Ezekel 4
4
Waageya ne ndatɗa ge Ursalima ne pe
1Mo ndu dasana, he jalab, e na mo ndwara zḛ, kḭḭri suwal na ta, ndwara go Ursalima. 2Ve suwal mbe se, tó suwar ver na zi, kole na zi ne hub, e asagar ma ne kaŋ pore ma ver na se. 3Hé walam fiyal, e na dimma ne gulum go, aŋ ne suwal buwal zi. Dó mo ndwara na pal ya, ndi suwal mbe ve ver se, a mo ve na se ne. Mbo kat kaŋ ŋgayya ne Israyela vya ma pe.
4Fi mo le magul pal. Dam ma mwaɗak ge mo ne mbo kat ya fiya mo le mbe pal, mo mbo ka in ya̰l ge Israyela vya ma ne mo pal. 5Mbi hon mo del ge nama ya̰l ma ne inna, na isiya mbo kat dam kikis ataa para wara lamaɗo. Mo mbo in ya̰l ge Israyela vya ma ne dam mbe ma no pal. 6Swaga ge mo ne mbo á dam mbe ma ya, mo mbo gwan fi mo le matoson pal, go no mo ba gá in ya̰l ge Yuda ma ne, mo mbo in nama ɗiŋ dam wara anda. Mbi mbo hon mo dam ɗu ne del ɗu pe. 7Mo mbo saŋge mo ndwara suwal Ursalima, na ge ne ve ver se pal ya, mo ba tyare mo tok, mo ba jan fare anabi na pal. 8Ndi, mbi mbo vwal mo se ne táál, mo mbo saŋge tene se to bat, ɗiŋ mo á dam ge suwal ne ve ver se ma wak.
9Abe gḛme ge fogor, ne taal, ne toglo, ne swara ndaar, ne gḛme ge ndaar, ka̰ nama seɗe ge ɗu go, a mbo gá mo kaŋzam dam ma ge mo ne kat fiya mo le pal ma zi mwaɗak. Mo mbo sul nama ɗiŋ dam kikis ataa ne para wara lamaɗo. 10Mbo gá mo kaŋzam. Mo mbo ka sul sikle wara azi dam ɗu. Mo mbo ka sul na mbe go no dam ne dam. 11Mo mbo ka njot mam ŋgayya, litre ɗu dam ne dam. 12Mo mbo zam paŋgaso ge ne ke ne gḛme ge fogor. Mo mbo ke ol sat na da ne naa dasana ma njoo nama ndwara go.» 13Bage ɗiŋnedin gwan jan go: «Israyela vya ma mbo ka zam bama kaŋzam ge seŋgre ma pehir ge ɗogle ge mbi ne mbo ɓarse nama ya nama buwal zi ma go mbe no.» 14Mbi jan go: «Ayay! Bageyal Bage ɗiŋnedin, ndi, mbi gale be hat tene seŋgre to. Ne mbi bool ya day ɗiŋ ma no, mbi be zam kavaar ge ne su hini, ko ge kaŋ ne wa̰ na to bat, ko duur ge sone a̰me be wat mbi wak zi to bat#Lev 17:15, Dwa 14:21..» 15Na sḛ jan mbi go: «Ndi, mbi hon mo nday njoo naa dasana ma njoo byalam go, mo ba ke mo katugum ne na.» 16Na sḛ gwan jan mbi go: «Mo ndu dasana, ndi, mbi burmi kaŋzam ma pe uzi ne Ursalima go, a mbo gá zam kaŋzam ne kḭḭmi ŋgayya gwa, a mbo gá njot mam ne vo ŋgayya gwa me, 17ne da pe, kaŋzam ma ne mam mbo gá woɗege, ndu ge daage mbo ke ajab, nama pe mbo pur uzi bama ya̰l zi.»
Currently Selected:
Ezekel 4: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
