2Gan ma Fare pala hageya
Fare pala hageya
Dimma ne fare pala hageya ge maktub ge zḛ ge ge gan ma ne ne jya̰ go, Maktub ge azi ge Gan ma ne wan maana ge gan ma ne fare mbo zḛ, ne varseya ge muluk ge Israyela ne ya (1Gan 12) ɗiŋ mbo ya burmiya ge muluk mbe ma ne jwak go.
Maktub ge azi ge Gan ma ne da ne pool varse pe azi.
Ne 2Gan 1—17 wan maana ge gan ge Israyela ma ne ma, ne maana ge gan ge Yuda ma ne ma fare, det ya burmiya ge muluk ge Israyela ne go. Ago Salmanasar, gan ge Asiri ma ne mbo ya det suwal Samariya, suwal ga̰l ge muluk ge Israyela ne del 722 tolla ge Jeso Kris ne ndwara zḛ, ame na no, pá na naa ma no, a go no muluk ge Israyela ne burmi no. Ne wak za̰ya to pe, dulwak togreya sone kerra zi pe, nama muluk pe burmi no.
Ne 2Gan 18—25, a maana ge muluk ge Yuda ne ge ne gá hini. Nama sḛ ma me, Nebukadnezar, gan ge Babilon ne mbo ya burmi suwal Ursalima ge tok dab del kikis anuwa̰y para wara tiimal para ɓyalar (587) tolla ge Jeso Kris ne ndwara zḛ, tí zok ge mbegeya no, pá kaŋ ge ne na zi ma no kakaɗak, ɓanna ne naa ge pool ma mbo ne nama na suwal Babilon. A go no me, muluk ge Yuda ne burmi no.
Maktub mbe wan fare ge gan ma ne pe ɗeŋgo to, amma anabi ma ke temel gḛ swaga no zi ndwara e ɓase ge Dok ne ma gwanna ya Dok ta. Nama ge a ne ke temel gḛ ma dimma ne Ilisa go (2-13), ne Isaya go (19-20), ne anabi ge gwale Hulda go (22).
Maktub mbe no uwale ŋgay go gan ge ne ke mborra wak tuli ge Dok ne pal to na muluk pe mḛ digi to, amma Dok ndwara ya naa ge ne ke mborra na laar ɓyareya zi ma pal.
Currently Selected:
2Gan ma Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.