Isaya 2
2
Pehir ma pet a mbo kan ta mbo Ursalima ya
1No a daalam ge Dok ne dya̰ na ge Isaya ge Amoz vya ta ne suwal Yuda ma ne Ursalima pe ne.
2Dam ma mbo ya go
njal ge zok ge Bage ɗiŋnedin ne ne sḭ ne na pal
mbo kat njal ma pala njeel digi ya,
mbo ke muluk njal ma pal pet.
Pehir ge ɗogle ma pet a mbo kan ta mbo na ya#Mik 4:1-3..
3Pehir ma gḛ a mbo kan ta viya̰ go mbo na ya,
a mbo ka jan ta go: «Mbo me ya,
nee mbo me njal ge Bage ɗiŋnedin ne pala digi ya,
ge zok ge Dok ge Yakub ne zi ya.
Na sḛ mbo hate nee na eya ma,
nee mbo ka mborra na koo pul go.»
Ago eya ma mbo da ne Siyona ya,
fare ge Bage ɗiŋnedin ne mbo da ne Ursalima ya.
4Na sḛ mbo kat bage kun sarya pehir ge ɗogle ma buwal zi,
mbo kat bage wan ɓase ma gḛ gool.
A mbo abe bama kasagar ma sol sa̰a̰l,
a mbo sol ŋgwaɗaŋ ma ne bama ra̰y ma me.
Suwal a̰me mbo her kasagar na kon ta to,
ndu a̰me mbo gwan kugi tene mbal pore to bat#Juw 4:10..
5Yakub vya ma, mbo me ya,
mbo me nee kwaya̰l ge Bage ɗiŋnedin ne zi.
Dam ge Bage ɗiŋnedin ne
6O Bageyal, mo saŋge Yakub vya ma,
ge mo naa ma ya mo go̰r.
Ago naa ge kuu ge ma ŋguy nama ya se
ne bama kaŋ kerra ma,
naa ge e waɗal ma zuli ya ceɗed nama buwal zi
dimma ne a ne Filistiya ma buwal zi go me.
A vwal bama wak da ne naa ge pe baŋ ma.
7Nama suwal wi da ne fool kaal ma ne dinar ma,
kaŋ kwaɗa ma zuliya bindik.
Nama suwal wi da ne tisi ma,
na pus pore ma gḛ ge be isiya.
8Nama suwal wi da ne kaŋ sḭḭm ma,
a mbo gur bama koo kaŋ ge bama ne
ke nama ne bama tok zi ma ndwara se
9Ne pe no, naa dasana ma mbo gá cwageya cugum,
saaso mbo wan nama.
Bageyal! Pore nama to.
10Sya me, mbo woy me ta njal pṵṵl ma zi,
mbu me ta suwar zi,
woy me ta ge pore juliliya ge Bage ɗiŋnedin ne ndwara zḛ,
ge serra cicim ge na ne ge ɓaŋlaŋ ndwara zḛ#Daa 6:15..
11Naa ge jegreya ma pala mbo gwan’a zi,
Naa ge pala ga̰l ma pala mbo cwage se,
dam mbe go, Bage ɗiŋnedin ɗu kikit pala mbo her digi ne.
12Ago Bage ɗiŋnedin, Bage naa ge mbal pore ma ne
mbege dam ya go ɗu ndwara gwan ne naa ge jegreya ma
ne naa ge pala ga̰l ma pala se.
13Mbo ke ho̰l ne uwara ge suwal Liban ne ge haal cat ma pet,
ne uwara Chen ge suwal Basan ne ma pet me.
14Mbo ke ho̰l ne njal ge haal cat ma pet,
ne njal ge sore busur ma pet me.
15Mbo ke ho̰l ne zok ge haal cat ma pet,
ne gulum ga̰l ge ndu ne day zon nama pala to ma pet me.
16Mbo ke ho̰l ne fak ga̰l ge suwal Tarsisa ne ma pet,
ne fak ga̰l ge siŋli ma pet me.
17Naa ge jegreya ma pala mbo gwan’a zi,
naa ge pala ga̰l ma pala mbo cwage se,
dam mbe go, Bage ɗiŋnedin ɗu kikit pala mbo her digi ne.
18Ago kaŋ sḭḭm ma pet, a mbo burmi uzi.
19Sya me, mbo woy me ta njal pṵṵl ma zi ya,
mbu me ta suwar zi,
woy me ta ge pore juliliya ge Bage ɗiŋnedin ne ndwara zḛ,
ge serra cicim ge na ne ge ɓaŋlaŋ ndwara zḛ,
swaga ge na sḛ ne mbo ɗage ja e suwar ndat vo go.
20Dam mbe go, naa mbo kan bama dok
ge bama ne ɗeere nama ne fool kaal ma ne dinar ma
ndwara gur bama koo ma nama ndwara se ma
hon fóy ma ne boboy ma.
21A mbo sya mbo woy ta njal pṵṵl ma ne njal swaga waageya ma zi
ge pore juliliya ge Bage ɗiŋnedin ne ndwara zḛ
ge serra cicim ge na ne ge ɓaŋlaŋ ndwara zḛ,
swaga ge na sḛ ne mbo ɗage ja e suwar ndat vo go.
22Ká̰ me saareya ge aŋ ne ma ndu dasana pal to,
ndwara ge na ne, a na o̰yom ge ne o̰y no baŋ
na hamba da ɗaa?
Currently Selected:
Isaya 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.