Kaŋ mballa ma 135
135
Bage ɗiŋnedin kwaɗa
1Halleluya!
Uware me Bage ɗiŋnedin dḭl,
Bage ɗiŋnedin dore ma, uware me na,
2aŋ ge ne mḛ́ ne zok ge Bage ɗiŋnedin ne zi ma,
aŋ ge ne mḛ́ ne zok ge Bage ɗiŋnedin ne yapul go ma,
3uware me Bage ɗiŋnedin,
ago Bage ɗiŋnedin kwaɗa,
siya̰le me na ne na dḭl, ago na sḛ siŋli!
4Bage ɗiŋnedin tá Yakub ne na sḛ pe,
tá Israyela na ka na kaŋ joo.
5Mbi kwa kwa go Bage ɗiŋnedin ga̰l,
nee Bageyal waɗe dok ma waɗe pet.
6kaŋ ge daage pet ge na sḛ ne ɓyare, ke na ke,
digi zi ya, ko suwar se, ko mam se, ko mam ma pe se.
7Her pḭr ne suwar pe ge ndegɗe ya,
ka e mam serra, ka swar mam ya se,
ka mbugi saam ne na swaga woyya zi ya zum.
8A na hṵ Masar ma vya pul soy ma ne,
diŋ det ya kavaar ma vya pul kale ma go#Wat 12:29..
9Suwal Masar go, a na teme kaŋ ge ajab ma ne kaŋ ŋgayya ma ya
Faraon ma ne na dore ma pet pal ne#Wat 7:8—14:31..
10A na há pehir ge ɗogle ma gḛ ne,
hṵ gan ge pool gḛ ma no me,
11Sihon, gan ge Amoriya ma ne,
ne Og gan ge suwal Basan ne,
ne gan ma ge suwal Kanan ne ma pet#Isi 21:21-35..
12Ho̰ na ɓase ma, Israyela vya ma, nama suwal joo no,
na gá nama joo dedet.
13Bage ɗiŋnedin, mo dḭl pateya ɗiŋnedin!
Bage ɗiŋnedin, mo mbya naa ka dwat mo pal doŋ pe ma ne doŋ pe ma!
14Bage ɗiŋnedin, mo mbo gele mo ɓase ma,
mo mbo sya mo dore ma ko̰r.
15Kaŋ sḭḭm ge pehir ge ɗogle ma ne ma fool kaal ma ne dinar ne baŋ,
kaŋ ge naa dasana ma ne ke nama ne bama tok zi ma ne baŋ#115:4-8, Daa 9:20..
16A da ne wak ma, amma a jan fare to,
a da ne ndwara ma, amma a ndil swaga to,
17a da ne togor ma, amma a za̰ fare to,
a ne o̰yom ne bama zi to.
18Ya̰ naa ge a ne ke nama, di nama,
poseya ne naa ge a ne kan bama saareya nama pal ma.
19Pehir ge Israyela ne ma, uware me Bage ɗiŋnedin,
pehir ge Aaron ne ma, uware me Bage ɗiŋnedin#115:10, 118:2-4.!
20Pehir ge Levi ne ma, uware me Bage ɗiŋnedin,
aŋ ge ne sya Bage ɗiŋnedin vo ma, uware me Bage ɗiŋnedin!
21Ne Siyona ya, Bage ɗiŋnedin dḭl ɓo uwareya,
na ge ne ka ne Ursalima go!
Halleluya!
Currently Selected:
Kaŋ mballa ma 135: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
