Matta Fare pala hageya
Fare pala hageya
Maktub Fare ge kwaɗa ne Matta wak zi naa pet a vḭ go na Matta, ge bage ame hateya ge Jeso ne (10:3), na ge a ne tol na Levi (Mar 2:14), ge ne ka dḛ bage ame siyal, ndwara go bage ame lempo njaŋge na ne. Njaŋge na kaŋ ge del wara myanaŋgal (60) go go. Naa a̰me ma jan go maktub mbe njaŋge del wara ɓyalar (70) go, ge may ma del wara tiimal (80) go me.
Matta njaŋge na maktub hon Yuda ma ge ne ame fare ge Jeso ne ma. Ago nama sḛ ma kwa maktub ge wak tuli ge zaŋgal ne ma kwa, da ne pe no, swaga wan nama fare pe ma go, ka isi nama fare ge ne maktub mbe ma zi, ka ŋgay nama go nama wak wi ya Jeso pal.
Ne Matta ta, Jeso Bage hateya ge kwaɗa ne, hate naa dimma ne naa ge hateya ge Yuda ma ne ma go to, amma hate naa da ne pool. Jeso bage mbegeya ne me, na ge Yuda ma ne da̰re na. Mborra ge na ne ya da ne zur nama ne Roma ma tok go pe to, amma ne má nama ne nama sone ma go pe, ne da pe nama ɓo muluk ge Dok ne ge ɗiŋnedin, na sḛ Gan ge muluk mbe ne ne.
Ne maktub ge anda ge fare ge kwaɗa ne ma buwal zi, a Fare ge kwaɗa ne Matta wak zi jya̰ fare ge Jeso ne ne tolla ge na ne go ɗiŋ mbo gwanna ge na ne mbo na Bá ta digi zi ya ne.
Ne 1:1—2:23, Matta ŋgay hir ge Jeso ne, ne tolla ge na ne, mbo ya bool ge na ne go. Swaga ŋgay na mbe no go, Matta ke kwarra go Jeso Gan ne, na Bage máya ne, na ge Dok ne ke wak tuli teme na ya ndwara má naa. Na dḭl Immanu-El ndwara go «Dok ya go poseya ne nee». Nee da ne pool varse hateya ge Jeso ne ma se pe anuwa̰y:
Hateya ge zḛ ge da ne 5—7, na ge a ne tol na hateya ge njal pala digi. Jeso hate naa katɗa dagre ba̰a̰n ne ta, ne katɗa ba̰a̰n dagre ne Dok.
Hateya ge azi 10:1-42, a wak honna ne, ne yuwaleya ne naa ge ne mbo oy fare ge kwaɗa ma pe.
Hateya ge ataa 13:1-58, Jeso hate naa fare ɗimil ge muluk ge digi zi ya ne, ne fare sḭ ma pe hini hini ɓyalar.
Hateya ge anda 18:1-35, Jeso hate naa katɗa dagre ge ná vya ma ne Dok zi.
Hateya ge anuwa̰y da ne 24—25, hate naa katɗa da̰re halla ge go̰r dab ge Dok ne.
Hateya mbe ma ndwara zḛ, ne nama go̰r go, Matta wan kaŋ ge Jeso ne ka kerra ma pe. Jeso ka zon naa ge moy ma, ka zuli katugum ma se ndwara wal naa, ka wan naa fare ma pe, a ne Yuda ma ga̰l ma ka gage ta ne fare ma.
Ne 27—28, Matta wan fare ge siya ge Jeso ne, ne tanna ge na ne, ne wak honna ge go̰r dab ge ne ho̰ na naa ge ame hateya ma, ne mborra digi ge na ne.
Jeso mbo ya na Bá ta digi zi ya, mbo gwan’a mbe go no ca, mbo ke muluk suwar pal. Jobreya ge Dok vya ma ne ya gwanna ge Jeso ne pal, swaga da̰re na go, mbya a kat dimma ne Jeso go, a ka oy na fare naa ge dunya ma ta.
Varseya ge maktub ge Matta ne
1- Pehir ne tolla ge Jeso Kris ne (1:1—2:23)
2- Temel kerra ge Yohanna bage ke naa baptisma ne (3:1-12)
3- Baptisma ne pe herra ge Jeso Kris ne (3:13—4:11)
4- Temel kerra ge Jeso ne suwal Galile go (4:12—18:35)
5- Ne suwal Galile go mbo Ursalima (19:1—20:34)
6- Yal njotɗa ne siya ge Jeso ne (21:1—27:66)
7- Tanna ne ŋgay tene ge Jeso ne (28:1-20)
Currently Selected:
Matta Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.