Ezekel 18
18
Dok kun ndu ge daage sarya na kaŋ kerra pal
1Bage ɗiŋnedin jan mbi go: 2«Ge suwal Israyela go, naa ke fare sḭ ya go go:
‹Bá ma zá oyo̰r ge be zonna ne,
nama vya ma kiya̰r ma siya̰le no›
3Ne jo̰ mbi da ne ndwara, ka̰l ge Bageyal Bage ɗiŋnedin ne, aŋ mbo gwan ke fare sḭ mbe no Israyela go to bat. 4Ndi, o̰yom ge naa dasana ma ne pet ya mbi tok go, o̰yom ge bá ma ne, ko ge vya ma ne. A ndu ge ne ke sone su ne#Wat 14:12-20, Dwa 7:10, 24:16, Irm 31:29-30..
5Ndu ge dosol ge ne mbo wak yuwaleya pal, dosol zi, 6zam kaŋ tuwaleya ge sḭḭm ma ne njal ma pala digi to, hé na ndwara digi uware kaŋ sḭḭm ge Israyela vya ma ne to, ɓan ne na kon gwale to, fi ne gwale ge ne swama ne na ta to, 7ke na kon yál to, gwan ne kaŋ ge a ne dusi na ma digi, maŋge na kon kaŋ to, hon ndu ge ne hḛme kyamal na kaŋzam, ka lar ndu ge swala pe me, 8hon gobso to, ame ndu kaŋ ne mam pal to, abe tene uzi ne kaŋ kerra ge ya̰l go, kun na kaam sarya fareba pal, 9ke mborra mbi eya ma pal, koy mbi wak yuwaleya ma, ndwara na ke mborra fareba pal. Na sḛ a ndu dosol ne, a ŋgat, mbo kat ne ndwara, ka̰l ge Bageyal Bage ɗiŋnedin ne.
10Katɗa ndu mbe tol vya a̰me ya, na vya mbe kat syala, ko ndu ge hun siya, ko ndu ge ne ke ya̰l a̰me hir mbe no ma no, 11ko ne jo̰ na bá be ke kaŋ hir mbe no to. Ka gwan mbo zam tuwaleya ge sḭḭm ma ne njal ma pala digi, ka mbo ɓan ne na kon gwale, 12ka ke naa ge a̰se ma ne naa ge woɗegeya ma yál, ka maŋge naa kaŋ, ka gwan ne kaŋ ge a ne dusi na tok go ma digi to, ka he na ndwara digi uware kaŋ sḭḭm ma, ka ke kaŋ ge seŋgre kakatak ma me, 13ka hon naa gobso, ka ame kaŋ ne mam pal. Na sḛ mbo kat ne ndwara to bat. Ne jo̰ na sḛ ke kaŋ ge seŋgre kakatak mbe ma no ne mwaɗak ɗe, a ŋgat, na su, na siya mbo kat na pal.
14Amma katɗa vya mbe tol vya a̰me ya, na vya mbe kwa sone ge na bá ne ke ma mwaɗak, ke dimma ne na bá go to. 15mbo zam kaŋ tuwaleya ge sḭḭm ma ne njal ma pala digi to, hé na ndwara digi uware kaŋ sḭḭm ge Israyela vya ma ne to, ɓan ne na kon gwale to, 16ke na kon yál to, gwan ne kaŋ ge a ne dusi na ma digi, maŋge na kon kaŋ to, hon ndu ge ne hḛme kyamal na kaŋzam, ka lar ndu ge swala pe me, 17abe tene uzi ne kaŋ kerra ge ya̰l go, hon gobso ndwara na ame mam pal to, ke mborra wak yuwaleya ma, ne mbi eya ma pal. Na sḛ mbo su ne ya̰l ge na bá ne pe to, a ŋgat mbo kat ne ndwara. 18A na bá ke naa yál ne, maŋge na kaam kaŋ ma ne, ke fare ge kwaɗa to na kaam buwal zi ne, a na sḛ su ne na ya̰l pe ne.
19Aŋ ele ta go: ‹Vya te in ya̰l ge na bá ne to kyaɗa ɗaa?› Ago vya mbe ke mborra wak yuwaleya ma ne dosol pal, koy mbi eya ma pet, ke mborra nama pal mwaɗak. A ŋgat na ka ne ndwara. 20Ndu ge ne ke sone, a na sḛ su ne. Vya mbo in ya̰l ge na bá ne to, ko bá mbo in ya̰l ge na vya ne to. A mbo pot ndu ge dosol na dosol pal, a mbo pot ndu ge sone na sone pal me.
21Amma kadɗa ndu ge sone saŋge ja se ne na kaŋ kerra ge sone ma go, koy mbi eya ma mwaɗak, gá ke mborra wak yuwaleya ma ne dosol pal, a ŋgat mbo kat ne ndwara, mbo su to. 22A mbo gwan dwat na sone ge ne ke ma mwaɗak pal to, ne na dosol ge ne gá kerra pe, mbo kat ne ndwara. 23Siya ge ndu ge sone ne ke mbi sḛ tuli ɗaa? Ka̰l ge Bageyal Bage ɗiŋnedin ne. mbi te ɓyare go na saŋge ya se ne na kaŋ kerra go, na ka ne ndwara to’a? 24Amma katɗa ndu ge dosol ya̰ na dosol kerra ya, gá ke ya̰l, ne ke kaŋ ge seŋgre kakatak ge daage pet ge ndu ge sone ne ke ma. Swaga ke go mbe no, mbo kat ne ndwara ɗaa? A mbo gwan dwat na dosol ge ne ke ma pal to bat. Ne na ya̰l ma ne na sone ge ne ke ma pe, mbo su ŋgat. 25Aŋ jan go: ‹Kaŋ kerra ge Bageyal ne ma ne na viya̰ go to!› Israyela vya ma, za̰ me gale: A mbi kaŋ kerra ma ne bama viya̰ go to ne ɗaa? Te be aŋ kaŋ kerra ma ne bama viya̰ go to ne to’a? 26Swaga ge ndu ge dosol ne ya̰ dosol ge na ne be kerra, gá ke ya̰l, su na kaŋ kerra mbe ma zi, ago su da ne ya̰l ge na ne ke pe. 27Swaga ge ndu ge sone ne ya̰ na sone be kerra, gá ke fare wak yuwaleya pal ne dosol pal, mbo má tene. 28Swaga ge ne kwa na sone ma ya pet, saŋge ya se, na sḛ mbo kat ne ndwara, mbo su to bat. 29Amma aŋ ge Israyela vya ma, aŋ jan go: ‹Kaŋ kerra ge Bageyal ne ne na viya̰ go to.› Israyela vya ma, a mbi kaŋ kerra ma ne bama vya go to ne’a? Te be aŋ kaŋ kerra ma ne bama viya̰ go to ne to’a? 30Israyela vya ma, ne no pe, mbi mbo kun ndu ge daage sarya na kaŋ kerra ma pal, ka̰l ge Bageyal Bage ɗiŋnedin ne. Gwa̰ me ya, abe me ta ne aŋ sone ma zi ya uzi, na kaage ya̰l ge aŋ ne na ka kaŋ syal koo ne aŋ pe to. 31Cigi me aŋ sone ma pet ge aŋ ne ke nama ne aŋ ta uzi, é me aŋ dulwak ma ne aŋ o̰yom ma giya̰l. Israyela vya ma, aŋ te su gyana ɗaa? 32Mbi za̰ tuli ne siya ge ndu ne to, ka̰l ge Bageyal Bage ɗiŋnedin ne. Gwa̰ me ya, ka me ne ndwara!»
Currently Selected:
Ezekel 18: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
