Mal 10
10
Nyikusulu dza Yesu mu ntoono nzusulu makweele
(Mat 19.1-12; Luk 16.18)
1Yesu kayisikaa haho, weensi mu mankoonsi ma Yudaya, [na] ku simu dya Yorodani. Mampuumbu ma baatu mabweese kukutukuna ha teke nde, na bunu bwaba kifu kyaandi, nde wabweese kubayikisa. 2Bafarisi bu bakokosolo kuri nde, bamuha kifuuri mu kumutsiitsa: «Buri kuri miswa kuri mulumi, mu kubinga mukasi waandi?» 3Yesu wabvutula kuri bo ti: «Moose nki kari kalutuma?» 4Bo babvutula ti: «Moose waha miswa mu kutina mukaanda wa nzusulu makweele na kubinga mukasi.» 5Yesu wabweese kuleele kuri bo ti: «Mu ntoono nkubulu mitima myeenu, ngo Moose kalutinini ngisi yiyo. 6Kunu mbandukulu yulu na butoto, Nzaambi wayirikiri "bakala na mukyeetu;" 7"mu ntoono yiyo, bakala sa kasiisa taayi na nguri yaandi [na sa kakaangama mu mukasi waandi], 8na bo boolo sa baba muswinyi mosi, kuri lo basii boolo ko, ngo muswinyi mosi." 9Ngo bibyo biri Nzaambi wabibvuuta, muutu yaa kabihaambila ko.» 10Babaanaa beki ku nzo, bayiki baandi babweese kumuha kifuuri mu musamu wunde. 11Yesu wabvutula kuri bo ti: «Mubakala wubinga mukasi waandi, na kweeriri mukyeetu mukimi, lo teeri kimpala ha busu bwa mukasi watete. 12Na mbuti mukyeetu bingiri mulumi waandi, na kweeriri bakala dikimi, lo nde teeri kimpala.»
Yesu wasakumuna mwaa-baala
(Mat 19.13-15; Luk 18.15-17)
13Baatu banata mwaa-baala kuri Yesu, mpisi nde kababelemene, ngo bayiki baandi babaŋaŋina. 14Yesu wamono dyo ti bwabubi, na waleele kuri bayiki baandi ti: «Hemesee mwaa-baala biisa kuri me. Yaa lubakakisila ko, bukuri Kimfumu kya Nzaambi kiri kya bafwaanikina na bo. 15Mu ngwanwa, me nyiluleele ti: Mpisi wunde wuhele kutaambula Kimfumu kya Nzaambi bunu mwaa-mwaana, lo ka kakoto mu kyo ko.» 16Nde wababuumba kunsa myooko, myooko myaandi, na wabasakumuna, mu ntetukulu myooko ha yulu bo.
Kifuuri kya muutu wa kisina
(Mat 19.16-30; Luk 18.18-30)
17Yesu bu kaba kweyende mu nzila, muutu mosi wayisa mu ntiinu, watsukuma ha busu bwaandi na wamufuula ti: «Muyikisi wamubwete, nki me nsa mu kutaambula kidziingu kyahele manunu bunu saala?» 18Yesu waleele kuri nde ti: «Buri ye wuleele kuri me ti me wamubwe? Kuri muutu wamubwe ko, ha yulu wunu Nzaambi kitsu. 19Ye yaari mangisi: "yaa dzusa ko, yaa ta kimpala ko, yaa yiba ko, yaa ta kimbaangi kya mpya ko, yaa sa bumbabu ko, kiinsa taayi na nguri yaaku."» 20Muutu wunde waleele kuri Yesu ti: «Muyikisi, momanso mamo, me nyamakebe kuholosono bulesi bwaami.» 21Yesu kamusungumina kisoosi, wamutya na wamuleele ti: «Kitotolo kimosi kiheeri kuri ye: yende, yarika bi wuri na byo, na ha [kuri] bawelu, ye sa baka busina ku yulu, na wasa, nama me.» 22Ngo nde bu kayuka maampu mamo, makwa mamuwa, na wayende kunsa ngebe, bukuri waba na lubaku lwalaka. 23Yesu, bu katala mpele na mpele, waleele kuri bayiki baandi ti: «Diri nkati dya mpasi kuri baatu bari na busina, mu kukoto mu Kimfumu kya Nzaambi.» 24Bayiki babaka boomo mu misamu mimyo. Ngo Yesu wabweese kuleele kuri bo ti: «Mwaa-baala, nkati diri dya mpasi mu kukoto mu Kimfumu kya Nzaambi. 25Dibvuriri mpasi kuri kisina mu kukoto mu Kimfumu kya Nzaambi, ti na kibulu kiri nkuumbu kamelo mu kukoto ha wuri dya noongo.» 26Baatu bamono dyo nkati dyansisi, na balelesene bo na bo ti: «Na wubangisina kubvuuka?» 27Bu kabasungumina kisoosi, Yesu waleele ti: «Kuri baatu lo kubangisina pe, ngo ka kuri Nzaambi ko, bukuri kuri Nzaambi momanso mari bwa kubangisina.» 28Petelo wabaandika kumuleele ti: «Mono, beetu twasiisiri byobinso na twakunemi.» 29Yesu waleele ti: «Mu ngwanwa, me nyiluleele ti: Kuri muutu ko wuri kasiisaana nzo yaandi, bunu pe bampaangi na bibusi, bunu pe taayi na nguri, bunu pe baala, bunu pe manseke mu ntoono me, na mu ntoono Musamu Wamubwete, 30lo heriri kutaambula ku kinkama, mu ntaangu ya lumalu: manzo, bampaangi, bibusi, banguri, baala na manseke kunsa nkwaamusunu, tumi kidziingu kyahele manunu, mu ntaangu yikwiisa. 31Balaka bari batete, sa baba bampotulu; na babo bari bampotulu, sa baba batete.»
Yesu wabweese kuyaabisa lwatatu lufwa lwaandi
(Mat 20.17-19; Luk 18.31-34)
32Baba mu nzila mu kutoomboko ku Yerusalemi, Yesu waba ku mankula. Bayiki baandi baba na boomo, na babo baba kwebanama baba na nzala mwooyo. Yesu wabweese kuholo bo kuumi na boolo, na wabeke mu kubaleele mamo mamubwilikila. 33Nde wabaleele ti: «Mono, turi mu kutoomboko ku Yerusalemi, na Mwaana muutu sa kaba wayekulu kuri bakuutu ba bangaanga-nzaambi, na kuri batini ba mangisi. Bo sa bamukesele mukanu wa lufwa na sa bamuyekele kuri bangooyi, 34bo sa bamusaana, sa bamufulula mante, sa bamulata nkwaasulu, na sa badzusa; ha mambisa ma biluumbu bitatu, nde sa kufuluka.»
Yakobo na Yowane basa ndoombulu
(Mat 20.20-28)
35Baala ba Dzebedayi, Yakobo na Yowane, bakokosolo kuri Yesu na bamuleele ti: «Muyikisi, beetu tutiiri ti, ye wutuyirikila mamo ma tukuloombo.» 36Nde wabvutula kuri bo ti: «Nki lutiiri me nyiluyirikila?» 37Bo babvutula kuri nde ti: «Ye ha miswa kuri beetu mu kudzakala, mosi ha lubakala lwa ye, na mosi ha lumosi lwa ye, mu nkeembu yaaku.» 38Yesu wabvutula kuri bo ti: «Beenu lwahele kuyaaba ma luri mu kuloombo. Beenu lo lubangusini kunwa mbasa yi nyinwa me, bunu pe kuba babotuku mu mbotokulu yi babotoko me?» 39Bo babvutula kuri nde ti: «Beetu lo tubangusini.» Ngo Yesu wabaleele ti: «Mbasa yi nyinwa me, beenu sa lwanwa, na mbotokulu yi babotoko me, beenu sa balubotoko mu yo. 40Ngo mu mitariri kudzakala ha lubakala bunu pe ha lumosi lwa me, kari me nyiha miswa mimyo ko; ngo bibeendu bibyo bya baatu, ba bari bayirikila.»
41Bayiki kuumi bakaka, bu bayuka bubwo, babakila Yakobo na Yowane nkesi. 42Yesu kabateelaana, wubaleeriri ti: «Beenu luyaari ti, babo babakoomonaa buni bamfumu ba mansi, bakoosalilaa bumfumu bwaaku ha yulu mansi mamo, na bakuutu ba mo, basalilaa lutumu lwaaku ha yulu mo. 43Kari bubwo buyelemini kuba mu beenu ko; ngo wunde wutiiri kuba mukuutu mu beenu, lo kaba kisari kya beenu, 44na wutiiri kuba watete mu beenu, lo sa kaba nkutu ya bobanso. 45Bukuri Mwaana muutu wahele kwiisa mu kuri ti bamusalila, ngo mu kusalila, na kuha kidziingu kyaandi, bunu kikori mu balaka.»
Yesu watsinikisa Bartimayi wafwa miisu
(Mat 20.29-34; Luk 18.35-43)
46Bo bayende ku Yeriko. Yesu kabaanaa weki totoko mu Yeriko, na bayiki baandi na mpuumbu yayinene, muutu mosi wafwa miisu, ngaa-luloombo, nkuumbu yaandi Bartimayi mwaana Timayi, waba wadzakala mu teke nzila. 47Kayuka ti wunde Yesu wa ku Nadzareti wuri mu kuluta, nde wabeke mu kufula misaakulu na kuleele ti: «Yesu mwaana Davidi, bakila me ngebe.» 48Baatu balaka bamuŋaŋana mpisi kawura; ngo nde wahamisa kufula misaakulu ti: «Yesu mwaana Davidi, bakila me ngebe.» 49Yesu katelemaa, leeriri ti: «Muteele mbila.» Na bo bateele wafwa miisu mbila, bamuleele ti: «Lwaata kibakala, teleme, nde wukuteele mbila.» 50Bartimayi kaloosa kiyuungu kyaandi, telemini mu nkaaka na weensi kuri Yesu. 51Yesu wamufuula ti: «Nki tiiri ti me nsa mu ye?» Wafwa miisu wabvutula kuri nde ti: «Muyikisi, me ntiiri kumono.» 52Yesu waleele kuri nde ti: «Yende, kanyi dyaaku dikubvuukisiri.» Hanaho, nde wamono, na wabeke kwenama Yesu mu nzila.
Currently Selected:
Mal 10: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.