Ezekel 26
26
Mḛreya ge suwal Tir ne
1Del wol para ɗu go̰r ge paal ne go, na saba dam ge zḛ ge go, Bage ɗiŋnedin jan mbi go: 2«Mo ndu dasana, ne jo̰ suwal Tir má njanjar cot tene ne suwal Ursalima, janna go: Mo ge naa pet a ne ka mbo ya mo go, mo burmi ya go! I gá a̰yya ne, burmiya go. 3Ne pe no, Bageyal Bage ɗiŋnedin jan go: O Tir, mbi mbo ɗage ya mo pal, mbi mbo e pehir ge ɗogle ma gḛ sululi mo pal dimma ne maŋgaɗam ga̰l yuwam sḭḭl ne sululi go. 4A mbo burmi mo gulum ga̰l ma se, a gul na swaga njole swaga ma se me. Mbi mbo bṵsi nama se, njal ma mbo gá kanna kwaya̰l baŋ. 5Suwal Tir mbo gá swaga zen kool ge maŋgaɗam pul go baŋ. A mbi jya̰ ne, ka̰l ge Bageyal Bage ɗiŋnedin ne, mbo gá kaŋ paal ge pehir ge ɗogle ma ne. 6Na vya ge gwale ge ne ful zi ma pore mbo zam nama, go no a mbo kwa go mbi Bage ɗiŋnedin ne.
7Bageyal Bage ɗiŋnedin jan go: Ndi, mbi mbo e gan Nebukadnezar, gan ge Babilon ne, gan ge gan ma ne, mbo ne kuu ya suwal Tir pal. Mbo mbo ya det na ne tisi ma, ne pus pore ma, ne naa ge njaŋge tisi ma, ne naa ɓase gḛ ge be to. 8Mbo pur suwal ge ne mam wak go ge ne mo ziyar go ma uzi, mbo al tuul ver mo zi, mbo tor hub ver mo se, mbo syare ɓiyaar ma ver mo zi me. 9Ne bama ɓiyaar ma a mbo ka ɓyan mo gulum ga̰l, a mbo gul mo swaga njole swaga ma se ne bama jagan ma. 10Ne ɓase ge nama tisi ma ne, nama koo kuci mbo mbul mo se, naa ge njaŋge tisi ma ka̰l ne pus pore ma koo vinna mbo e mo gulum ga̰l ma ndatɗa. A mbo wat mo gulum wak ma ya dimma ne naa ne gul gulum wat suwal diŋ go. 11A mbo an ne tisi ma mo yàl buwal ma go pet, a mbo hun mo naa ma uzi ne kasagar, njal ge dusiya digi#26:11 Ne swaga no go, njal ge dusiya digi da ne pool kat kaŋ sḭḭm ko kat uwara zok pul ma ge swaga sḭḭm ne. ge mo ne e mo jobreya ne na pal ma a mbo kan nama suwar zi. 12A mbo abe mo kaŋ gan ma, a mbo pál mo kaŋ suk ma, a mbo gul mo gulum ga̰l ma se, a mbo gul mo zok ge siŋli ma uzi, a mbo abe nama njal ma, ne nama uwara ma, ne nama suwar ma mbo kanna maŋgaɗam se ya. 13Mbi mbo tele ko̰r ge mo kaŋ mballa ne ma, ndu mbo gwan za̰ mo biliŋ ma pul vinna to bat. 14Mbi mbo saŋge mo njal ge kwaya̰l, mo mbo gá swaga zen kool ma, ndu mbo gwan sin mo digi to bat, a mbi Bage ɗiŋnedin jya̰ ne, ka̰l ge Bageyal Bage ɗiŋnedin ne.»
15Bageyal Bage ɗiŋnedin jan ne suwal Tir go: «Swaga ge ko̰r burmiya ge mo ne ne mbo ɗage ya digi, swaga ge naa ge ne ɓó jwaŋ ma ne mbo ɗage ya yo̰re ta ge dam purra ge mo ne go, naa ge ne ka ne mam wak go ma mbo ndat vo to’a? 16Suwal ge ne mam wak go ma gan ma pet, a mbo kan bama koo ne bama hool gan ma pala digi ya se, a mbo fage bama ba̰r ge siŋli ma ne bama ba̰r ge dabcar ma uzi, vo mbo wan nama, a mbo gá katɗa suwar zi. A mbo gá ndatɗa rarag, vo mbo kan nama zi ne detɗa ge mo ne pe. 17A mbo hé sḭ mballa mo pal go:
Te burmi uzi kyaɗa ɗaa!
Mo ge naa ge mam wak go ma ne ká ne mo go,
suwal ge na dḭl ne tol,
ge na sḛ, poseya ne na naa ma
a ne ɓol bama pool ne maŋgaɗam ga̰l yuwam se,
na ge ne hon naa ge ne na ziyar go ma pet vo.
18Se no, naa ge ne til zi ma sḛ wan ya vo
ne detɗa ge na ne pe,
naa ge ne mam wak go ma abe ya ndatɗa
ne burmiya ge na ne pe.»
19Bageyal Bage ɗiŋnedin jan go: «Mbi mbo saŋge mo dimma ca ne suwal ge ne burmi uzi go, ko dimma ne suwal ge naa ne gwan kat ne na go to go. Mbi mbo e mam ndarra ne maŋgaɗam ga̰l yuwam pul se ya digi, mbo somɗe mo se ya. 20Mbi mbo mbo ne mo taal ge siya ma ne se ya, ge naa ge ne ka ne tuul se ɗiŋnedin ma buwal zi, ge naa ge ne suwal ge ne suwar pe se ya ma ta ya. Mo mbo gwan say ya digi to bat, mo mbo gwan ɓol swaga katɗa ge suwal ge naa ge ne ndwara ma ne go to bat 21Mbi mbo é naa pet gá ndat vo ne mo pe, a mbo ɓyare mo, amma a mbo gwan ɓol mo to bat ne ndwara dedet, ka̰l ge Bageyal Bage ɗiŋnedin ne.»
Currently Selected:
Ezekel 26: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
