Fare sḭ ma 26
26
1Hormo ge a ne hon ndu ge dale
a dimma ne iyalam ge ne ke gyala pul go go, ko ne mam ge ne swar swaga siyal go go.
2Dimma ne njoole ne má tene go,
ko dimma ne marjojway ne ɗage ne digi go,
go no me, kaŋ tolla ge baŋ yak wan ndu to.
3Bol da ne kwara pe, arjam da ne tisi pe,
calaŋ da ne ndu ge dale pe.
4Gwa̰ ne ndu ge daal fare na dale pal to,
na kaage mo di na to.
5Gwa̰ ne ndu daal fare janna na daal pal,
ne da pe na ndi tene go na zwama to.
6Ndu ge ne dol ndu ge birtiŋ mbo na temel
a dimma ne na ne kṵ na koo ma uzi go,
hon tene yál ge ɓaŋlaŋ.
7Fare sḭ ge ndu ge dale ne jan na a iyalam lapcak
dimma ne ndu ge looɗol koo ma go.
8Uware ndu ge dale a dimma ne mo ne vwa ŋgoo taal fyage ŋgoo ta go.
9Kore wanna ge ndu ge fereya tok zi,
a dimma ca ne fare sḭ ge ndu ge dale wak zi go.
10Ndu ge ne wan dale, ko ndu ge ne kale ne viya̰ go ke na temel
a dimma ca ne ga̰l ge ne vḛne naa laar go#26:10 Varseya mbe no na pe wanna haŋle, ga̰l mbe no da ne pool kat bage mbal kajamle..
11Dimma ne gú ne gwan mbo ɗar na kuur go,
ndu ge daal gwan na fare kerra ge dale ma pal#2Bit 2:22..
12Kadɗa mo ɓol ndu ge ne ndil tene go na zwama ya,
daal golgo waɗe na.
Dir ge ndu ge uwal ne
13Uwal jan go: «Kavaar ga̰l ya viya̰ go,
sonne ya viya̰ zum#22:13.!»
14Zok wak saŋge ya na charniyer pal,
uwal viŋgri ya na saŋgal pul go.
15Uwal par na tok kaŋzam pal,
ndil na yál ge gwan ne na ya na wak zi#19:24..
16Uwal ndil tene zwama waɗe naa ɓyalar ge ne gwan ne fare janna ɗalla ma.
17Ndu ge ne gandale gool zi ya, be ge kat na fare to,
a dimma ne ndu ge ne wan gú se ne na togor ma go.
18Ndu ge ne ke tene dale ka kan uwara wak ol ma, ne kajamle ma, ne kaŋ ge hun naa ma na ziyar go.
19ndu ge ne lase na kon, ka janna go: «Mbi ke biyal baŋ», a go no ca.
20Swaga ge uwara ne kat to ol piripiri,
swaga ge naa ge or naa ma ne kat to, gool kat to.
21Yet mbar ol wak yeŋgel digi, uwara mbar ol digi,
ndu ge na laar ne wa̰ gool tol gool.
22Ndu ge or naa fare janna ma da ne kaŋzam ge tuli go,
det ɗiŋ mbo dulwak zi.
23Naa ge wak tuli ge dulwak sone ma,
a dimma ne il ge ne so̰me se ne fool kaal go.
24Ndu ge ne wan naa na laar zi boge naa na fare janna ma zi,
woy son ya na dulwak zi.
25Kadɗa na jan fare ne ka̰l tuli puy ɗe,
ho̰ fareba na fare janna ma pal to
ago woy dwatɗa ge seŋgre kakatak ma ya na zi.
26Da ne pool lar kwaneya ge na ne pala,
amma dulwak sone ge na ne mbo dyan naa ndwara go pet.
27Bage ne al tuul, mbo det na tuul se,
bage ne viŋgri njal, njal mbo det na pal.
28Ndu ge ne kun hale kwane naa ge na ne ke nama yál ma kwane,
wak tuli gene ya burmiya.
Currently Selected:
Fare sḭ ma 26: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
