Matta 2
2
Naa ge kwarra ma mbo ndil Jeso
1Jeso tó Betlehem ge suwal Yahudiya go, zaman ge gan Herodus ne zi. Ndi, naa ge kwarra ma#2:1 Naa ge kwarra ma: Ne swaga mbe no go, a naa ge a ne hale fare ma pe ma ne, a ɓyare kwa fare ma pe ne guwa̰r ma ta, ko ne kaŋ ge ɗogle ma ta. A da ne pool tol nama naa ge zwama me. Ndi Dan 2:2,10. mbo ne ham ya Ursalima go, 2a jan go: «Gan ge Yuda ma ne ge a ne tó na mbe ya da ɗaa? Ago i kwa na guwa̰r ne ham ya, i mbo ya no, ne da pe i ba gúr i koo ma na ndwara se ndwara uware na.» 3Swaga ge gan Herodus ne za̰ fare mbe, iigi digi poseya ne naa ge ne Ursalima diŋ ma pet. 4Kote kep tuwaleya ma, ne naa ge njaŋgeya ge ɓase ma ne ma ya se pet, ele nama go nama ŋgay na swaga ge Kris ne tó go. 5A jan na go: «A Betlehem ge suwal Yahudiya ne go. Ndi fare ge anabi ne njaŋge no:
6‹Mo Betlehem, suwal ge Yuda ne,
mo be waɗe jyale ne Yuda suwal ma buwal zi ne to.
Ago gan a̰me mbo ndage da ne mo zi ya,
ba koy mbi ɓase Israyela vya ma›#Mik 5:1..»
7Swaga mbe go Herodus tol naa ge kwarra ma ɗimil zi jyan, nama ŋgay na swaga ge guwa̰r ne dya̰ go. 8Teme nama mbo Betlehem, jan nama go: «Mbo me hale vya mbe fare pe kwaɗa, swaga ge aŋ ne ɓol na pe ya, aŋ ba gwan’a jan mbi, ne da pe, mbi ba mbo gur mbi koo na ndwara se ndwara uware na me.» 9Swaga ge a ne za̰ fare ge gan ne, a kan ta mborra. Ndi, guwa̰r ge a ne kwa na ne ham ya mbe, ka mborra nama ndwara zḛ, ɗiŋ mbo ya mḛ ge swaga ge vya ne ka go pala digi. 10Swaga ge a ne kwa guwa̰r mbe, a ke laar saal gḛ ge be to 11A wat yadiŋ, a kwa vya poseya ne na ná Maryam, a det se, a gur bama koo ma na ndwara se ndwara uware na. A hage bama galam ma, a tyare na bobo ma: dinar, ne dukan, ne mir. 12Go̰r go, Dok waage nama kiya̰r zi go, na kaage nama gwa̰ Herodus ta ya to, a her viya̰ ge ɗogle gwan mbo bama suwal.
Yusuf ma sya mbo suwal Masar
13Swaga ge a ne gwa̰ ɗe, maleka ge Bageyal ne dyan Yusuf ta kiya̰r zi, jan na go: «Ɗage digi, wá̰ vya ma ne na ná, sya mbo suwal Masar, ka yago ɗiŋ mbi jan mo ne mbḛ, ago Herodus mbo ɓyare vya mbe pe ndwara na ba hun na.» 14Ɗaal, Yusuf ɗage digi, wan vya ma ne na ná, a mbo suwal Masar. 15Gá katɗa yago ɗiŋ Herodus su. Da ne pe no fare ge Bageyal ne jya̰ ne anabi wak zi, na wak wi no, jya̰ go: «Mbi tó mbi vya ne suwal masar ya#Hos 11:1..»
Hunna ge naa jabso ne
16Swaga ge Herodus ne kwa go naa ge kwarra ma mbuɗi na mbuɗi ɗe, na laar vḛne ge be to, teme naa mbo hun naa jabso ge sonmo ma ne kaare go mbo del azi ne suwal Betlehem ma ne na lew ma go uzi kakaɗak. Isi dam ma ge naa ge kwarra ma ne ho̰ na pal tem. 17A go no fare ge anabi Irmiya ne jya̰ wak wi no, jya̰ go:
18«A za̰ ka̰l fyaso ne laar pisil ge ɓaŋlaŋ suwal Rama diŋ,
a Rachel fyal ne na vya ma pe ne,
kuri laar iyalla, ne da pe a ne go to#Irm 31:15..»
19Swaga ge Herodus ne su, maleka ge Bageyal ne dyan tene Yusuf ta kiya̰r zi suwal Masar ya, 20jan na go: «Ɗage digi, wá̰ vya ma ne na ná, gwa̰ mbo suwal Israyela, ago nama ge a ne ka ɓyare vya hunna ma, a su go.» 21Yusuf ɗage, wan vya ma ne na ná, gwan’a suwal Israyela go. 22Amma swaga ge ne za̰ go Arkilawus zam gan ya na bá Herodus byalam go suwal Yahudiya pal ɗe, kat ne vo ge mbo yago. Dok waage na fare kiya̰r zi, abe tene mbo suwal Galile ya, 23mbo kat suwal ge a ne tol na Nazaret go. Fare mbe ma ke go no, ne da pe fare ge anabi ma ne jya̰ na wak wi. A jya̰ go: «A mbo tol na ndu ge suwal Nazaret ne.»
Currently Selected:
Matta 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.