Roma ma 15

Bole me nee Kris koo pul

1Nee ge pool ma ɗe, a kwaɗa go nee ḭ naa ge taŋgay ma. Nee ɓyare kaŋ ge ke nee sḛ tuli ma to. 2Ndu ge daage ne nee buwal zi na ke kaŋ ge kwaɗa ge ne mbya ke na kon sḛ tuli, ne sinna digi pe. 3Ago Kris be ɓyare kaŋ ge ke na sḛ tuli pe to, amma ne a ne njaŋge go: «Sáso ge naa ge a ne ka sal mbi ma ne a dé mbi pal#Kmb 69:10..» 4Ago kaŋ ge ne njaŋge zaŋgal ma pet, a njaŋge nama da ne hate nee pe, ne da pe wan ta, ne iyal laar ge maktub mbe ma ne hon nee na nama e nee kat ne jobreya. 5Dok na ge ne e aŋ wan ta, ge ne hon aŋ laar iyalla, na ho̰ aŋ dwatɗa ge kat dagre ɗu dimma ne Kris Jeso go, 6ne da pe, ne dulwak ɗu, wak dagre ɗu, aŋ uware Dok, ne Bageyal Jeso Kris Bá.

Ame ta Kris zi

7Ne da pe no ɗe, ame me ta dimma ne Kris ne ame aŋ go, ne hormo ge Dok ne pe. 8Ago mbi jan go, Kris saŋge tene mo̰r ne naa ge vyan ba̰y ma pe ne fareba ge Dok ne pe, ndwara wi wak tuli ge Dok ne ke bá ma ta wak. 9Amma naa ge pe ɗogle ma a uware Dok da ne kwa a̰se ge na ne pe, dimma ne a ne njaŋge go:

«Ne pe no, mbi mbo uware mo pehir ge ɗogle ma buwal zi,

Mbi mbo siya̰le mo dḭl.»#Kmb 18:50, 2Sam 22:50.

10Jya̰ go uwale:

«Pehir ge ɗogle ma, ke me laar saal poseya ne na naa ma#Dwa 32:43..»

11Uwale:

«Pehir ma pet, uware me Bageyal,

ya̰ pehir ma pet komre na#Kmb 117:1.!»

12Isaya jya̰ go uwale:

«Pehir ge Isay ne mbo mbo ya,

mbo ɗage digi ndwara ke muluk pehir ge ɗogle ma pal.

Pehir ge ɗogle ma mbo e bama jobreya na pal#Isa 11:10..»

13Dok ge ne e naa jobreya, na wi aŋ ne laar saal ne halas hon fareba zi, ne da pe aŋ ka ne jobreya gḛ pool ge O̰yom ge mbegeya ne zi.

Temel kerra ge Bulus ne pehir ge ɗogle ma ta

14Mbi ná vya ma, mbi da ne kwarra tyatyat go, aŋ da ne dwatɗa ge kwaɗa ma, ne kwarra mbyatɗa ge ndwara hate ta ta buwal zi. 15Amma, swaga a̰me ma zi, mbi á tene njaŋge aŋ kaŋ ndwara vot aŋ pala ne bobo ge Dok ne ho̰ mbi pe, 16ne da pe mbi ka bage temel ge Kris Jeso ne ne pehir ge ɗogle ma pe. Mbi mbegeya ne fare ge kwaɗa ge Dok ne pe oyya, ndwara zwal pehir ge ɗogle ma ya nama saŋge tuwaleya ge ke Dok sḛ tuli, kaŋ mbegeya ne O̰yom ge mbegeya ta. 17Mbi da ne pool uware tene Kris Jeso zi, ne temel ge mbi ne ke hon Dok pe. 18Ago kadɗa mbi da ne fare a̰me ge janna, a jan fare ge Kris ne ke na ne mbi ta, ndwara zwal pehir ge ɗogle ma ya, ne fare janna ge mbi ne ma ne kaŋ kerra ge mbi ne ma ta, ne da pe nama gwa̰ ne nama pala Dok pe se, 19ne pool ge kaŋ ŋgayya ma ne kaŋ ajab ma ta, ne pool O̰yom ne ta me. Go no, mbi oy fare ge kwaɗa ge Kris swaga ma go pet, ne Ursalima ya tek ɗiŋ det ya suwal Illiri go. 20Amma, mbi ɓyare go mbi oy fare ge kwaɗa ge Kris ne ɗeŋgo ge swaga ge naa ne za̰ na fare to go, ne da pe mbi sḭ ge pe dolla ge ndu ge ɗogle ne pal to. 21Amma, dimma ne a ne njaŋge go:

«Nama ge a ne waage nama na fare to ma a mbo kwa na,

nama ge a ne zá̰ na fare to ma, a mbo wan na pe#Isa 52:15..»

Bulus waage nama na dwatɗa ge mbo Roma

22No a kaŋ ge ne tele mbi be ge mbo aŋ ta ya ne. 23Ne se no, ne jo̰ fare a̰me ge gwan wan mbi pala suwal mbe ma no go to ɗe, ne jo̰ del ma gḛ mbi da ne ene ge mbo aŋ ta ya, 24swaga ge mbi ne mbo ɗage mbo suwal Espaniya, mbi dwat go mbi mbo kan mbi koo aŋ ta nee ba kwa ta ndwara, ndwara ɓol mbarra ne aŋ ta ge mbar mbi mbo suwal mbe ya, go no mbi mbo kat ne laar saal swaga ge nee ne mbo kwa ta ya.

25Se no mbi mbo Ursalima, ndwara mbo mbar naa ge mbegeya ge ne suwal mbe ya ma. 26Ago naa ge ne suwal Makedoniya go ma ne naa ge ne suwal Akaya go ma a sya kaŋ ndwara mbar naa ge a̰se ge ne naa ge mbegeya ma buwal zi ge ne suwal Ursalima go ma. 27A vḭ ta ke go no, ago nama sḛ ma mbya ke go mbe no. Kadɗa pehir ge ɗogle ma ɓo kwaɗa ge Dok ne ma da ne nama ta ɗe, ago nama sḛ ma ho̰ nama bama kaŋ kwaɗa ma me. 28Swaga ge mbi ne mbo á temel mbe ya, mbi hon nama nama kaŋ tyare mbe, mbi mbo kale aŋ pal ndwara mbo suwal Espaniya. 29Mbi kwa kwa go, swaga ge mbi ne mbo detɗa aŋ ta ya, mbi mbo gene aŋ ya wak busu ge daage pet ge Kris ne.

30Ná vya ma, mbi kaɗe aŋ dḭl ge nee Bageyal Jeso Kris ne zi, ne laar wanna ge O̰yom ne, aŋ ke kyarga poseya ne mbi kaɗeya zi, ne mbi pe Dok ndwara se, 31ne da pe mbi ɓu uzi ne naa ge hon fareba to ge ne suwal Yahudiya diŋ ma tok go, bobo ge mbi ne gene na mbo hon naa ge Ursalima ma, naa ge mbegeya ma ame na ne sḛ tuli. 32Go no mbi ba mbo aŋ ta ya ne laar saal, kadɗa Dok vin ya, go no mbi ba ɗigli tene aŋ ta swak. 33Dok ge halas na ka poseya ne aŋ pet. Ago!

Currently Selected:

Roma ma 15: FGN2013

Highlight

Copy

Compare