Pe eya 50
50
Siya fyalla ge Yakub ne
1Yusuf dol tene na bá pal, ka fyalla, bur na se. 2Go̰r go, Yusuf hon na naa ge ke naa jam ma wak go: «Nṵsi me mbi bá ne jam ge be hubi siya ma.» A nṵsi Israyela. 3Na nṵsiya her dam wara anda. No a dam ma ge ne mbyat a nṵsi siya ne jam ge be hubiya to ne. Masar ma fyal na dam wara ɓyalar.
4Swaga ge na dam fyaso ne kale ɗe, Yusuf jan naa ga̰l ge temel ge Faraon ne ma go: «Kadɗa aŋ kwa mbi a̰se ɗe, mbi kaɗe aŋ, mbo me jan Faraon go: 5‹Mbi bá e mbi guni tene go, kadɗa na su ya, mbi mbo mbul na ge na taal siya ge na ne á na ne na pe ge suwal Kanan ya›. Se no, mbi kaɗe mo, ya̰ mbi mbo mbul mbi bá mbi ba gwan’a.» 6Faraon jan na go: «Mbo mbul mo bá dimma ne na sḛ ne e mo guni tene go.»
7Yusuf mbo mbul na bá poseya ne naa ga̰l ge temel ge Faraon ne ma, ne naa ga̰l ge ne na yadiŋ ma, ne ga̰l ge ne suwal Masar go ma mwaɗak, 8ne naa ge ne na yadiŋ ma mwaɗak, na bá vya ma, ne naa ge ne na bá yadiŋ ma mwaɗak. A ya̰ se ɗeŋgo naa jabso, ne bama gii ma, ne bama nday ma, ge suwal Gochen go. 9Naa ge ne pus ma poseya ne naa ge ne tisi ma ɗame nama ne. A ɓase ge be ɗo to.
10Swaga ge a ne dé ya Goren-Atad, ndwara go, «twal ge kore ma ne», na ge ne maŋgaɗam Urdun le may ya go, Yusuf ke siya, siya kerra ge ɓaŋlaŋ swaga mbe go ɗiŋ dam ɓyalar. 11Naa ge suwal Kanan ge ne swaga mbe go ma, a kwar nama swaga ke siya go, a jan ta go: «A ndu ga̰l ge Masar ma ne ba̰ ne!» Da ne pe no, a gá tol swaga ge ne maŋgaɗam Urdun le may ya mbe no Abel-Misrayim. 12Yakub vya ma ke dimma ca ne bama bá ne ho̰ bama wak go. 13Na vya ma in na mbo suwal Kanan ya, a mbul na ge njal pṵṵl ge gaaso ge Makpela ne zi, na ge ne Mamre ziyar go gwa. Abraham yá gaaso mbe da ne Efron, ndu ge Hittitiya tok go, ne da pe na ba gá na taal mbul siya. 14Swaga ge Yusuf ne mbu na bá ɗe, a ne na bá vya ma, poseya ne naa ge a ne nama ne mbo ma mwaɗak, a gwan’a suwal Masar go.
Vo ge Yusuf bá vya ma ne go̰r siya ge bama bá ne go
15Swaga ge Yusuf bá vya ma ne kwa go bama bá su ya go ɗe, a jan ta go: «Se no, nee bá su go, Yusuf da ne pool ke ho̰l ne nee, ne nee ne ke na sone pe.» 16A dol temel jan Yusuf go: «Mo bá gale ne be suya, ya̰ na wak go: 17‹Aŋ mbo jan Yusuf go: Mbi kaɗe mo, pore ya̰l ge mo bá vya ma ne ke mo, ago a ke mo sone!› Se no, i ge ne ke Dok ge mo bá ne temel mo̰r ma, pore i ya̰l ma.» Swaga ge Yusuf ne za̰ fare mbe ɗe, fyal. 18Na bá vya ma sḛ, a mbo, a gur bama koo ma na ndwara se, a jan na go: «I mo dore ma ne.» 19Yusuf jan nama go: «Sya me vo to, mbi é tene Dok byalam go ɗaa? 20Aŋ ɓyare ke mbi sulgu, Dok ɓyare ke kwaɗa, ndwara má pehir ma ɓase dimma ne aŋ ne kwar na ne se ma̰ no go. 21Se no, sya me vo to, mbi mbo wal aŋ ne aŋ vya ma bàŋ.» Iyal nama laar ne na fare janna ma.
Siya ge Yusuf ne
22Yusuf ma ne yàl ge na bá ne mwaɗak a gá katɗa suwal Masar go. Yusuf ke del kis para wol. 23Yusuf kwa Efrayim vya ma ne na báŋ kon ma. Yusuf wa̰ Makir vya, ge Manasa báŋ na koo go. 24Yusuf jan na bá vya ma go: «Mbi su su! Ago Dok mbo sya aŋ ko̰r, mbo ndage aŋ ne suwal mbe no go, mbo suwal ge na ne guni tene hon Abraham, ne Isaku, ne Yakub na ya.» 25Yusuf é Israyela vya ma guni ta go: «Swaga ge Dok ne mbo sya aŋ ko̰r ya, abe me mbi kal ma ne suwal mbe no go aŋ tok ya.»
26Yusuf su ne del kis para wol. A nṵsi na ne jam ge be hubiya ma, a é na sandu mbul siya zi, suwal Masar go.
Currently Selected:
Pe eya 50: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
