1Yohanna Fare pala hageya
Fare pala hageya
Maktub ge Yohanna ne ma ataa mwaɗak, a ndu ge ɗu njaŋge nama ne. Njaŋge nama ge suwal Efesus go, kaŋ ge del 85 mbo 95 go go.
Ge 2Yoh ma ne 3Yoh, bage ne njaŋge maktub mbe ma ŋgay tene go na «ndu ga̰l ge temel» ne (2Yoh 1, 3Yoh 1). Ge 1Yoh 1:1-3 zi, bage ne njaŋge maktub mbe ke naa kwarra go, na kwa Jeso Kris da ne na ndwara fa̰, na tá na ne na tok, na jan fare ge kaŋ ge na ne kwa na pal. Ago ne fare janna mbe ma no ta, nee kwa go, «ndu ga̰l ge temel» mbe no, á̰ dagre ne Jeso ne baptisma ge na ne ya day ɗiŋ mbo ya siya ge na ne go (Tkm 1:21-22). A na ge ne njaŋge fare ge Kwaɗa ge Jeso ne uwale. Ndu mbe a Yohanna ge Jeso ndu ge ame hateya, na kondore ge laar wanna.
Yohanna njaŋge na maktub mbe ma swaga ge naa ge Kris ne ma ne ka iigiya ma zi go. Ago naa ka ɗaŋgre ta go Jeso be Kris ne to (1Yoh 2:22), a ka jan go Jeso be mbo ya duur naa dasana ma zi to (1Yoh 4:2, 2Yoh 7), a ga ya be ge ŋgay laar wanna ta ta (1Yoh 2:4,9), mborra ge nama ne zi, a gwan fut bama sone ma zum to (1Yoh 1:8,10).
Ge Maktub ge zḛ ge ge Yohanna ne zi, Yohanna moɗege naa ge Dok ne ma go nama ka ne ba̰a̰n ge fareba ne Dok ne na vya Jeso Kris me, na ge ne e nama laar wan bama ná vya ma. Uwale, gace naa ge a ne hon hateya ge sone ma ndwara ya̰me naa ne viya̰ pul ge dosol go.
Swaga e na fare pe janna go, Yohanna moɗege naa ge hon fareba ma go nama koy kat ba̰a̰n dagre ne Dok Jeso Kris, na ka ba̰a̰n ne ta me. Go mbe no, nama koy hateya ge nama ne ɓo na ne naa ge a ne kwa Jeso Kris ne bama ndwara ma ta kwaɗa, nama ka mborra kwaya̰l zi, ne jo̰ Dok kwaya̰l. Swaga mborra kwaya̰l zi, nama zi, nama koy laar wanna (1:1—2:17). Ne (2:18-29) go, Yohanna waage mborra ge bage ho̰l ge Kris ne ya, na ge hale, ge ne jan go Jeso be Kris ne to. Ne (3:1-24) go, ŋgay dir ge vya ge Dok ne ge fareba ne. Kaŋ ge ne ŋgay go naa ge hon fareba ma Dok vya ma ne, a mborra ge nama ne ge dosol ge Kris zi, ne laar wanna ge nama ne ta ta me. Swaga ge ne ŋgay nama viya̰ ge varse fare ge fareba ma ne fare ge hale (4:1-6), Yohanna gwan moɗege nama ge fare ge laar wanna ne pal no ta uwale. Ago ndu ge ne laar wanna a Dok vya ne, ne jo̰ laar wanna a ge Dok ne ne (4:7-21). Á na fare pe da ne fare ge hon fareba ne, na ge ne hon nee halla kaŋ ma zi pet (5:1-21).
Maktub mbe hate nee fareba honna ge hatal. Ago ndu ge ne ho̰ fareba ge ne tol tene go na ndu ge Dok ne ne, ka kwane na ná vya ma, na sḛ kwa Dok to. Amma Dok kerra ge fareba, a laar wan ná vya ma, koy eya ge Dok ne, abe tene uzi ne sone ta. Uwale hate kugi naa ge ne hon hateya ge sone ma.
Currently Selected:
1Yohanna Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.