2Timotawus 4
4
Oy fare ge Dok ne
1Mbi jan mo Dok ndwara se, ne Kris Jeso na ge ne mbo kun sarya naa ge ndwara ma ne naa ge siya ma pal ndwara se, ge dḭl ge gwanna ge na ne ya zi, ne muluk ge na ne zi, 2oy fare ge Dok ne, terse tene swaga ge kwaɗa ma pul zi, ko ge kwaɗa to ma pul zi, ŋgay naa nama sone ma, mḛre, moɗege, ge wan ta zi pet, ne hateya zi. 3Ago dam ma mbo ya go, naa mbo gwan ɓyare za̰ hateya ge ne na viya̰ go to bat, amma laar ɓyareya ge bama ne pal, a mbo ɓol naa ge hateya ma gḛ ne ta pe, ndwara gurgi bama togor ma pul ne fare ge bama ne ɓyare ma, 4a mbo cigi bama togor uzi ne fare ge fareba go, a mbo gá za̰ sigir ma. 5Amma mo ɗe, wa̰ tene ne kaŋ ma ta pet, wa̰ tene yál njotɗa ma zi, ke temel ge bage oy fare ge kwaɗa ne, ka ndu ge temel ge mbyatɗa tap.
6Ago mbi ɗe, swaga ge a tyare mbi dimma ne tuwaleya ge oyo̰r jiya̰l ne go yan ja, mbi dam jyat di terse ja zi gwa. 7Mbi mbá pore mballa ge kwaɗa, mbi sya so aya, mbi koy hon fareba ge mbi ne, 8ne ga ne zḛ no, balme ge dosol a nṵsiya ne mbi pe, na ge Bageyal, Bage kun sarya ge dosol mbo hon mbi na ya dam mbe go. Hon be mbi ɗeŋgo to, amma hon nama ge nama laar ne mbo wan gwanna ge na ne ya ma pet me.
Moɗegeya ge go̰r dab
9Há tene ya digi avun cap mbo ya ɓol mbi. 10Ago Demas ya̰ mbi go ne ene ge dunya ge ma̰ mbe ne pe, mbo ya suwal Tesalonika. Kreskes mbo ya suwal Galatiya, Titus mbo ya Dalmatiya me, 11a Luka ɗu kikit gá ne mbi ta ne. Wá̰ Markus ya mo pe go, ago na sḛ da ne hamba gḛ ne mbi pe ge temel zi. 12Mbi teme Tikikus ya mbo suwal Efesus. 13Mbi ba̰r ga̰l ge mbi ne ya̰ na ge suwal Trowas ya ge Karpos tok go, abe na ya mo tok go swaga mborra ya go, abe mbi maktub ma ya me, ge ne waɗe a ge gwabal kwalce.
14Alezandre, bage suwa ke mbi sone gḛ ge be to. Bageyal mbo gwan ne kaŋ ge na sḛ ne ke potɗa. 15Mo me, abe tene uzi ne na ta, ago na sḛ pili tene ne fare janna ge i ne.
16Swaga ge mbi ne jya̰ fare ndwara ben tene ge zḛ ge go, ndu a̰me be mbo ya mbi pe go to. Naa pet a ya̰ mbi hini. Dok na isi fare mbe nama pal to. 17Amma Bageyal mḛ mbi ziyar go, ho̰ mbi pool, ne da pe, ne mbi ta, fare oy, pehir ge ɗogle ma za̰ na. A zu mbi ne sonne wak zi! 18Bageyal mbo zur mbi ne kaŋ kerra ge sone ge daage zi pet, mbo má mbi ne na muluk ge ne digi ya pe. Na dḭl ɓo uwareya doŋ pe ma ne doŋ pe ma! A go!
Wak sanna
19Sá̰ Briskila ma ne Akila wak, poseya ne yàl ge Onesiforus ne. 20Erastus gá katɗa ya Korinte ya, mbi ya̰ Trofimus moy ya Miletus ya. 21Há tene mborra ya iyalam ndwara zḛ. Ebulus, Pudes, Linos, Klodiya poseya ne ná vya ma pet, a sá̰ mo wak.
22Bageyal na ka poseya ne mo o̰yom! Kwa a̰se na ka poseya ne aŋ pet!
Currently Selected:
2Timotawus 4: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.