2Gan ma 4
4
Gwale kumur ɓol mbarra ne Ilisa ta
1Dam a̰me ɗu, gwale a̰me ge na obe ne ka Anabi ma buwal zi, mbo ya Ilisa ta, jan na go: «Mo dore ge mbi obe, su ya go, mo da ne kwarra tyatyat go na ndu ge ne ka sya Bage ɗiŋnedin vo ne, amma bage na sḛ ne ame na wul, mbo ja wan mbi vya ma dwagal jwak mbo ke nama mo̰r.» 2Ilisa ele na go: «Mbi ke ne mo gyana ɗaa? Ŋgay mbi kaŋ ge ne mo yadiŋ ya.» Gwale jan na go: «Mbi num gá ne mbi seɗe pul ya ne go ŋgeɗo baŋ, a̰me ge ɗogle to.» 3Ilisa jan na go: «Mbo kaɗe kaŋ kan num ma ne mo kaam ma tok go, kaɗe woɗege gwa to. 4Swaga ge mo ne wat ya mo zok zi ne mo vya ma, dibi zok wak aŋ pal, ka̰ num kaŋ mbe ma pul go mwaɗak, mo ka e kaŋ ma ge ne wi ya ma uzi le ɗu.»
5Gwale mbe ɗage, mbo. Swaga ge ne de ya na yadiŋ dibi zok wak bama pal. Na vya ma ka tyare na kaŋ kan num ge pul baŋ ma, na sḛ ka wi nama ne num. 6Swaga ge kaŋ ma ne wi mwaɗak ɗe, jan na vya a̰me go: «Ho̰ mbi kaŋ kan num ya iya.» Na sḛ gwan ne na janna go: «A̰me ge kan num be gwan ga ne go to.» Num ga be ɓulla. 7Gwan mbo jan ndu ge Dok ne pal. Na sḛ jan na go: «Mbo yat num mbe uzi, mo pot mo wul mbe, aŋ ne mo vya ma, aŋ wal ta ne num pe ge ne gá me.»
Ilisa ma ne gwale ge suwal Sunem ne
8Dam a̰me ɗu, Ilisa ka kale suwal Sunem go. Ndu gwale a̰me ya go ɗu suwal diŋ, ka kaɗe na ne á tene go, na te ya mbo ya zam kaŋ na yadiŋ mbḛ. Da ne pe no, ɗaɗak swaga ge Ilisa ne ka mbo ya suwal mbe diŋ, ka mbo zam kaŋ na yadiŋ no. 9Gwale mbe jan na obe go: «Mbi kwa go, ndu ge ne mbo ya nee yadiŋ ɗaɗak mbe no, a ndu ge mbegeya ge Dok ne ne. 10A kwaɗa ge nee sin na zok vya ɗu ge na kon pala digi, nee é na saŋgal ɗu, ne tabul ɗu, ne kaŋ katɗa ɗu, ne ɗuli ɗu na zi, ne da pe, na ka dwam na digi ya cat, swaga ge na sḛ ne mbo ja nee go.»
11Dam a̰me ɗu, Ilisa mbo ya suwal diŋ, nde, mbo dwam zok vya ge ne ka na kon pala digi mbe zi ya. 12Jan na dore Gehazi go: «Tó mbi gwale ge suwal Sunem ne ya.» Gehazi tol na ya, gwale mbe mbo ya Ilisa ta. 13Ilisa jan Gehazi go, jya̰ na: «Mo ame i kwaɗa gḛ ge be to, i ke ne mo da ɗaa? I jya̰ gan, ko asagar ma ga̰l fare ne mo pe ɗaa?» Gwale mbe jan na go: «Mbi ka ne go kwaɗa ne mbi naa ma buwal zi.» 14Ilisa ele na dore Gehazi go: «Nee ke ne na da ɗaa?» Gehazi gwan ne na janna go: «Na sḛ be vya, na obe me hatɗa sabar.» 15Ilisa jan Gehazi go: «Tó na ya.» Gehazi mbo tol na ya, na sḛ mbo ya mḛ zok wak go. 16Ilisa jan na go: «Demle, swaga ge nee ne na pul zi mbe no go tem, mo mbo wan vya mo tok go.» Gwale gwan ne na janna go: «To! Mbi bageyal, ndu ge Dok ne, kaage mo kun mo kale hale to!» 17Dam mbe ma no pul zi, gwale mbe her emel. Del ge may pul zi, swaga mbe go tem, tol vya son dimma ne Ilisa ne waage na go.
Siya ge gwale ge suwal Sunem ne vya
18Vya jyale don digi. Dam a̰me ɗu, kare na bá pe mbo naa ge siyal ma pe ya. 19Jan na bá go: «Ay mbi pala, mbi pala!» Na bá jan na dore a̰me ɗu go: Gene na mbo hon na ná. 20Dore mbe gene na mbo hon na ná. Na ná dol na na koo go, gyala pala tat, na sḛ su. 21Na sḛ ndé ne na mbo zok ge ne na kon pala digi ya, dol na saŋgal ge anabi ge Dok ne pul go, dibi zok wak na pal, wat zum. 22Tol na obe ya, jan na go: «Mbi kaɗe mo, teme mbi mo dore ge sḛ jyale ya ɗu, ne kwara ná ya ɗu me. Mbi sya mbo ndu ge Dok ne ta ya, mbi ma̰ gwan’a.» 23Jan na go: «Mo te mbo na ta ya ma̰ kwaɗa ɓaa? A be vḛso ge saba wak ne ne to, ko dam ɗigliya ne to me ɗe!» Gwale jan na go: «Mbi mbo kwaɗa baŋ!» 24Go̰r go, gwale ndwar na kwara ná pal, jan na dore ge sḛ jyale go: «Ɗame mbi avun cap, mḛ mbi viya̰ go bàŋ ɗar to, mbi jan mo ne ɓya.» 25Gwale mbe mbo ɗiŋ det ya ndu ge Dok ne ta go, njal Karmel go. Swaga ge ndu ge Dok ne ne kwa na gale ne kaal ya, jan na dore Gehazi go: «Ndi, a gwale ge suwal Sunem ne mbe ne! 26Sya na ndwara zi ya, ele na go: Mborra ge mo ne ya kwaɗa ɓaa? Mo obe ya ya kwaɗa ɗer ɓaa? Mo vya ya ya kwaɗa ɗer ɓaa?» Gwale jan na go: «A ya ya kwaɗa mwaɗak.» 27Swaga ge gwale mbe ne de ya ndu ge Dok ne ta njal pala digi, gur na koo ndu ge Dok ne ndwara se. Gehazi me, mbo ya na ta ndwara go na tele na. Ndu ge Dok ne jan na go: «Ya̰ na, ago na sḛ ya ŋgiɗim zi, Bage ɗiŋnedin be ben mbi na pe to, be ke mbi kwarra zaŋgal to me.» 28Gwale mbe jan na go: «Mbi kaɗe mbi bageyal kaɗe na ho̰ mbi vya ɗaa? Mbi te be jan mo to’a? Kaage mo lase mbi to.»
Tanna ge gwale ge suwal Sunem ne vya
29Ilisa jan Gehazi go: «Vwa mo pul, he mbi calaŋ mo tok go, mbo! Kadɗa mo ma̰ ɓol ndu ya viya̰ go, sa̰ na wak to, ko kadɗa ndu san mo wak ya puy, vḭ na to. Swaga ge mo ma̰ detɗa ya, e mbi calaŋ mbe na ndwara go.» 30Vya ná jan Ilisa go: «A fareba Bage ɗiŋnedin da ne ndwara, mo sḛ me mo da ne ndwara! Mbi ne pool ge mbo be mo to.» Ilisa ɗage digi, kare gwale mbe pe. 31Gehazi det nama ndwara zḛ ya, é calaŋ vya jyale ndwara go. Amma kwar fare a̰me pe to, za na ka̰l, ko kwar na misigi tene to. Na sḛ gwan’a Ilisa ndwara zi, jan na go: «Vya jyale mbe be tan to.»
32Swaga ge Ilisa ne wa ya na ta zi, kwa vya jyale suya dolla ne na saŋgal go. 33Ilisa wat ya zok zi, dibi zok wak bama pal go, kaɗe Bage ɗiŋnedin. 34Na sḛ ndé saŋgal digi, kubi fiya vya pal. E na wak na wak go, na ndwara na ndwara go, é na tok ma na tok ma go. Ne jo̰ kubi kubi fiya ge vya pal ɗe, vya mbe duur mbal ol. 35Ilisa ɗage digi ka mborra bataraŋ zok pul zi, gwan kubi fiya vya mbe pal. Sese no, vya jyale mbe sen atisyo̰ ndwara ɓyalar, hage na ndwara zum. 36Ilisa tol Gehazi ya, jan na go: «Tó gwale ge suwal Sunem ne mbe ya.» Gehazi tol na ya, na sḛ mbo ya Ilisa ta, Ilisa jan na go: «Wa̰ mo vya!» 37Gwale mbe mbo ya na ta, dol tene na ndwara se gurra suwar pal, wan na vya, wat zum ne na.
Siya ya sa̰re zi
38Ilisa gwan’a Gilgal go. Swaga mbe go baktar det suwal pal. Ne jo̰ anabi ge ne ame hateya ma a ka ya na ta ɗe, jan na dore go: «É sa̰re ge ga̰l ol zi, sḭ kaŋzam hon anabi ge ne ame hateya ma.» 39Ndu a̰me ne nama buwal zi mbo anna ɓyare kaŋ twagal ma zamma, ɓol dege ma ge gaaso ge oyo̰r ne ge ne ga be garra to zi, abe nama na ba̰r wak zi ɗob. Swaga ge ne ja ya diŋ, kun nama se njanja kan nama sa̰re zi, sḭya. Ago ndu a̰me ɗu be kwar kaŋ mbe pe to. 40A var naa mbe ma kaŋ mbe zamma. Amma swaga ge a ne tare na ɗe, a he bama ka̰l digi janna go: «Siya ya sa̰re zi, ndu ge Dok ne!» A gwan zam na to bat. 41Ilisa jan nama go: «Gene me mbi swama ya.» Kan swama mbe sa̰re zi, jan go: «Ho̰ naa mbe ma na, nama za. A̰me ge sone be gwan ga ne sa̰re zi to.»
Ilisa wal na kis
42Dam mbe ma pul zi, ndu son a̰me ɗu ɗage ne Baal Chalicha ya. Na sḛ gene katugum ge gḛme ge fogor ne ya wara azi, ne gḛme giya̰l ya na galam zi hon ndu ge Dok ne. Ilisa jan go: «Va naa katugum mbe ma, nama za.» 43Na dore ele na go: «Mbi ma̰ hon naa kis na zamma gyana ɗaa?» Ilisa gwan jan na go: «Va naa mbe ma, nama za. Ago Bage ɗiŋnedin jan go: ‹Ndu ge daage ma̰ zam, huri, na pe gwan ga›.» 44Na dore var nama katugum mbe ma, a zam, na pe gwan ga dimma ne fare ge Bage ɗiŋnedin ne jya̰ go.
Currently Selected:
2Gan ma 4: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.