Ezekel 6
6
Dok ho̰l ne naa ge uware kaŋ sḭḭm ma
1Bage ɗiŋnedin jan mbi go: 2«Mo ndu dasana, saŋge mo ndwara njal ge Israyela ne ma pala digi, jya̰ fare nama pal. 3Jya̰ go: Njal ge Israyela ne ma, za̰ me fare ge Bageyal Bage ɗiŋnedin ne. Bageyal Bage ɗiŋnedin jan njal ma, ne njal ge sore busur ma, ne ndwala ma, ne baal pul ma go, mbi mbo teme ya pore aŋ pal, mbi mbo burmi aŋ swaga sḭḭm ma uzi. 4Mbi mbo gul aŋ twal tuwaleya ma uzi, mbi mbo ɓá aŋ twal til dukan ma uzi, mbi mbo kan aŋ siya ma aŋ kaŋ sḭḭm ma ndwara se. 5Mbi mbo kan aŋ ge Israyela vya ma siya aŋ kaŋ sḭḭm ma ndwara se, mbi mbo ɓarse aŋ kal ma aŋ twal tuwaleya ma ziyar go. 6Swaga ge daage pet ge aŋ ne ká ne go, aŋ suwal ma mbo gá pṵṵl, aŋ swaga sḭḭm ma mbo burmi uzi. Aŋ twal tuwaleya ma mbo burmi uzi, a mbo hat seŋgre, aŋ kaŋ sḭḭm ma mbo ɓá uzi yeyege, aŋ twal til dukan ma mbo gul uzi, aŋ kaŋ ge aŋ ne ke ma pe mbo burmi uzi. 7Naa mbo det suya gḛ aŋ buwal zi, go no, aŋ mbo kwa go, mbi Bage ɗiŋnedin ne.
8Mbi mbo ya̰ aŋ naa a̰me ma ɓurra ne pore zi zum ge pehir ge ɗogle ma buwal zi, aŋ mbo ɓarse se suwal ma go. 9Ge pehir ge ɗogle ge a ne abe nama mbo mo̰r zi ma buwal zi, aŋ naa ge ne ɓu zum ma mbo dwat ne mbi. Mbi mbo saŋge nama dulwak ge ne ho̰ ta kaŋ sḭḭm ma ya se, mbi mbo saŋge nama ndwara ge ne baŋne kaŋ sḭḭm ma pe ya ma ya mbi pal. Saaso mbo tyane nama be ndil ta ta ndwara zi, ne bama kaŋ kerra ge sone ge bama ne ke ge seŋgre kakatak mbe ma pe. 10Go no, a mbo kwa go mbi Bage ɗiŋnedin ne, mbi be ka jan nama fare ge ke nama sone mbe no baŋ yak to.»
11Bageyal Bage ɗiŋnedin jan go: «Fó mo tok, pó mo koo se, jya̰ go: Ayay! Ne kaŋ ge sone ge seŋgre kakatak ge ne mbo ɓol Israyela vya ma ya pe. Ago pore, ne baktar, ne mbogom mbo pur nama uzi. 12Ndu ge ne kaal ya, mbogom mbo hun na, ndu ge gwa, pore mbo zam na, ndu ge ne gá, ge a ne vé na ne suwal diŋ, kyamal mbo hun na. Mbi mbo á mbi laar ol nama ta. 13Swaga ge nama siya ma ne mbo gá ya kanna njinjik nama kaŋ sḭḭm ma buwal zi, ver nama twal tuwaleya ma se, nama njal ge sore busur ma, ne ge haal ma pala digi pet, ge nama uwara ge lwarra dadab ma pe zi pet, ge nama baŋre ge rubiya ma pe zi pet, ge nama swaga ge a til dukan ne bama sḭḭm ma pe pet ma go, go no, a mbo kwa go mbi Bage ɗiŋnedin ne#Dwa 12:2, Irm 3:6, Hos 4:13.. 14Mbi mbo ŋgay nama mbi pool, mbi mbo burmi suwal mbe uzi, ne ful pul zi ya ɗiŋ mbo suwal Dibla ya, ge nama swaga katɗa ma go pet, go no, a mbo kwa go mbi Bage ɗiŋnedin ne.»
Currently Selected:
Ezekel 6: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
