1 Kɔlɛ́ntinu Xónusɔ́ɖóte
Xónusɔ́ɖóte
Wěma élɔ́ ɔ́, wěma e Pɔ́lu wlán sɛ́ dó agun Mawu tɔn e é ɖó ayǐ ɖo Kɔlɛ́nti toxo mɛ é wɛ. Kɔlɛ́nti toxo ɔ́ wɛ nyí tokpɔn Hlɔ̌manu lɛ́ɛ tɔn ɖo Akáyi sín tota hwenɛ́nu. Toxo ɖé wɛ bɔ ajɔ̌ nyɔ́ wa ɖ'é mɛ ganjí, bó nyí toxo nukúnɖéjí ɖé, bɔ mɛ bǐ tunwun, bɔ sinsɛn Glɛ̌sinu lɛ́ɛ tɔn lɛ́ɛ kpódó aga kpó jínjɔ́n ayǐ ɖ'é mɛ. Ée nǔmasɔgbe wiwa gɔ́ toxo ɔ́ mɛ mɔ̌ é ɔ́, agun Mawu tɔn e jɔ bɔ é má kó lín ǎ ɔ́ ɖó ná ba lě e é ná zán gbɛ gbɔn, bɔ é ná sɔgbe xá Wɛn Ɖagbe ɔ́ é. Énɛ́ ɔ́ wú wɛ yě wlán wěma sɛ́ dó Pɔ́lu, bó byɔ́ ɛ ɖɔ é ní kplɔ́n nǔ émí dó asidida wú, é ní kplɔ́n nǔ émí dó lan e è dǒ sá vɔ̌ nú vodún é wú, lobo kplɔ́n nǔ émí dó lě e è nǎ zán nǔníná tɛnmɛ tɛnmɛ e Yɛsinsɛn ná klísusɛntɔ́ lɛ́ɛ gbɔn é wú.
Mɛsɛ́dó ɔ́ ɖɔ nǔ e ba wɛ yě ɖe lɛ́ɛ sɛ́ dó yě, bó ká lɛ́ ɖɔ nǔ ɖěvo ɖěvo lɛ́ɛ gɔ́ ná; nǔ lɛ́ɛ wɛ nyí: adɔn e ɖo agun ɔ́ mɛ é, nǔgblégblé wiwa, hwɛgun e nɔví nɔví lɛ́ɛ nɔ́ dɔn yěɖée yi é, kɔnɖókpɔ́ nǔɖuɖu ɔ́ kpódó fínfɔ́n sín kú kpó. Đo nǔ énɛ́ lɛ́ɛ bǐ mɛ ɔ́, mɛsɛ́dó ɔ́ ɖɔ klísusɛntɔ́ sín walɔ ɔ́, wǎn yíyí jí wɛ é ɖó ná jínjɔ́n (13).
Nǔ tají tají e ɖo wěma ɔ́ mɛ lɛ́ɛ
Pɔ́lu dó gbe sɛ́ dó Kɔlɛ́ntinu lɛ́ɛ (1.1-9)
Kínklán ɖo agun ɔ́ mɛ (1.10—4.21)
Walɔ nyanya e zán wɛ klísusɛntɔ́ lɛ́ɛ ɖe ɖo agun mɛ é (5—6)
Nǔ e ɖo asidida xó mɛ é (7)
Jlokoko e mɛ klísusɛntɔ́ ɖe ɔ́ ɖó dogbó (8—10)
Lě e è nǎ wa nǔ gbɔn sinsɛn hwenu bɔ é ná nyɔ́ é, wǎn yíyí e klísusɛntɔ́ ɖó ná ɖó é (11—14)
Fínfɔ́n sín kú (15)
Akwɛ́ e è nɔ jɔ nú nɔví e ɖo Jeluzalɛ́mu lɛ́ɛ é, tito tomɛ yiyi tɔn kpó gbedómɛ kpó (16)
Currently Selected:
1 Kɔlɛ́ntinu Xónusɔ́ɖóte: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.