Mal 12
12
Nkuma ya bakamuni ba bviinya bababi
(Mat 21.33-46; Luk 20.9-19)
1Yesu wabeke kubadzoonsolo mu mankuma. Nde ti: «Muutu mosi wakuna nseke bviinya, wayidyengesele mu lumpaangu, wahaka bulu dya kukamukina malu, na watuunga nzo yadzaangama. Tumi nde Walaangisa yo kuri bakamuni ba bviinya, na wayende ku budyeengi. 2Ntaangu bu yayelemene, nde waheeke kisari kimosi kuri bakamuni ba bviinya mu kweeholo kuri bo, kikuuku kya bviinya kya nde. 3Bakamuni ba bviinya bamukwaataa, bamuleti na bamubvutula na myooko mya mukangala. 4Nde wabweese kubaheekele kisari kikimi; wunde se bamulata mu mutu na bamusaana. 5Nde wabweese kuheeke kikimi. Wunde bamudzusa. Balaka se bakaka basii bunubwo; babamosi babalata na bakaka babadzusa. 6Waba wasaala kuri nde wunu mwaana wa mutima kitsu. Wamuheeke wampotulu kuri bo, mu kuri ti: "Bo bee babvumina mwaana me."» 7Ngo kasi bakamuni ba bviinya babo, balelesene bo na bo ti: "Wu ngo mukondiri-saala. Wasee, tumudzuseenu, na saala diba dya beetu." 8Bamukwaataana, bamudzusiri na bamuloosiri ku mbisa lumpaangu lwa bviinya. 9«Ngaa-bviinya, lo nki kasa? Nde sa kiisa, sa kadzusa bakamuni ba bviinya, na sa kaha bviinya kuri baatu bakimi. 10Buri lwaasi taanga Matinu ko?
"Tari dya loosiri batuungi,
didyo ngo dyeki dya nguri ha kuumbu.
11Mimyo kuri Mfumu miri myafumuna,
na mya nkimukunu ha miisu mya beetu!"»
12Bo baba sakaana kumukaanga, ngo baba bata mpuumbu; mukwongo, bo babakuri ti nkuma yiyo mu bo kateeriri. Bo bamusisaana, bee kwaaku.
Mpaku yi bafutaa kuri Kayisari
(Mat 22.15-22; Luk 20.20-26)
13Babamosi mu Bafarisi na baatu ba Erode, babaheeke kuri Yesu, bamutekele mweete mpisi bamubaka mu nzoonsulu. 14Bu bayende, baleele kuri nde ti: «Muyikisi, beetu tuyaari ti ye ngaa-ngwanwa, na ye wabataa muutu ko; bukuri ye wamonaa kinzeri kya baatu ko, ngo ye wukweyikisa nzila ya Nzaambi mu ngwanwa. Buri kuri na miswa mu kufuta mpaku kuri Kayisari hoti pele? Beetu tufuta hoti yaa tufuta ko? 15Ngo Yesu, bu kaba kayaari bumpitu-bumpyoongo bwa bo, wabaleele ti: "Buri beenu lutekele me mweete? Ntwalikilee kidenali mpisi me mono!» 16Bo bamutwalikila kyo. Yesu wabafuula ti: «Kidzisi ki na bisoni bi bya na?» Bo babvutula kuri nde ti: «Bya Kayisari.» 17Haho, Yesu wabaleele ti: «Bya Kayisari, bvutulee kuri Kayisari; na bya Nzaambi kuri Nzaambi.» Bo bamono nkimukunu mu nde.
Kifuuri mu ntoono mfulukulu ya bafwa
(Mat 22.23-33; Luk 20.27-40)
18Basaduki bayisa kuri Yesu. Bo ngo baleelaa ti, mfulukulu ya bafwa yiri ko. Bo bamufuula ti: 19«Muyikisi, Moose watinina beetu dimadi: "Mbuti mpaangi muutu yifwiiri, sisiri mufwiiri na wahele kusisa mwaana, lo muutu wunde kakondolo mufwiiri mpaangi, na kamubutila baala." 20Ngo kwaba bampaangi nsaamu. Watete kweeriri wa mukyeetu, na fwiiri kwahele kusiisa mwaana. 21Waboolo kondiri mufwiiri na nde se fwiiri kwahele kusiisa mwaana. Wabatatu se bwobumosi. 22Bo nsaamu bahele kusisa baala. Ha mambisa ma bobanso, mukyeetu se fwiiri. 23Heki mbasi-tsuku haba mfulukulu, [bo bu bafuluka,] mukasi mbasi-tsuku wa na kaba mu bo, bukuri bo nsaamu bamubakiri bunu mukasi?» 24Yesu wabaleele ti: «Mu mimyo beenu luri lwahumuka, bukuri lwahele kuyaaba Matinu, na mpinu dza Nzaambi. 25Mukwongo, mbasi-tsuku ha fuluka bafwa, lo kuba babakala bakweele ko, na bakyeetu ba bakweelese ko, ngo sa baba bunu bambasi ku mayulu. 26Ngo mu ntoono ya bafwa bari sa bafuluka, buri beenu lwasii taanga mu mukaanda Moose ko, ha bari badzoonsolo mu bvuunda dya miti, bwaba muleele Nzaambi ti: "Me ngo Nzaambi ya Abalaami, Nzaambi ya Isaki na Nzaambi ya Yakobe!" 27Nde kari Nzaambi ya bafwa ko, ngo ya baatu bamwooyo. Nkati beenu lwawumuka kwalaka.»
Ngisi yibvuriri bunene
(Mat 22.34-40; Luk 10.25-28)
28Mosi mu batini ba mangisi, kayukaa bu baba kalikisaana na bwa heeri Yesu mvutu yayibwete kuri bo, nde wakokosolo na wamufuula ti: «Nkya ngisi yibvuriri bunene mu momanso?» 29Yesu wabvutula ti: «Yibvuriri bunene ngo: "Isaheli Yuka! Mfumu Nzaambi yeetu, nde mosi. 30Tya Mfumu Nzaambi yaaku, mu mutima waaku ndemunso, mu muheebulu waaku ndemunso, mu madyeele maaku momanso, na mu makwa maaku momanso." 31Yamoolo ngo yimayi: "Tya mbasi yaaku bunu ye-meene." Kwahele ngisi yikimi yibvuriri mu bunene ti na mamo.» 32Mutini mangisi wamuleele ti: «Bwabubwe Muyikisi! Ngwanwa ye leeriri: Nde mosi, kwahele mukimi ha yulu nde. 33Kumutya mu mutima ndemunso, mu madyeele momanso, mu makwa momanso, na kutya mbasi bu batiila nyutu ya nde-meene; mimyo mibvuriri bubwete ti na bikabu byobinso bya kuyoko na bya kudzusa.» 34Yesu kamonaa ti [nde] heeri mvutu ya madyeele, wamuleele ti: «Ye wahele la na Kimfumu kya Nzaambi.» Kwasii ba muutu ti mosi ko waba bweese kutsiitsa kumuha kifuuri.
Kiristo na Davidi
(Mat 22.41-46; Luk 20.41-44)
35Mu Nzo-nzaambi, Yesu wayikisa waleele ti: «Dyaburi batini ba mangisi bari mu kweleele ti Kiristo mwaana Davidi? 36Nde-meene Davidi wadzoonso mu ntwaalusulu ya Mpeeve Yangisi waleele ti:
"Mfumu waleele kuri Mfumu yaami ti:
Dzakala ha lubakala lwaami,
natee ku nyisuusa me bataatu baaku
kunsa bitaambi byaaku."
37Nde-meene Davidi habaanaa wumuteele ti: "Mfumu"; lo dyaburi Mfumu kabweese kuba mwaana Davidi?"
Kusa madyeele mu batini ba mangisi
(Mat 23.1-36; Luk 20.45-47)
Mpuumbu yayinene yaba na kiminu mu kuyuka ma kaba leelaa nde.» 38Yesu mu nyikusulu dzaandi, wabaleelaa ti: «Seenee madyeele mu batini ba mangisi, bo batiiri kweyunga mu madzweele mamala, na be baha mamboto mu bibeendu bya bobanso. 39Bo batii kwedzakala mu bibeendu byatete mu manzo ma nkutukunu, na mu mu bibendu bya lukiinsu mu ntaangu ya kudya. 40Bo bakwekalimina bitotolo mu manzo ma bafwiiri, na batiiri kwemonokono mu nsaambulu dzadzila. Bo sa bataambula mutsuundu wubvuriri bunene.»
Kikabu kya mufwiiri
(Luk 21.1-4)
41Yesu bu kaba wadzakala ha mankula ma kikebulu kya mboongo, waba monaana bunu bwaba tubaa baatu mboongo mu kikebulu. Bisina byalaka baba tubaana mboongo dzalaka. 42Mufwiiri mosi wa muwelu wayisa na watubu mipata myoolo mya nsensele, miri mufunu wantele. 43Yesu kateelaa bayiki baandi wubaleeriri: «Ngwanwa me nyiluleeriri ti, mufwiiri wa muwelu wu bvuriri kutuba ti na bobanso batubiri mu kikebulu; 44bukuri bobanso batubiri byayu-yulu. Kasi kunsa buwelu bwaandi, nde tubiri byobinso bi kabee na byo, bya kidziingu kyaandi.»
Currently Selected:
Mal 12: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.