xlɛ́ ɛ ɖɔ Sinmɔ́ɔ sín xó lɛ́ɛ bǐ wɛ nyí nǔvú, ɖó mɛdídá wɛ é nyí. Akwɛ́ ɖo Sinsɛnxɔ ɔ́ sín gbǎ mɛ nǔgbó. Lo ɔ́, akwɛ́ e è sɔ́ ɖ'ayǐ nú tɔ́cyɔvǐ lɛ́ɛ kpódó asúkúsi lɛ́ɛ kpán é wɛ. Hiikan, Tobíi ví e nyí mɛ nukúnɖéjí ɖé ɔ́ lɔmɔ̌ sín akwɛ́ ɖ'é mɛ. È xo nǔ énɛ́ lɛ́ɛ bǐ kplé ɔ́, yě ná mɔ kpatágan tɔ́nu wǒ-ɖokpó kpódó siká tɔ́nu atɔ́ɔ́n adaɖé kpó. 12É ɖo mɔ̌ ɔ́, è sixú táfú yě mɛ e ɖeji dó nɔtɛn élɔ́ ɔ́ e nyí nǔsísí ɖo gbɛ ɔ́ bǐ mɛ lɛ́ɛ wú é ǎ. Hǔn é sixú ɖó alɔ nǔ nɛ́ lɛ́ɛ ɖě wú ǎ.
Jeluzalɛ́munu lɛ́ɛ sín ayi gba dó
13Lo ɔ́, axɔ́sú ɔ́ zɔ́n azɔ̌ ɖé Eliodɔ́ɔ. Énɛ́ wú wɛ Eliodɔ́ɔ syɛ́n d'é jí ɖɔ yě ɖó ná xwe akwɛ́nú nɛ́ lɛ́ɛ dó axɔ́sú ɔ́ sín dɔkun lɛ́ɛ mɛ. 14É wá ɖó azǎn ɖokpó bó yi Sinsɛnxɔ ɔ́ mɛ bó wá yi sɔ́ kɛ́n nǔ e ɖo fínɛ́ lɛ́ɛ é bǐ tɔn.
Mɛ lɛ́ɛ bǐ sín ayi ɖo aga ɖo toxo ɔ́ mɛ. 15Vɔ̌sánú-xwlémawutɔ́ lɛ́ɛ sɔ́ vɔ̌sánú-xwlémawutɔ́ sín awu yětɔn lɛ́ɛ dó, bó wá jɛ kpo ɖo vɔ̌sákpe ɔ́ nukɔn, bó xo ɖɛ, bó byɔ́ Mawu e dó sɛ́n ɖó nǔ e è zě dó Sinsɛnxɔ ɔ́ mɛ lɛ́ɛ wú é ɖɔ é ní kpé nukún yě wǔ, nú mɛ e sɔ́ yě ɖó fínɛ́ lɛ́ɛ é. 16Yě mɛ e mɔ vɔ̌sánú-xwlémawutɔ́ ɖaxó ɔ́ lɛ́ɛ ɔ́, é nɔ vɛ́ nú yě yi sɛ́ mɛ. Nǔgbó ɔ́, nukún mɛ tɔn hɔ́n ǎ, bɔ è mɔ ɖɔ ayi tɔn bǐ ɖo aga. 17É ɖo xɛsi jí, bɔ agbaza tɔn bǐ nɔ sísɔ́. Mɛ e mɔ ɛ lɛ́ɛ bǐ tunwun ɖɔ é ɖo wǔvɛ́ mɔ wɛ ɖésú. 18Mɛ lɛ́ɛ bǐ tɔ́n bléwún sín xwé yětɔn lɛ́ɛ gbe, sonu sonu, bó ná xo ɖɛ ɖó kpɔ́. Yě lɔn nú è nǎ zé Sinsɛnxɔ ɔ́ dó blí kɔ́ ná ǎ. 19Nyɔ̌nu lɛ́ɛ gěgé tɔ́n bó sɔ́ nǔwamɛvɔ gbá, bó jó anɔ̌ yětɔn lɛ́ɛ dó nyi wěxo, bó jɛ ali jí. Ɖyɔ̌vǐ e è hɛn dó xwé gbe lɛ́ɛ nɔ ɖo wezun dó wɛ wá hɔnta alǒ kpekán jí, mɛ ɖěvo lɛ́ɛ nɔ ɖe ta tɔ́n gbɔn flɛtɛ́li lɛ́ɛ nu. 20Yě nɔ́ ɖo alɔ dlɛ́n sɛ́ dó jǐxwé wɛ bó nɔ́ ɖo vo sa nú Mawu wɛ. 21Nú è mɔ mɛ lɛ́ɛ bǐ kplékplé ɖo kɔ́ mɛ, ɖo ɖɛ xo wɛ, bɔ vɔ̌sánú-xwlémawutɔ́ ɖaxó ɔ́ ɖo te ɖo adohu adohu jí ɔ́, é blá wǔ ɖésú.
Aklúnɔ cyɔ́n alɔ Sinsɛnxɔ tɔn jí
22Mɛ lɛ́ɛ wá ɖo vo sa nú Aklúnɔ Nǔbǐwúkpétɔ́ ɔ́ wɛ nú é ná cyɔ́n alɔ dɔkun e nyí Sinsɛnxɔ ɔ́ tɔn lɛ́ɛ jí, bó ná hɛn yě nú mɛ e wá sɔ́ yě ɖó fínɛ́ lɛ́ɛ. 23Hwenɛ́nu ɔ́, Eliodɔ́ɔ ɖo nǔ e è ɖɔ ɔ́ bló wɛ. 24É ko sɛ́ yi dɔkungbá Sinsɛnxɔ ɔ́ tɔn kpá, éyɛ́ kpódó agbǒcɔ́tɔ́ tɔn lɛ́ɛ kpán. Ɖo ganxixo ɖokpó énɛ́ mɛ ɔ́, mɛ e kpa acɛ nú yɛ e ɖo jǐxwé bó lɛ́ nyi hlɔ̌nhlɔ́nbǐnɔ ɔ́ wá ɖe nǔ baɖabaɖa ɖé xlɛ́. Mɛ e syɛ́n ta bó byɔ́ tɛn nɛ́ ɔ́ mɛ lɛ́ɛ bǐ bɛ́ xɛsi ɖó Mawu sín hlɔ̌nhlɔ́n wú. Yě gbɔ bó cí mɛ e ma ɖó gǎn ǎ ɖɔhun, bɔ awakanmɛ kú yě bǐ. 25Nǔgbó ɔ́, yě mɔ sɔ́xátɔ́ baɖabaɖa ɖé ɖo sɔ́ jí bɔ é hɛn ahwanfunnú e nyɔ́ bɔ nǔ vɔ ɖ'é wú é. Nya nɛ́ ɔ́ dó sikáwu e ná zɔ́n bɔ é ná gló nǔ bǐ é. Sɔ́ nɛ́ ɔ́ lɔ́n kpó hlɔ̌nhlɔ́n kpán bó dlɛ́n afɔ tɔn nukɔntɔn lɛ́ɛ kpan nukɔn Eliodɔ́ɔ. 26Tlóló ɔ́, dɔ̌nkpɛvú wínnyáwínnyá we ɖé lɛ́ɛ wá xwetɔ́n. Yě dó hlɔ̌nhlɔ́n ɖésú, bó lɛ́ nyɔ́ ɖɛkpɛ taala, bɔ awu yětɔn fɛ́ wǔ. Mɛ nukɔntɔn ɔ́ cí aɖisíxwé, bɔ mɛ ɖě ɔ́ cí amyɔxwé nú Eliodɔ́ɔ, bó jɛ xixo e jí magbokɔ. 27Eliodɔ́ɔ wá j'ayǐ bó xɛ́nǔ. Mɛ lɛ́ɛ gbɔ bó wá sɔ́ ɛ dó azunzɔnnɔkpɔn mɛ. 28Eliodɔ́ɔ nɛ́ e byɔ́ xɔ e mɛ dɔkun ɖe ɔ́ din zaanɖé kpódó mɛ wɔ̌buwɔ́bú ɖé lɛ́ɛ kpán, kpódó mɛcɔ́tɔ́ tɔn lɛ́ɛ kpán ɔ́, sɔ́ sixú wa nǔɖé ɖo éɖée wú ǎ. Mɛ tɔn lɛ́ɛ sɔ́ ɛ yi, bɔ yě mɔ nǔ jɛ acɛkpikpa Mawu tɔn wú céɖécéɖé.
29Ée nǔwúkpíkpé Mawu tɔn xo Eliodɔ́ɔ zindɛ́ ɔ́, é mlɔ́ ayǐ numakɛ, ma sɔ́ ɖó nukún nǔ ɖěbǔ ɖɔ azɔn ná gbɔ nú émí. 30Hwenɛ́nu ɔ́, toxo ɔ́ mɛ nu lɛ́ɛ ɖo kú dó nú Aklúnɔ wɛ, ɖó lě e é cyɔ́n alɔ tɛn mímɛ́ tɔn jí gbɔn é wú. Cóbónú nǔ nɛ́ lɛ́ɛ ná jɛ ɔ́, Sinsɛnxɔ ɔ́ gɔ́ nú mɛ e ɖo xɛsi jí kpódó mɛ e ayi gbadó ná lɛ́ɛ é kpán. Din ɔ́, mɛ énɛ́ lɛ́ɛ sín ayi j'ayǐ, xomɛ hun yě, ɖó Aklúnɔ ɖe nǔwúkpíkpé tɔn xlɛ́.
Oniyási sa vo nú Aklúnɔ dó Eliodɔ́ɔ tamɛ
31Azɔn ɖokpó ɔ́, mɛ e kplá Eliodɔ́ɔ lɛ́ɛ wá byɔ́ Oniyási ɖɔ é ní sa vo nú Aklúnɔ nú é ná ná gbɛ nya élɔ́ ɔ́ e ɖo ayǐmlɔ́mlɔ́, bó ɖo kúgan mɛ é. 32Vɔ̌sánú-xwlémawutɔ́ ɖaxó ɔ́ ka ɖo xɛsi jí ɖɔ axɔ́sú ɔ́ ná vɛdó ɖɔ Jwifu lɛ́ɛ ba ná hu mɛsɛ́dó émí tɔn wɛ sín. Énɛ́ wú wɛ é xwlé vɔ̌ ɖokpó Aklúnɔ bónú azɔn ni gbɔ nú Eliodɔ́ɔ.
33Hǔn vɔ̌sánú-xwlémawutɔ́ ɖaxó ɔ́ xwlé vɔ̌sísá ɔ́ bó ná dó mɔ hwɛsɔ́kɛmɛ Aklúnɔ tɔn yí n'i. Hwenɛ́nu ɖokpó ɔ́, dɔ̌nkpɛvú nɛ́ lɛ́ɛ wá ɖe yěɖée xlɛ́ Eliodɔ́ɔ. Yě ɖo awu ɖokpó ɔ́ mɛ, bó ɖɔ nú Eliodɔ́ɔ ɖɔ: “Dǒ kú nú vɔ̌sánú-xwlémawutɔ́ ɖaxó Oniyási ɖésú. É wɛ zɔ́n bɔ Aklúnɔ lɛ́ vɔ́ gbɛ ná we. 34Gbɛ dɔn tó nú we. Din ɔ́, jlǎ Aklúnɔ sín nǔwúkpíkpé mɛ lɛ́ɛ bǐ.” Ée yě ɖɔ mɔ̌ ɔ́, é ba yě kpo.
Eliodɔ́ɔ jlá nǔwúkpíkpé Mawu tɔn
35Énɛ́ wú ɔ́, Eliodɔ́ɔ ná nǔ, bɔ è dó sá vɔ̌ nú Aklúnɔ. É sa vo taala nú Mawu e xɔ gbɛ n'i é. Énɛ́ gúdo ɔ́, é dó gbe Oniyási bɔ éyɛ́ kpódó sɔ́ja tɔn lɛ́ɛ kpán lɛ́ kɔ yi mɔ axɔ́sú ɔ́. 36Ɖo mɛ bǐ nukɔn ɔ́, é jlá nǔ e Mawu Aditi ɔ́ wa, bɔ é mɔ ɖó nukún tɔn wú é.
37Axɔ́sú ɔ́ ka kanbyɔ́ ɛ ɖɔ: “Mɛ̌ wɛ un ka ná sɛ́ dó Jeluzalɛ́mu hwe ɖěvo nu?” Eliodɔ́ɔ ka yí gbe n'i ɖɔ: 38“Nú a ɖǒ kɛntɔ́ ɖé alǒ mɛ ɖé bɔ é má nɔ mɔ acɛkpikpa towe gbɔ ǎ hǔn, sɛ́ dó dɔ̌n. Nú é nɔ gbɛ ɔ́, a na mɔ kɔlílɛ́ wá tɔn. Hwenɛ́nu ɔ́, è nǎ ko dɔn tó n'i tlílí. Nǔgbó ɔ́, Mawu nɔ ɖe nǔwúkpíkpé tɔn xlɛ́ ɖo tɛn nɛ́ ɔ́ mɛ ɖésú. 39Aklúnɔ Mawu, é mɛ e ɖó jǐnukúnsin ɔ́ nɔ́ kpɔ́n Sinsɛnxɔ ɔ́ jí, bó nɔ́ lɛ́ cyɔ́n alɔ jǐ tɔn. Mɛ e nɔ jló ná byɔ́ fínɛ́ kpó linlin e ma sɔgbe ǎ lɛ́ɛ kpán ɔ́, é nɔ́ dɔn tó nú yě, bɔ kú nɔ́ xo yě sɔ́.” 40Nǔ e xá Eliodɔ́ɔ ɔ́ nɛ́; lě e è sɔ́ dɔkun Sinsɛnxɔ ɔ́ tɔn ɖó vo nú Mawu gbɔn ɔ́ nɛ́.
Currently Selected:
2 Makabée 3: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.