Matta 6
6
Hateya ne bobo kerra pe
1Ke me haŋgal, ŋgay me dosol kerra ge aŋ ne naa ndwara go, ne da pe nama kwa aŋ to, swaga ke go no, aŋ mbo ɓol tok-koyom ge aŋ Bá ge ne digi zi ya ta ya to.
2Swaga ge mo ne hon bobo kaage mo ka sun tṵ mo ndwara zḛ dimma ne naa ge mbuɗi naa ndwara ma ne ke Sinagog ma zi, ne viya̰ ma go go to, a ke na ndwara go bama ɓó uwareya ne naa dasana ma ta. Fareba, mbi jan aŋ: A ame bama tok-koyom ya go. 3Mo ɗe, swaga ge mo ne hon bobo, kaage mo ya̰ mo tok magul kwa kaŋ ge mo tok matoson ne ke to, 4ne da pe mo bobo na ka ɗimil zi. Mo Bá ge ne kwa kaŋ ge ne ɗimil zi mbo gwan ne mo na potɗa.
Hateya ne kaɗeya pe
(Luk 11:2-4)
5Uwale, swaga ge aŋ ne ke kaɗeya, ke me dimma ne naa ge mbuɗi naa ndwara ma go to. Nama laar wa̰ mḛ digi ke kaɗeya Sinagog ma zi, ne viya̰ kiya̰r ma go, ne da pe naa kwa bama. Fareba, mbi jan aŋ: A ame bama tok-koyom ya go. 6Amma mo ɗe, swaga ge mo ne ke kaɗeya, wá mo zok zi, dibi mo zok wak mo pal, kaɗe mo Bá ge ne ɗimil zi. Mo Bá ge ne kwa kaŋ ge ne ɗimil zi mbo gwan ne mo potɗa.
7Swaga ge aŋ ne ke kaɗeya, dwage me aŋ fare ma dimma ne pehir ge ɗogle ma ne ke go to. A dwat go na da ne bama fare janna ge gḛ ceɗed ta Dok ba za̰ bama. 8Ke me dimma ne nama go to. Ago aŋ Bá kwa kaŋ ge aŋ ne ɓyare kwa, tek aŋ gale ne be ge kaɗe na. 9Ndi me gyana gyana ge aŋ ba ka ke kaɗeya:
I Bá ge ne digi zi ya,
mo dḭl na ka mbegeya.
10Mo muluk na mbo ya,
kaŋ ge mo ne ɓyare a ke na dunya zi ne a ne ker na ne digi zi ya go.
11Ho̰ i kaŋzam ma̰ ge mbyat dam.
12Pore i ya̰l ma, ne i ne pore i naa ge ya̰l ma go.
13Kaage mo ya̰ i det pe herra zi to,
amma zu i ne bage sone tok go.
[Ago muluk, ne pool, ne hormo a mo ne ma ne ɗiŋnedin. A go.]#6:13 Swaga ge ne kole ne zi mbe no ne maktub ge zaŋgal ma zi to. Ndi 1Maa 29:11-13.
14Ago kadɗa aŋ pore naa nama ya̰l ge a ne ke aŋ ma ya, aŋ Bá ge ne digi zi ya mbo pore aŋ me. 15Amma kadɗa aŋ pore naa to, aŋ Bá mbo pore aŋ ya̰l ma to me.
Hateya ne asiyam kerra pe
16Swaga ge aŋ ne ke asiyam, sebe me aŋ ndwara fa̰ ma ya se dimma ne naa ge mbuɗi naa ndwara ma ne ke go to. A hun bama ndwara ya se naa kwa go bama ke asiyam. Fareba mbi jan aŋ: A ame bama tok-koyom ya go. 17Amma mo ɗe, swaga ge mo ne ke asiyam, usi mo ndwara uzi, mo kan idir mo pala digi me, 18ne da pe na kaage mo ŋgay naa go mo ke asiyam to, amma mo ŋgay mo Bá ge ne ɗimil zi ɗu kikit. Mo Bá ge ne kwa kaŋ ge ne ɗimil zi ma mbo gwan ne mo na potɗa.
Hateya ne kaŋ kwaɗa ma pe
(Luk 12:33-34)
19Kote me kaŋ ɓolla ma gḛ ne aŋ sḛ ma pe dunya zi to, swaga ge buli ma ne kaareya ne vḛne nama ne go, ko swaga ge syala ma ne hal, a ne sel ne go. 20Amma kote me aŋ kaŋ ɓolla ma digi zi ya, ge swaga ge buli ma ne kaareya ne vḛne ne go to, syala ma ne hal, a ne sel ne go to me. 21Ago swaga ge mo kaŋ ɓolla ma ne go, mo dulwak é go me.
Ndwara kwaya̰l ge duur ne
(Luk 16:13)
22Ndwara fa̰ kwaya̰l ge duur ne: Kadɗa mo ndwara fa̰ kwaɗa, mo sḛ duur mwaɗak mbo kat kwaya̰l zi. 23Amma kadɗa mo ndwara fa̰ sone, mo sḛ duur mwaɗak mbo kat tṵ zi. Kadɗa kwaya̰l ge ne mo zi tṵ ɗe, tṵ mbe mbo kat gyana ɗaa!
Naa ɓan Dok ma ne bware uwareya azi to
24Ndu ne pool ke temel mo̰r hon bageyal ma azi to. Ago na kwane ɗu, na laar wa̰ ɗu, ko na mbarge ne ge ɗu, na sen ge ɗu me. Aŋ ne pool ke temel mo̰r hon Dok, aŋ ka ke hon dok ge bware ma ne to.
E me saareya Dok pal
(Luk 12:22-31)
25Ne pe no ɗe, mbi jan aŋ go: Iigi me ta ne kaŋ ge aŋ ba mbo zamma, ko ne kaŋ ge aŋ ba mbo njotɗa ne katɗa ge aŋ ne ne ndwara pe to, ko ne aŋ ba̰r ge aŋ ba mbo kanna ma pe to. Ago katɗa ne ndwara waɗe kaŋzam waɗe to’a? Sḛ duur waɗe ba̰r ma waɗe me to’a? 26Ndi me njoole ma gale: a zare to, a syat to, a kote hal se to, amma a aŋ Bá ge ne digi zi ya wal nama ne. Aŋ te be waɗe nama waɗe to’a? 27A wuɗi ne aŋ buwal zi, ne iigiya ge na ne ta da ne pool ndiri na dam zḛ go ŋgeɗo ɗaa?
28Aŋ te iigi ta ne ba̰r pe gyana ɗaa? Ndi me sugur ma ne don ne ful zi gale, a ker temel to, a ol ba̰r to me. 29Amma mbi jan aŋ go: Ko Salomon pateya ge na ne zi pet puy, be kan ba̰r ge siŋli mbyatɗa ne a̰me ɗu ne nama buwal zi go to. 30Kadɗa Dok kan sugur ge ne kat ma̰ no, kwap a kan nama ol zi ma ba̰r mbe go ɗe, na sḛ ke ne aŋ ma̰ waɗeya to’a, naa ge ne fareba honna ŋgeɗo ma! 31Kaage aŋ iigi ta janna go: «I zam ma̰ da ɗaa? I njot ma̰ da ɗaa? Ko i kan ma̰ ma ba̰r ɗaa?» To. 32Ago kaŋ mbe ma no pet, a pehir ge ɗogle ma ɓyare nama pe lelet ne. Amma aŋ Bá ge ne digi zi ya kwa kwa go aŋ ɓyare kaŋ mbe ma no pet ɓyare me. 33Ɓyare me muluk ge Dok ne, ma ne na dosol pe gale ɓya, Dok mbo gwan hon aŋ kaŋ mbe ma no pet pal tá. 34Iigi me ta ne dam ge kwap ge pe to, ago dam ge kwap ge mbo iigi tene ne na sḛ pe. Dam ge daage mbyat tene da ne na yál.
Currently Selected:
Matta 6: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.