Mal 13
13
Yesu wayaabisa nsyamukunu Nzo-nzaambi
(Mat 24.1-2; Luk 21.5-6)
1Yesu bu kapala mu Nzo-nzaambi, mosi mu bayiki baandi wamuleele ti: «Muyikisi, moneeti matari ma bubwe, moneeti ntuungulu yi bubwe?» 2Yesu waleele kuri nde ti: «Ye wumono ntuungulu yayinene yi? Mbasi-tsuku kusaala tari ha yulu tari ko, di bahele kutsaamuna.»
Mpasi na nkwamusunu
(Mat 24.3-14; Luk 21.7-19)
3Yesu kabaanaa wadzakala ha yulu Mulaandu wa Mi-olive, kuri watala ku Nzo-nzaambi, Petelo, Yakobo, Yowane na Andere bamufuula ha nde-kaka ti: 4«Leeleeti beetu, mu nkya ntaangu mamo mayirima, na nkya kidiimbu kisoongo kuri ti byobinso sa byawa?» 5Yesu wabeke mu kubaleele ti: «Seenee madyeele, muutu ka kwiisa kuluwuna. 6Baatu balaka sa biisa mu nkuumbu yaami, sa baleele ti: "Wumawu me!" Na sa bawumuna balaka. 7Ha luyuka beenu midziingu na kiyomo kya midziingu, yaa lubwilikila kinkuuka ko. Mamo mayelemini kutubuka, ngo yakireeti kuba pe manunu. 8Mansi na mansi sa manwaana, bimfumu na bimfumu sa byanwaana; butoto sa bwatembele mu mampele malaka, na sa kwaba nzala; yiyo ngo mbandukulu misoongo mya mbutulu. 9Ngo seenee madyeele mu beenu-meene. Sa baluyekele ha busu bwa kikuutu, sa balulata mu manzo ma nkutukunu, na sa lwateleme ku muyalu ha busu bwa batumi na ha busu bwa bambyaasi, mu ntoono me, mu kuteele me kimbaangi kuri bo. 10Musamu Wamubwete yelemini, kutekesele kuba wayaabusu, kuri mansi momanso. 11Ha balunata mu kuluyekele, yaa lutekesele kuba na boomo ko, mu mi luleele; ngo mamo ma lubaka mu kilookolo kikyo, leelee mo, bukuri kari beenu ludzoonso ko, ngo Mpeeve Yangisi. 12Mpaangi yayimosi sa kayekele mpaangi yakaka mu lufwa, taayi se, mwaana waandi. Baala sa banwaanisa bataayi na banguri na kubadzusa. 13Baatu bobanso sa balubele mu ntoono nkuumbu yaami. Ngo wunde wunamitina natee kumanunu, sa kabvuuka.»
Mpasi dzadzinene
(Mat 24.15-28; Luk 21.20-24)
14«Mbasi-tsuku di lumono beenu misamu myahele bwa kukuundila, ha kibeendu kiri myahele kuyelemene kuba, lo wunde wutaanga kabakula; babo bari ku Yudaya bayitika ku yulu milaandu. 15Wunde wuri ku yulu nzo, yaa kasunduka, mu kukoto mu nzo yaandi, na kuholo kitotolo, 16na wunde wuri ku manseke, yaa kabvutuka ku mambisa ko mu kweeholo kinkuta kyaandi. 17Kyaari kuri bakyeetu baba na mayimi, na babo bakwenwiisa baala mabeene, mu biluumbu bibyo. 18Saambilee mpisi heki mamo mahele kutuba mu ntaangu ya kyoosi. 19Bukuri mu biluumbu bibyo, sa kwaba mpasi dziri dzafwanikina na dzidzo dzatubukiri ko, kuholosono kwa bandukiri Nzaambi kuyirika yulu na butoto, natee mu lu; na dza bubwo dzibweese kutubuka ko. 20Mbuti Mfumu kasii kukufuka biluumbu ko, nkani kuba muutu wubvuuka ko; ngo mu ntoono basoolu, bakari kasoolo, nde wakufikiri biluumbu bibyo. 21Hango, mbuti muutu wululeeriri ti: "Mono Kiristo wuri hamaha; mono wuri kunii", lo yaa lusa kanyi ko; 22bukuri ba-Kiristo bampya, na babikiri bampya, sa bateleme, sa bayirika bidiimbu na bimaangu mu kiteesu kya kuwumuna basoolu, mbuti buri bwakuka. 23Beenu ngo bari, seenee madyeele, me ntekisiri kuluyaabisa myominso.»
Nyisulu Mwaana muutu
(Mat 24.29-31; Luk 21.25-28)
24«Ngo kasi mu biluumbu bibyo, ha mambisa ma mpasi dzidzo, ntaangu sa yaba mampimbisi, na ngoondo yibweese kuha mweese waandi ko, 25bambwetete bari ku yulu sa basonoko, na mpinu dza ku yulu sa dzanyingina. 26Haho, baatu sa bamono Mwaana muutu wukwiisa mu matuti, mu mpinu dzadzinene na nkeembu. 27Nde sa kaheeke bambasi, sa kakutukisa [ba nde] ba kari kasoolo mu manto ma butoto mo mana, kuholosono kwa sukulu butoto, natee kwa sukulu yulu.»
Nkuma ya mungenge
(Mat 24.32-35; Luk 21.29-33)
28«Bakulee nkuma ya mungenge: mitu mya bimpaala habaanaa myeki myamoono, na makaya mapariri, lo beenu luyaari ti ntoombo yikokisiri. 29Bwobumosi beenu se, ha lumono mamo matubukiri, lo luyaari ti nde kokisiri ha myeelu. 30Ngwanwa me nyiluleele ti, kiseendu ki kiluta ko, natee momanso mamo makiri kumonoko. 31Yulu na butoto sa byaluta, ngo kasi maampu maami mari ndutula ko.»
Wunu Nzaambi kitsu yaari ntaangu ya mpotulu
(Mat 24.36-44)
32«Mu ntoono ya kiluumbu kikyo, bunu pe ya kilookolo kikyo, kuri muutu wuyaa ko, ti bambasi mu mayulu, ti Mwaana; wunu Taata yaari. 33Seenee madyeele, beenee naana, bukuri beenu lwahele kuyaaba ha kuka ntaangu. 34Sa dyaba bunu muutu weensi ku budyeengi, siisiri nzo yaandi, heeri lutumu kuri bisari byaandi, muutu-muutu na kisalu kyaandi, na kuri mukebi-mweelu wumutumini mu kuba naana. 35Ngo beenee naana, bukuri lwahele kuyaaba ntaangu yikwiisa ngaa-nzo: mu nsinsika, kakati dya butsuku, ha kookolaa bansusu, bunu pe kipari, 36mu kubata ti, kiisaana na sisuu, nde kalutangusina kuri luri tolo. 37Mamo ma nyiri mu kululeele, kuri bobanso me nyileele: beenee naana.»
Currently Selected:
Mal 13: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.