Mika 6
6
Bage ɗiŋnedin kaŋge na ɓase ma
1Za̰ me fare ge Bage ɗiŋnedin ne jan:
Ɗage digi, mbo kaŋgeya njal ma ta,
mbo hon nama mbi dwatɗa ma ne ka̰l ndaar.
2Njal ma, za̰ me kaŋgeya ge Bage ɗiŋnedin ne,
Aŋ ge be saaseya to ma, ge suwar pe ne dó ne aŋ pal ma,
za̰ me kaŋgeya ge Bage ɗiŋnedin ne kaŋge naa ma
Bage ɗiŋnedin ele Israyela fare.
3Mbi naa ma, mbi ke aŋ da ɗaa?
Mbi lwage aŋ da ne da ɗaa?
Gwa̰ me mbi vinna.
4Ne mbi ne ndage aŋ ne suwal Masar diŋ ya zum pe’a?
Ne mbi ne zu aŋ ne mo̰r zi ya pe’a?
Ne mbi ne é Musa, Aaron ne Maryam aŋ ndwara zḛ ɗame aŋ pe’a#Wat 15:20-21.?
5Mbi naa ma, dwa me
ne kaŋ ge Balak, gan ge Mowab ma ne ne ɓyare ke aŋ,
ne fare ge Balaam ge Beyor vya ne gwa̰ ne na janna.
Ne Chittim ya ɗiŋ mbo ya Gilgal go,
Go no, kwa me kaŋ ajab ge mbi, Bage ɗiŋnedin,
mbi ne ke ne aŋ pe ma#Isi 22—24..
Kaŋ ge Bage ɗiŋnedin ne ɓyare ne naa dasana ma ta
6Mbi mbo Bage ɗiŋnedin ndwara se ya da ne da ɗaa?
Mbi mbo cwage Dok ge ne digi digi zi ya ndwara se da ne da ɗaa?
Mbi mbo na ndwara se ya da ne tuwaleya ge tilla uzi ma ɗaa?
Ko ne nday vya ge del ɗu ma ɗaa?
7Bage ɗiŋnedin ɓyare tame ma dubu ɗaa?
Ko num ma zuliya ceɗed ɗaa?
Mbi tyare na mbi vya pul soy ne sone ge mbi ne ma pe ɗaa?
Mbi tyare na mbi vya ge tolla ne mbi sone ma pe ɗaa?
8O ndu dasana, a ŋgay mo kaŋ ge kwaɗa,
Bage ɗiŋnedin ɓyare ma kaŋ ne mo ta ɗaa?
Ɓyare ɗeŋgo go mo ke kaŋ ge jwap,
mo laar wa̰ kwa a̰se,
mo ka ke mborra Dok ge mo ne pe go suul zi cwacwagat.
Naa ge mbuɗi naa ndwara ma ne naa ge ke fare tele ma
9Bage ɗiŋnedin ndage na ka̰l digi jan fare suwal pal,
mbo má ɗeŋgo nama ge ne sya na dḭl vo ma.
Pehir ge Yuda ne, aŋ ge ne kote ma, za̰ me.
10Naa ge sone ma, mbi mbo ka wan tene baba,
ne aŋ kaŋ ɓolla ge ne na viya̰ go to mbe ma no pe,
ne aŋ kaŋ ŋgay kaŋ ma ge ne na viya̰ go to mbe ma no pe ɗaa?
Kaŋ ma ge mbi ne vḛne mbi wak ne nama pal.
11Mbi mbo kat be mḛre
bage ne kaŋ ŋgay kaŋ ge ne na viya̰ go to,
ko bage ge ne kaŋ ŋgay kaŋ dṵṵl ma
ge ne na viya̰ go to na galam zi ɗaa?
12Naa ge tok pool ge ne suwal mbe diŋ ma ke fare tele,
naa ge ne suwal mbe diŋ ma jan fare ge hale ma,
a ndage fare ge lase naa janna ne bama wak zi ɗeŋgo.
13Ne pe no, mbi mbo mḛre aŋ ɗiŋ mbi dol aŋ moy,
Mbi mbo burmi aŋ uzi, ne sone ge aŋ ne ma pe.
14Aŋ mbo zam kaŋzam, amma aŋ mbo huri to,
aŋ mbo gá ne kyamal.
Kaŋ ge aŋ ne mbo é nama ya koyya digi ma,
aŋ mbo mbyat koy nama to bat,
mbi mbo é pore zam nama.
15Aŋ mbo zare kaŋ suwar zi, aŋ mbo syat na to bat,
aŋ mbo wan uwara olive num, aŋ mbo ɓol na num ge naŋge ta to bat.
Aŋ mbo ɓerse oyo̰r, aŋ mbo ɓol na jiya̰l njotɗa to bat.
16Aŋ bole ne go kaŋ kerra ge gan Omri ne,
ne kaŋ kerra ma ge na vya Achab ma ne na yàl ne mwaɗak,
ne no pe, mbi mbo burmi aŋ suwal uzi,
mbi mbo saŋge aŋ ge ne suwal mbe diŋ ma kaŋ cotɗa,
aŋ ge mbi naa ma mwaɗak saaso mbo kan aŋ pal.
Currently Selected:
Mika 6: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
