Roma ma 11
11
Dok be dol Israyela uzi to
1Mbi ele go, Dok dó na naa ma uzi ɗaa? A go to bat! Ago mbi sḛ, mbi Israyela ne, hir ge Abraham ne, ne vuwal pe ge Bayami ne. 2Dok be dol na naa, nama ge na ne kwa nama zaŋgal ma uzi to. Aŋ wan fare ge maktub ne jya̰ swaga ge Iliya ne ka kaŋge Israyela vya ma Dok ndwara se pe to’a? 3Jya̰ go: «Bageyal, a hun mo anabi ma swaga, a gul mo twal tuwaleya ya se, mbi gá myalam ɗu kikit, a ɓyare gwan hun mbi.» 4Amma Dok gwa̰ ne na janna gyana ɗaa? «Mbi koy naa ya go dudubu ɓyalar ne mbi pe, nama ge a ne gū bama koo sḭḭm Baal ndwara se to ma#1Gan 19:10, 18..» 5Go no uwale, ma̰ no puy, Dok koy naa ya go mbut ge na ne tá nama kwa a̰se ge na ne zi. 6Kadɗa na kwa a̰se zi ɗe, a be ne temel kerra ta to. Te go to, kwa a̰se ge Dok ne a be kwa a̰se ne to. 7Na pe wanna gyana ɗaa? Kaŋ ge Israyela ne ɓyare na, be ɓol na to, a nama ge talla ma ɓo na ne. Ge may ma dulwak togre no me 8dimma ne a ne njaŋge go:
«Dok ho̰ nama o̰yom ge be wan fare pe,
ne ndwara fa̰ ge be kwa swaga to ma,
ne togor ge be za̰ fare to ma ɗiŋ ma̰ no#Dwa 29:3, Isa 6:10, 29:10..»
9Dawda jya̰ go uwale:
«Nama kaŋzam ka faɗe ne nama pe, ne boy,
ne kaŋ syal koo, na ka potɗa ge nama ne.
10Nama ndwara ma dame, nama gwan kwa swaga to,
é nama goŋ ma ka halla ɗaɗak#Kmb 69:23-24..»
11Mbi ele go, koo syalla ge nama ne mbe a ɗiŋnedin ɗaa? A go to bat! Amma da ne ya̰l ge nama ne ta, pehir ge ɗogle ma ɓo máya no, ne da pe yil ge nama ne twa̰se digi. 12Kadɗa ya̰l ge nama ne é dunya ɓol wak busu ge Dok ne, detɗa ge nama ne é pehir ge ɗogle ma ɓol wak busu ge Dok ne ɗe, gwanna ge nama ya mwaɗak e naa ɓol wak busu ma̰ gyana ga ɗaa?
13Mbi jan fare da ne aŋ pehir ge ɗogle ma: Ne jo̰ mbi bage temeya ge pehir ge ɗogle ma ne ɗe, mbi da ne laar saal ne temel ge a ne ho̰ mbi pe. 14Ne da pe, kadɗa day ya, mbi twa̰se yil ge mbi hir ma ne digi ndwara má a̰me ma mbut. 15Ago kadɗa caɗeya uzi ge nama ne ɓa̰ dunya ba̰a̰n ne Dok ɗe, swaga ge a ne mbo gwan ne nama ja zi ɗe, mbo kat dḛ gyana ɗaa? Mbo kat tanna ne siya se mbo ya ndwara zi.
16Kadɗa kaŋ wak ge zḛ ge a mbegeya ne Dok pe ɗe, kaŋ mbe sḛ mwaɗak a ge Dok ne ne. Kadɗa uwara too a mbegeya ne Dok pe ɗe, na tok ma mwaɗak a ge Dok ne ne me. 17Amma kadɗa a fete na tok a̰me ma uzi, mo, uwara olive ge ful zi ge, a mbo ya tat mo nama byalam go no ndwara ɓol uwara pam ge ne ɗage ne too se ya. 18Ne pe no ɗe, kaage mo uware tene ge uwara tok ge a ne kṵ nama uzi ma pal to. Kadɗa mo uware tene ɗe, kwa go, a be mo in too ne to, amma a too in mo ne. 19Mo da ne pool jan go: «A fete uwara tok ma uzi, a tá mbi nama byalam go no.» 20A fareba. A fete nama uzi da ne hon fareba to ge nama ne pe, mo ɗe, da ne hon fareba ge mo ne pe mo gá ne go no. Uware tene to, sya vo zo. 21Ago kadɗa Dok be wan tene uwara tok ge ne gá gar ma ta to ɗe, wan tene mo ta to me. 22Ndi kwaɗa kerra ne hal ge ndaar ge Dok ne gale: a ndaar ge nama ge ne dé ma ta, ŋgay kwaɗa kerra ge na ne mo ta. A kwaɗa go, mo ke mborra kwaɗa kerra ge na ne mbe zi, kadɗa to, da ne pool ge fete mo uzi me. 23Nama sḛ ma ɗe, kadɗa a ya̰ hon fareba to ge bama ne ya, a da ne pool gwan ne nama ya, ago Dok da ne pool gwan tat nama uwale. 24Ago kadɗa a fete mo da ne uwara olive ge ful zi ge ta ya, a mbo ya tat mo uwara olive ge garra ta no ɗe, ke ma̰ gyana nama ge uwara tok ge garra ma a ba ban be ge tat nama bama ná ta to ɗaa?
Máya ge Israyela ma ne
25Ná vya ma, mbi ɓyare go aŋ ka dale fare ɗimil mbe no pal to, ne da pe na kaage aŋ ndi ta naa ge zwama ma to: Ago Israyela vya ma mbut nama dulwak mbo kat togreya ɗiŋ pehir ge ɗogle ma pet a det ya máya go. 26Go no Israyela vya ma pet a mbo má, dimma ne a ne njaŋge go:
Bage zurra mbo mbo ne Siyona ya,
mbo cigi ya̰l ge Yakub vya ma ne uzi#Isa 59:20-21, 27:9..
27No a wak tuli ge mbi ne mbo ke ne nama ne,
swaga ge mbi ne mbo ndage nama sone ma ya uzi go.
28Ne fare ge kwaɗa pe, a ho̰l ne Dok, ne aŋ pe. Amma ne talla ge Dok ne ta, Dok laar wa̰ nama wan ne nama bá ma pe. 29Ago bobo ge Dok ne, ne tolla ge Dok ne er to. 30Zaŋgal, aŋ be gwan ne aŋ pala Dok pe se to, amma ne se no, aŋ ɓol kwa a̰se ge Dok ne ya go, ne pala gwanna se to ge Yuda ma ne pe. 31Uwale, ne se no, a be gwan ne bama pala Dok pe se to, ne da pe aŋ ɓo kwa a̰se ge Dok ne, ne se no, nama sḛ ma me, nama ɓo kwa a̰se ge Dok ne me. 32Ago Dok é naa dasana ma pet gwan ne bama pala na pe se to, ne da pe na ŋgay nama pet kwa a̰se ge na ne.
33Kwaɗa kerra ge Dok ne ma ɓaŋlaŋ!
Zwama ne kwarra ge Dok ne ma ɗugul!
A wuɗi wan na sarya kunna ma pe ne ɗaa?
A wuɗi wan na kaŋ kerra ma pe ne ɗaa#Isa 55:8, Kmb 139:6,17-18.?
34«A wuɗi day hale dwatɗa ge Bageyal ne pe ne ɗaa?
A wuɗi na bage yuwaleya ne ɗaa?
35A wuɗi é pe hon na kaŋ ne ɗe,
na sḛ ba gwan ne na byalam go ɗaa#Isa 40:13, Ayu 41:3.?»
36Kaŋ ma pet a da ne na ta ya,
a da ne na ta, a na ne ma ne.
Uwareya hon Dok ɗiŋnedin! Ago!
Currently Selected:
Roma ma 11: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
