1Samiyel 1
1
Tolla ne temel kerra ge Samiyel ne
(1Sam 1—7)
Hanatu ma ne Penina
1Ndu a̰me ɗu ne pehir ge Efrayim ne zi, na dḭl Elkana ka suwal Ramatayim-Sofim go, na ge ne suwal Efrayim le ge njal go. Na sḛ a Yeroham vya ne, Elihu báŋ, ne vuwal pe ge Tohu ne go, pehir ge Suf ne zi. 2Ka da ne gwale ma azi. Ge ɗu dḭl Hanatu, ge azi dḭl Penina. Penina tol vya ma, amma Hanatu be tol vya to. 3Del ge daage zi, ndu son mbe ka ɗage ne na suwal go mbo Silo, ndwara mbo uware Bage ɗiŋnedin, Bage naa ge mbal pore ma ne, ne mbo ke tuwaleya hon na me. Ndi Eli vya ma jwak, Hofni ma ne Pineyas, a naa ge a ne ka ke tuwaleya hon Bage ɗiŋnedin Silo go ma ne.
4Dam ge Elkana ne ke tuwaleya go ɗe, ka var Penina ma ne na vya ma duur varra pe ɗu, 5amma ka hon Hanatu duur varra pe azi, ne jo̰ Bage ɗiŋnedin ba̰ na gisil puy ɗe, na laar wa̰ na gḛ ge be to. 6Na kone Penina ka e na laar vḛneya Dok ta, ne na ne ba̰ na gisil pe. 7Del ge daage zi swaga ge Hanatu ne mbo ya zok ge Bage ɗiŋnedin ne zi, Penina ka e na laar vḛneya mbe go no. Hanatu ka kat ne fyaso, ka kuri be zam kaŋzam. 8Elkana ge na obe, ka jan na go: «Hanatu, kyaɗa mo ba ka fyalla go, mo ba ka tele tene be zam kaŋ ɗaa? Kyaɗa mo ba ka vḛne mo laar go ɗaa? Mbi sḛ no puy ɗe, mbi te be waɗe vya ma wol ge mo te ya kat ne na to’a?»
Kaɗeya ge Hanatu ne
9Dam a̰me ɗu swaga ge a ne á ne kaŋzam zamma ne njotɗa go ɗe, Hanatu ɗage mbo zok ge Bage ɗiŋnedin ne zi ya. Ndi, Eli bage ke tuwaleya ne katɗa ne na hool go, zok ge Bage ɗiŋnedin ne wak go. 10Ne jo̰ Hanatu ka da ne tiiɗiya gḛ ɗe, ka á tene kaɗe Bage ɗiŋnedin ne fyaso. 11Ke wak tuli, jan go: «O! Bage ɗiŋnedin, Bage naa ge mbal pore ma ne! Ndi yál njotɗa ge mo kale ne njot, dwa ne mbi, kaage mo vyale ne mo kale to, kadɗa mo hon mo kale vya son ya ɗu ɗe, mbi mbo hon mo na ne ndwara dedet ne mo temel pe, ndu mbo é sóy na pala digi sot na uzi to bat.»
12Ne jo̰ ke kaɗeya Bage ɗiŋnedin ndwara se kaal ɗe, Eli ka ndil na wak emseya. 13Hanatu ka emse na wak jan fare, amma kat ge ndu a̰me za̰ na fare ge ne jan to. Eli ka dwat go, na fere fere. 14Eli jan na go: «A ma swaga go, mo jiya̰l mbe ba syat ne mo ndwara zi ɗaa? Mbo ne mo fereya mbe uzi ya.»
15Hanatu gwan ne na janna go: «Mbi bageyal, mbi be fere fere to, mbi be njot jiya̰l oyo̰r ko jiya̰l a̰me ge pore to, mbi da ne tiiɗiya gḛ ge be to. Mbi ben ne go mbi dulwak hon Bage ɗiŋnedin. 16Kaage mo ndil mbi dimma ca ne gwale ge bernde go to, kadɗa mo kwa mbi ke kaɗeya kaal tata ɗe, a ndwara go mbi da ne tiiɗiya ma ne kḭḭmi ge be to.»
17Eli gwan ne na janna go: «Mbo kwaɗa, Dok ge Israyela ne mbo hon mo kaŋ ge mo ne kaɗe na.» 18Hanatu jan Eli go: «A kwaɗa, mbi ka̰ mbi saareya ma ya mo pal!» Hanatu gwan mbo zam kaŋzam. Na haŋgal e se, na ndwara er. 19Kwap cya̰wak vḛ, Elkana ma ne na yàl mwaɗak a mbo Bage ɗiŋnedin ndwara se ya, mbo uware na. A gwan’a bama yadiŋ suwal Rama go. Elkana ɓan ne na gwale Hanatu, Bage ɗiŋnedin za̰ na kaɗeya. 20Hanatu eme tol vya son, a hon na dḭl Samiyel, ne da pe, jya̰ go: «Mbi kaɗe na da ne Bage ɗiŋnedin tok go#1:20 Samiyel: Na dḭl mbe pe wanna go «Kaɗeya ne Dok ta». .»
Hanatu hon Dok na vya
21Del ge ɗogle go, Elkana ma ne na yàl mwaɗak a gwan mbo Silo ya, ndwara mbo ke tuwaleya ge del wak ne hon Bage ɗiŋnedin ne na ne ke wak tuli go. 22Del mbe no pul zi, Hanatu be mbo dagre ne na obe ma to, jya̰ na obe go: «Mbi ɓyare tele mbi vya ne pam wak go ɓya, go no mbi ba gene na mbo Bage ɗiŋnedin ndwara se ya, na ba ga yago ne ndwara.» 23Na obe jan na go: «Ke kaŋ ge mo ne kwa ge kwaɗa kerra, gá go go ɗiŋ mo tele mo vya ne pam wak go ɓya. Bage ɗiŋnedin me na wi na wak tuli.» Hanatu ga hon na vya pam ɗiŋ tele na ne pam wak go.
24Swaga ge ne tele na ne pam wak go, gale ne jyale, Hanatu wan nday pool ge del ataa ɗu, abe swáma koro wol, her oyo̰r jiya̰l tóól ɗu, gene nama mbo Silo, zok ge Bage ɗiŋnedin ne zi ya poseya ne na obe. 25A tyare nday pool digli tuwaleya, a wan vya no hon Eli me. 26Hanatu jan Eli go: «Mbi bageyal zá̰ mbi gale! A mbi, gwale ge dḛ ne mbo ya mḛ́ mo ziyar go kaɗe Bage ɗiŋnedin ne, ne jo̰ mo gale da ne ndwara, fareba mbi gwale mbe ne. 27Da ne vya no pe mbi ka ke kaɗeya no. Bage ɗiŋnedin ho̰ mbi kaŋ ge mbi ne ɓyare ne na ta no me. 28Uwale, mbi sḛ me, mbi gwan ne na hon Dok. Na gá ge na ne dedet.» Ta iya uwale, a gur bama koo ma Bage ɗiŋnedin ndwara se.
Currently Selected:
1Samiyel 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.