1Samiyel Fare pala hageya
Fare pala hageya
Samiyel a ndu ge Maktub ge zḛ ge ge Samiyel ne ne jan na fare gḛ ne. Na sḛ ndu ge kun sarya ge go̰r dab ge suwal Israyela go ne. Samiyel be kat ndu ge kun sarya ɗeŋgo to, amma ka bage ke tuwaleya ne anabi me. Ka ker temel mbe ma no Israyela go, a go no ka é Israyela vya ma gwan’a Dok ta no. Na sḛ ka suwal Israyela pal mwaɗak. Ago ka za̰ fare janna ge Dok ne, ba ka zwagre na hon Israyela vya ma.
Swaga ge ne dé ya sabar ge na ne zi, Israyela vya ma kaɗe na go na ho̰ bama gan bama pal dimma ne pehir ge ɗogle ma go me. Nama fare eleya mbe be za̰ na tuli to, amma ne Dok ta, Samiyel e Sawul gan ge Israyela go no. Amma Samiyel be ya̰ nama baŋ be ge ŋgay nama haŋle ge ndu ba ya̰ Dok ba ɓyare na kon ndu dasana kat na pal gan pe to. Ago Dok jya̰ na go, Israyela vya ma ɓyare to be na to, amma nama ɓyare to na ge Dok, na ka nama pal to. Go̰r go gwan naŋge Dawda kat gan Israyela pal no uwale.
Maktub mbe wan katɗa ge Samiyel ne pe temel kerra ge na ne zi, ne temel kerra ge gan Sawul ne ma ge ne e nama ne Samiyel za̰ ta to pe, ne za̰ ta to ge Sawul ma ne Dawda ne pe me.
Maktub ge zḛ ge ge Samiyel ne ŋgay go Dok gan ge na ɓase ma ne ne ɗu kikit. Muluk kerra ge kwaɗa, a ndu ge ne gwan ne na pala Dok pe se.
Maktub ge Samiyel ne ma jwak zaŋgal a ka ɗu, a go̰r go gale a varse na se no pe azi.
Varseya ge maktub ge zḛ ge ge Samiyel ne
1- Tolla ne temel kerra ge Samiyel ne (1—7)
2- Gan eya suwal Israyela go (8—12)
3- Pore mballa ne pala gwanna se to ge Sawul ne (13—15)
4- Naŋgeya ge Dawda ne ndwara e na gan (16—31)
Currently Selected:
1Samiyel Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.