1Gan ma 21
21
Siya ge Nabot ne
1Go̰r kaŋ mbe ma no go, ndi kaŋ ge ne ke. Nabot, ndu ge suwal Jizreel ne, ka da ne gaaso ge oyo̰r ne suwal Jizreel diŋ, gwa ne Achab, gan ge Samariya ne yàl. 2Achab jan Nabot go: «Ho̰ mbi mo gaaso oyo̰r mbe mbi ba ga gar na, ago gaaso mbe gwa ne mbi yàl. Na byalam go, mbi ma̰ hon mo gaaso ge oyo̰r ne ge siŋli waɗeya, kadɗa mo ɓyare ya, mbi ba hon mo bware na ye pal.» 3Nabot gwan ne Achab janna go: «Ge Bage ɗiŋnedin ndwara se, mbi ne pool ge hon mo joo ge mbi bá ma ne to.» 4Achab gwan di ndwara suya leɗet, ne fare ge Nabot ndu ge suwal Jizreel ne ne jya̰ na pe. Jya̰ na go: «Mbi ne pool ge hon mo joo ge mbi bá ma ne to!» Mbo fí na saŋgal go, saŋge na ndwara babaŋre zi ya, kuri be zam kaŋzam. 5Na gwale Yezabel mbo ya na ta, ele na go: «Kyaɗa mo ndwara ba su go leɗet, mo ba kuri kaŋzam ɗaa?» 6Jan na gwale go: «Mbi jya̰ Nabot ndu ge suwal Jizreel ne go: ‹Ho̰ mbi mo gaaso oyo̰r yatɗa, ko kadɗa mo ɓyare ya, ya̰ mbi ho̰ mo gaaso ge oyo̰r ne ge ɗogle na byalam go›. Amma na sḛ gwa̰ ne mbi janna go: ‹Mbi ne pool hon mo mbi gaaso oyo̰r to›.» 7Na gwale Yezabel jan na go: «Se no, te be mo ka gan ne suwal Israyela pal ne to’a? Ɗage digi, za kaŋzam iya mo laar se, mbi ma̰ hon mo gaaso ge Nabot, ndu ge Jizreel ne mbe.» 8Yezabel njaŋge maktub ma ne dḭl ge Achab ne, é logom ge Achab ne na ta, teme nama hon naa ga̰l ma ne naa ge tok pool ma ge a ne Nabot ma ne ka ne suwal ge ɗu go. 9Njaŋge maktub mbe ma zi go: «He me dam ɗu ne asiyam pe, é me Nabot naa ndwara zḛ, 10é me naa ge bernde ma azi katɗa na ndwara zi, nama ka e fare na pal, janna go: ‹Mo sá Dok ma ne gan›. Go̰r go, wa̰ me na, gene me na suwal go̰r zum ya, mbá me na ne njal, na su.»
11Naa ge ne suwal ge Nabot ne go mbe ma, naa ga̰l ma ne naa ge tok pool mbe ma ke fare ge Yezabel ne njaŋge ma pal tem. 12A he dam ɗu ne asiyam pe, a e Nabot naa ndwara zḛ. 13Naa ge bernde ma azi, a mbo ya kat Nabot ndwara zi, a ka e fare na pal janna go: «Nabot sá Dok ma ne gan.» A wan na, a gene na suwal go̰r zum ya, a mbal na ne njal, su. 14A teme naa mbo jan Yezabel go: «A mbá Nabot ne njal, su go.»
15Swaga ge Yezabel ne za̰ go, a mbal Nabot ya uzi ne njal, na su ya go ɗe, jan Achab go: «Ɗage digi, ame gaaso oyo̰r ge Nabot, ndu ge suwal Jizreel ne mbe, na ge ne kuri go, na hon mo na yatɗa to. Ago Nabot ne dunya zi to, su go.» 16Swaga ge Achab ne za̰ go Nabot, ndu ge Jizreel ne su go ɗe, ɗage, dol tene viya̰ go ndwara mbo ame gaaso oyo̰r mbe.
Iliya waage Achab ma ne Yezabel yál ge ne mbo ɓol nama ya
17Swaga mbe go, Bage ɗiŋnedin jan Iliya, ndu ge suwal Tisbe ne go: 18«Ɗage, mbo ɓol Achab, gan ge Israyela ne, na ge ne ka ne suwal Samariya go, ya gaaso oyo̰r ge Nabot ne zi ya, mbo na zi ya ndwara go na ba ame na. 19Mbo jan na go, Bage ɗiŋnedin jan go: Mo hṵ siya, mo gwan ɓyare ame na joo uwale ya’a? Jya̰ na go uwale: Bage ɗiŋnedin jan go: Swaga ge gú ma ne ɗa Nabot swama go, gú ma mbo ɗar mo swama go me.» 20Achab jan Iliya go: «Mbi ndu ge ho̰l, mo ɓol mbi ya go’a?» Iliya jan na go: «Mbi ɓol mo ya go. Ne jo̰ mo ho̰ tene ke sone Bage ɗiŋnedin ndwara se, 21za̰ fare ge Bage ɗiŋnedin ne jan: Mbi mbo gene wak nonna ya mo pal, mbi mbo gisi mo uzi, mbi mbo burmi Achab pehir uzi ne Israyela go, ko vya twala, ko mo̰r mbo ga to bat. 22Mbi mbo ke mo yàl dimma ca ne mbi ne ke ne Yerobowam ge Nebat vya yàl go, ne mbi ne ke ne Baecha ge Ahiya vya yàl go me. Ne da pe, mo vḛne mbi laar, mo é Israyela vya ma ke sone. 23Ne Yezabel pe, Bage ɗiŋnedin jan go: Gú ma mbo zam Yezabel ge suwal Jizreel gulum kiya̰r go#2Gan 9:36.. 24Ndu ge ne Achab diŋ ge ne mbo su ya suwal diŋ, gú ma mbo zam na, bage ne mbo su ya ful zi, njoole ma mbo zam na.» 25Ndu a̰me ge ne ho̰ tene ke sone Bage ɗiŋnedin ndwara se dimma ne Achab go to. Ago na gwale Yezabel ka é na kerra ne. 26Ke kaŋ ge sone kakatak, ka mbo ke uwareya hon kaŋ sḭḭm ma, dimma ne Amoriya ma ne ka kerra go, nama ge Bage ɗiŋnedin ne ya̰ nama Israyela vya ma ndwara zḛ uzi ma.
27Swaga ge Achab ne za̰ fare janna ge Iliya ne, taabe na ba̰r ma ne ta uzi, kan kasigir na ta, wan asiyam. Ka dwam ne kasigir mbe na ta, ka tar na koo boleya anna viya̰ go me. 28Bage ɗiŋnedin jan Iliya, ndu ge suwal Tisbe ne go: 29«Ndi, Achab gwan ne na pala ya mbi pe se. Ne jo̰ Achab gwan ne pala ya mbi pe se, mbi mbo gene yál mbe ya na pal swaga ge na sḛ gale ne ndwara go to, amma mbi gene yál mbe na yàl pal zaman ge na vya ne zi.»
Currently Selected:
1Gan ma 21: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.