Roma ma 13

Pala gwanna naa ge ne suwal pal ma pe se

(1Bit 2:13-17)

1Ndu ge daage na gwa̰ ne na pala naa ge ne suwal pal ma pe se. Ago naa ge ne suwal pal ma pet a mbo da ne Dok ta ya, nama ge ne go ma, a Dok é nama ne. 2Bage ne pili tene ne naa ge ne suwal pal ma ke ho̰l da ne eya ge Dok ne. Naa ge ne pili ta ma zwal ya sarya bama pal. 3Ago kadɗa ndu ke kaŋ ge ne na viya̰ go, ne pool ge sya naa ga̰l ma vo to, amma a swaga ge ne ke kaŋ ge ne na viya̰ go to go. Mo ɓyare sya naa ge ne suwal pal ma vo to’a? Ke kaŋ ge ne na viya̰ go, mo ba ɓol doreya, 4ago na sḛ ke temel mo̰r ge Dok ne ndwara e mo ker kaŋ ge kwaɗa. Amma kadɗa mo ke kaŋ ge sone, sya nama vo. Ago pool ge nama ne ge mḛre naa a be baŋ yak to. Swaga mḛre naa go, a ke temel ge Dok ne ndwara ŋgay pore ge na ne ge naa ge ne ke fare ge sone ma ta. 5Ne da pe no ɗe, a ɗeŋger ge ndu gwan ne na pala se, a be ne sya mḛreya ge nama ne vo pe ɗeŋgo to, amma ne fare ge mo dulwak ne ŋgay mo kerra pe.

6Da ne pe no uwale aŋ tyare kaŋ ma no, ago naa ge ne ame kaŋ tyareya ma a Dok é nama ne, ne da pe nama ke temel mbe ne na viya̰ go#Mat 22:21, Mar 12:17, Luk 20:25.. 7Ho̰ me ndu ge daage kaŋ ge na sḛ ne mbya ɓolla: kaŋ tyareya ndu ge ne mbya ame kaŋ tyareya, kaŋ syalla ndu ge ne mbya ame kaŋ syalla, vo ndu ge ne mbya a sya na vo, hormo ndu ge ne mbya a hon na hormo.

Laar wanna wi eya ma wak

(Mat 22:35-40, 1Yoh 3:11-23)

8Ká me ne wul a̰me aŋ pal to, ɗeŋgo aŋ laar wa̰ ta, ago laar wanna wi eya ma wak. 9Wak honna ma no: «Mo gale ke zina ɓaca, mo gale hun siya ɓaca, mo gale ke syala ɓaca, mo gale ke ene ɓaca.» Wak honna ge may ma pet nama pala vwa ya fare mbe no zi: «Mo laar wa̰ mo kon dimma ne mo sḛ go#Wat 20:13-17, Dwa 5:17-21, Lev 19:18..» 10Ndu ge ne laar wanna ke na kon sone to. Laar wanna wi eya ma wak.

Ká me jejew da̰re dam gwanna ge Kris ne ya

11Ne jo̰ aŋ kwa swaga ge nee ne dé ya go no kwa ɗe, swaga mbyat ya go ge aŋ kore ne dam se digi, ago swaga ge nee ne ho̰ fareba go máya ka kaal, ne se no, ndar ja aŋ ta zi gwa. 12Ɗaal ya̰ɗe ya zḛ, swaga ko̰yya ga gwa. Fage me kaŋ kerra ge tṵ ne ma uzi, kage me kaŋ pore ge kwaya̰l ne ma aŋ ta. 13Ke me nee mborra ge jwap, dimma ne naa ne mbo kwaya̰l go go. Ya̰ me nee vagal kerra uzi, ne fereya ma, ne zina ma, ne voɗom ma, ne gool ma, ne yil ma uzi. 14Amma aŋ kage me Bageyal Jeso-Kris aŋ ta, ya̰ me ta duur pe go ndwara ke laar ɓyare ge duur ne to bat.

Currently Selected:

Roma ma 13: FGN2013

Highlight

Copy

Compare