2Gan ma 2
2
Herra ge Iliya ne mbo digi, Ilisa er na byalam
1Ndi gyana gyana ge Dok ne hé Iliya digi digi zi ya ne kurum: Ago Iliya ma ne Ilisa ka mbo suwal Gilgal ya. 2Iliya jan Ilisa go: «Ka go go, ago Bage ɗiŋnedin teme mbi mbo suwal Betel.» Ilisa jan na go: «Ne jo̰ Bage ɗiŋnedin da ne ndwara, mo da ne ndwara me, mbi ya̰ mo to bat.» A ɓan dagre mbo Betel. 3Anabi ge ne ka ne Betel go hateya ma, a ɗage mborra ya Ilisa ndwara zi, a jan na go: «Mo kwa kwa go Bage ɗiŋnedin ma he mo bá Iliya ma̰ no mbo na ta digi ya ɗaa?» Vin, jan nama go: «Mbi kwa kwa, zane me!» 4Iliya gwan jan Ilisa go: «Ilisa, ka go go, ago Bage ɗiŋnedin teme mbi mbo suwal Jeriko ya.» Ilisa gwan ne na janna go: «Ne jo̰ Bage ɗiŋnedin da ne ndwara, mo da ne ndwara me, mbi ya̰ mo to bat.» A ɓan dagre, a mbo Jeriko ya. 5Ndi, anabi ge ne ka ne Jeriko go hateya ma, a mbo ya Ilisa ta, a jan na go: «Mo kwa kwa go, Bage ɗiŋnedin ba he mo bá Iliya ma̰ no mbo na ta digi ya ɗaa?» Gwan ne nama janna go: «Mbi kwa kwa, zane me!» 6Iliya gwan jan na go: «Ka go go, ago Bage ɗiŋnedin teme mbi mbo maŋgaɗam Urdun wak ya.» Ilisa jan na go: «Ne jo̰ Bage ɗiŋnedin da ne ndwara, mo da ne ndwara me, mbi ya̰ mo to bat.» A ɓan dagre mborra. 7Ne anabi ma buwal zi, naa mbo wara anuwa̰y go, a kare nama pe ya, a me uzi ya kaal nde ne Iliya ma ne Ilisa, nama sḛ ma jwak a mḛ maŋgaɗam Urdun wak go. 8Iliya abe na ba̰r ga̰l fiŋli na digi, iyal mam ne na, mam caɗe tene se pe azi, nama sḛ ma jwak, a kale na pul fiya̰l.
9Swaga ge a ne dé le may ya, Iliya jan Ilisa go: «Kaɗe, a ma kaŋ ge mo ne ɓyare go mbi ke mo na, zḛ ge go Bage ɗiŋnedin na he mbi ne mo ta uzi.» Ilisa gwan ne na janna go: «Ho̰ mbi o̰yom anabi ge mo ne dwageya azi!» 10Iliya jan na go: «Mo ele kaŋ ge haŋle ge be to, amma kadɗa mo ma̰ kwa mbi ya swaga ge Bage ɗiŋnedin ma̰ ɗage ya he mbi ne mo ta go, mo ma̰ ɓol kaŋ ge mo ne kaɗe mbe. Amma, kadɗa to, mo ɓol na to.»
11Swaga ge a ne ka sigɗi ta fare swaga mborra go gale, ndi pus pore ge ol a̰me ɗu ne tisi ge ol ma me, a caɗe nama buwal se, a pal Iliya mbo digi zi ya kurum zi. 12Ilisa ka ndil na, ka fyalla: «Báá! Báá! Mo dimma ca ne pus pore ma ne naa ge njaŋge tisi ge Israyela ne ma go!» Go̰r go, Iliya fat ne na ndwara zi swaga. Wan na ba̰r ne na ta, taabe na se pe azi. 13Na sḛ abe ba̰r ga̰l ge Iliya ne ya̰ na se kanna, gwan, mbo mḛ́ maŋgaɗam Urdun wak go. 14Abe ba̰r ga̰l ge Iliya ne ya̰ na se kanna, dwagle mam, jan go: «Bage ɗiŋnedin, Dok ge Iliya ne ya le da ya ɗaa?» Na sḛ me, Iyal mam, mam caɗe tene se pe azi. Ilisa kale na pul go fiya̰l baŋ. 15Anabi ge ne ka ne Jeriko go hateya ma, a kwa na, a jan ta go: «O̰yom ge Iliya ne ya ge Ilisa pal!» Nama sḛ ma mbo ya na ndwara zi, a gur na ndwara se, 16a jan na go: «Ndi mo dore ma, naa ge ndwara ndaar ma no wara anuwa̰y, nama mbo ɓyare mo bageyal! Tamekyala O̰yom ge Bage ɗiŋnedin ne he na mbo dolla njal a̰me pala digi ya, ko baal a̰me pul se ya.» Ilisa tele nama, na kaage nama mbo to. 17Amma a wan ta na wak go, Ilisa vin nama. A teme naa wara anuwa̰y mbo ɓyare Iliya, a ɓyare na ɗiŋ dam ataa, a ɓol na to. 18A gwan’a na ta Jeriko go, jan nama go: «Mbi te va tele aŋ go, aŋ mbo to to’a?»
Ilisa saŋge mam ge Jeriko ne yaɗat
19Naa ge ne suwal Jeriko go ma, a jan Ilisa go: «Bageyal, ndi i suwal swaga ge kwaɗa ne, amma na mam kwaɗa to, na suwar don kaŋ to me.» 20Ilisa jan nama go: «Aŋ gene me mbi yuwam ya seɗe ge giya̰l pul go.» A gene na ya. 21Ilisa mbo mam mbe wak ya, cigi yuwam mam se ne ka̰l janna go: «Ndi Bage ɗiŋnedin jan go: ‹Mbi hat mam mbe ya yaɗat, na sḛ mbo gwan hun siya, ko tele suwar be ge don kaŋ dḛ to bat›.» 22Mam mbe ga yaɗat ɗiŋ ma̰ no, dimma ne fare ge Ilisa ne jya̰ go.
Bage ɗiŋnedin mḛre naa jabso ge ne cot Ilisa ma
23Ne Jeriko go, Ilisa ɗage mbo Betel ya. Swaga mborra go gale, naa jabso ɗage ne suwal diŋ ya, a ka ke na kalam, a ka oyya go: «Mbo ya, mo ge pala saal koglas! Mbo ya, mo ge pala saal koglas!» 24Na sḛ saŋge tene ya seɗe, ndil nama ol bel, vḛne na wak nama pal ne dḭl ge Bage ɗiŋnedin ne. Yoŋyoŋ ma azi, a wat ne murum zi ya, a kacage naa jabso mbe ma se naa wara anda para azi. 25Ne swaga mbe go, kale mbo njal Karmel ya, ne ya go, gwan’a Samariya go.
Currently Selected:
2Gan ma 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.