Fare sḭ ma 10
10
Fare sḭ ma ne katɗa ge dunya ne pe
1Fare sḭ ma ge Salomon ne.
Vya ge zwama hon na bá laar saal,
Vya ge dale hon na ná laar pisil.
2Kaŋ ɓolla ge ne na viya̰ go to mbar ndu to,
a dosol kerra má ndu ne siya zi ne.
3Bage ɗiŋnedin yá̰ ndu ge dosol ke kyamal to,
amma kuri naa ge sone ma ne kaŋ ge nama laar ne ɓyare na kuri.
4Tok ge iyalam lapcak gwan tene a̰se,
tok ge ne ke temel hat tene gan.
5Bage ne kote siyal digi somor, a vya ge zwama ne.
Bage ne fí dam siyal go, a vya ge ne hon saaso ne.
6Ndu ge dosol ɓol wak busu
ndu ge sone wak jan fare tele.
7Ndu ge dosol ya̰ fare ge kwaɗa naa pala zi,
ndu ge sone dḭl ban ne naa pala zi uzi.
8Ndu ge zwama ame wak honna ma ame,
amma ndu ge ne sot na wak se yayak ban tene uzi.
9Ndu ge ne mbo viya̰ ɗeŋger pal, kat halas
amma ndu ge ne mbo viya̰ waal gwagwaraŋ mbo ɓol mḛreya.
10Ndu ge ne kyat swaga ke na kaam yál
amma ndu ge ne sot na wak se yayak ban tene uzi#10:10 Ge maktub ge may ma zi varseya mbe njaŋge go: «Ndu ge ne mḛre na kon fareba pal gene ya swaga katɗa ge halas.».
11Ndu ge dosol fare janna a mam ge ɗermel ne,
ndu ge sone wak jan fare tele#12:23, 3:18..
12Kwaneya tol gool
laar wanna lar sone pala#Yak 5:20, 1Bit 4:8..
13Naa ɓol zwama ya ndu ge ɗalla wak zi,
amma ndu ge daal goŋ ɓol calaŋ ne.
14Ndu ge zwama woy na kwarra ma woy,
amma ndu ge ne sot na wak se yayak ban uzi avun cap.
15Kaŋ ɓolla ge ndu ge gan ne a na gulum ga̰l ne,
woɗegeya ge ndu ge a̰se ne e na burmiya ne.
16Kaŋ ɓolla ge ndu ge dosol ne wal na wal,
amma kaŋ ɓolla ge ndu ge sone ne e na wat sone zi.
17Ndu ge ne koy yuwaleya ke ndwara,
ndu ge ne kuri mḛreya ban tene.
18Ndu ge ne lar na huur pala, a ndu ge mbuɗi naa ne,
ndu ge ne sot na wak se jan fare yayak a ndu ge daal ne.
19Wak ge ne far gḛ woɗege be ke sone to to,
amma ndu ge ne koy na wak a ndu ge ɗalla ne.
20Fare janna ge ndu ge dosol ne a fool kaal ge siŋli ne,
dulwak ge ndu ge sone ne hamba to.
21Fare janna ge naa ge dosol ma ne má naa gḛ
fare kwarra to ge naa ge dale ma ne gene nama siya zi.
22A wak busu ge Bage ɗiŋnedin ne hat ndu gan ne,
njoyya ge ndu dasana ne ke na a̰me to.
23Ker sone a kaŋ vḛso ne ndu ge dale ta,
go no me, ɓyare zwama a kaŋ vḛso ne ndu ge ɗalla ta.
24Kaŋ ge ndu ge sone ne sya na vo, a na det ya na pal ne,
kaŋ ge ndu ge dosol ne ɓyare na, a hon na nà hon.
25Swaga ge saam labreya ne kale, ndu ge sone mḛ to,
Amma ndu ge dosol pe kat mḛya digi ɗiŋnedin.
26Dimma ne kaŋ ge ka̰mul ne siya̰le kiya̰r go, ko ol-swama ne yaage ndwara pul go,
ndu ge ne teme ndu ge uwal za̰ yál go no me.
27Sya Bage ɗiŋnedin vo, dol dam zḛ,
naa ge sone ma taal pe kun digi#Kmb 73, Bag 8:12-13..
28Jobreya ge naa ge dosol ma ne a laar saal,
jobreya ge naa ge sone ma ne jyat baŋ.
29Bage ɗiŋnedin koy naa ge ɗeŋger ma na tok zi cemet,
amma burmi naa ge ya̰l ma pe uzi.
30Ndu ge dosol det to bat,
naa ge sone ma kat suwar pal to bat.
31Ndu ge dosol wak jan fare ge zwama,
ɗel ge kan bale a fete na uzi.
32Fare janna ge ndu ge dosol ne ke naa sḛ tuli,
fare janna ge naa ge sone ma ne a bogeya ne baŋ.
Currently Selected:
Fare sḭ ma 10: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
