Rômiunut 1

Oᴋautsit tussarnertut Kristusemik pitsartuneᴋarput inuit ilûnaita piloriktitsungnarlugit. Gûdib sângane pasijaksaungitoᴋangilaᴋ. Nalojut idluarneᴋanginingat oᴋautauᴋârpoᴋ.

1Pauluse Jêsusib Kristusib kivganga, perᴋojaumajoᴋ Apostelioᴋovlugo, anerimajoᴋ oᴋâlaᴋovlugo oᴋautsinik tussarnertunik,

2Tamakkoa (Gûdib) nalautaijoᴋotimigut sivorngagut angerutigilaungmagit aglangne hailigine,

3Ernine pivlugo, (Davidib kinguvânginit erniangojoᴋ uvinikut,

4Pitsartunermulle nalonairsimajoᴋ Gûdib ernerijanga, Anernikut ivjornaititsijokut, makininganit toᴋungajunit,) tagva Jêsuse Kristuse Nâlegavut;

5Tâpsomunga saimartauvluta Apostelingortitauvogut nalojune ilûnaine, okpernikut nâlaktungortitauᴋovlugit tâpsoma attinganut;

6Tâpkoa iilipsetauᴋ illagivâse, Jêsuse Kristusemut ᴋaiᴋojaumajose.

7Rômamêtunut tamainut, Gûdib nagligijanginut ivjornaitunullo ᴋaiᴋojaumajunut: Gûdib Atâtapta Nâlekablo Jêsusib Kristusib saimarsautingata ulapirsautingatalo illagilisetôᴋ!

8Sivorlermik Jêsuse Kristusikut Gûdimnut ᴋujalijutigivapse tamapse, okpernise oᴋautigijaungmat silaᴋsoarme ilûnâne.

9Gûdib (kivgartortama anernipkut, Erningata oᴋausinginik tussarnertunik oᴋâlavlunga,) ᴋaujimavânga, sorairnanga erᴋaumagapse,

10Tuksiarnimnelo ᴋenutsainarlunga, tikiluse ᴋanga pitjuteᴋarniarmangârma, Gûdib pijomajanganut.

11Kipiniarama takojomavluse, tunergumik anernelingmik aitortoromavluse, nakoᴋsititaulerᴋovluse;

12Imaipoᴋ: illagiluse manigortauᴋatigigumavluse okpernipsingnut okpernimnullo, okpeᴋatigêgapta.

13Naloᴋojomangilapsele ᴋatangutikka, kajusimaᴋattarlunga tikitsomalaurapse issumapkut, ajungitomik pititsijomavlunga ilipsingnetauᴋ, sorlo nalojune assipsingne; agviartauᴋattarlungale mâna tikidlugo.

14Grîᴋinullo Grîᴋiungitunullo, illisimajunullo illisimangitunullo kivgartortuksauvunga.

15Taimaimat ajungitamnut pijomavunga, oᴋâlajomavlunga oᴋautsinik tussarnertunik ilipsingnuttauᴋ Rômamêtose.

16Oᴋautsit tussarnertut Kristusemik kangusûtiginginapkit; pitsartuniongmatta Gûdemit piloriktilugit ilûnaita okpertut tâpkununga, Jûdit sivorliovlutik Grîᴋillotauᴋ.

17Tamakutigûna nalonarungnaititaungmat idluarsititauneᴋ, nâmagijaujoᴋ Gûdib sângane, tamanna okpernermit okpernermut pijoᴋ, sorlo aglaksimangmat: Idluartub okpernine inôtiginiarpâ.

18Gûdib ningausia ᴋilangmit saᴋᴋermat inuit ajortulininginut idluitulininginullo tamainut, mikseᴋârnermik noᴋᴋangatitsênartut idluitulidlarnermut.

19Gûdeᴋartomik nalojoᴋangilaᴋ tâpkonane; Gûdib mattominga nalojungnaitilaungmagit;

20Gûdib ilinganinga takuksaungitoᴋ, tamadja ajugaᴋangininga Gûdioningalo issoᴋangitoᴋ silaᴋsûb pingortitautainarninganit takuksaungmat, piniarnerit ullernaigijaukpatta; taimaimat pasijaungijutiksaᴋangilat.

21Gûdeᴋartomik ᴋaujimagalloarlutik, nertornagolo ᴋujagilaunginamitsuk Gûdetut, issumamikut piungitoᴋsôlerput, ômatingillo silaitut tâᴋtoᴋsôlerput.

22Silatunasugigamik, silaitoᴋsôlerput;

23Gûdiblo asserojuitub ânanauninga mumilauᴋpât inub asserortuksab tingmitjallo nergjutillo pâmgortullo adjinginut.

24Taimaimat Gûdib allarpait kataktilugit ômatingita ikliguninginut, maᴋojungnartunut, timitik ingmingnut kangunartilugit.

25Taipkoa Gûdib mikseᴋârninga mumilauᴋpât saglunermut, pingortitarlo nertorlugo kivgartornersarilauᴋpât Pingortitsijomit; tâmna nertortauvoᴋ issoᴋangitomut. Amen.

26Taimaimat Gûdib allarpait kataktilugit ikligunernut; arnangit atornitik kiglormut atornerluklugo pingmatta.

27Taimaktauᴋ angutit arnaᴋ atorungnairlugo, ingmingnut êgiangusadlarlutik, angut angumut kangunartulilauᴋput tamadlarnitik pivlugit akkilertaudlarlutik ingmingne, taimaitaujariaᴋarmatta.

28Sorlo Gûde illitarivlugo pijariaᴋarasugilaungimatta, Gûdibtauᴋ allarivait kataktidlugit erᴋarsautiâlungnut, mamainartulerᴋovlugit;

29Idluitunik tamainik tattadlutik, ikligudlarnermiglo, uivêdlarnermiglo, pijomatudlarnermiglo, ningarnermiglo, ômisungnermiglo tattadlutik inuarosungnermiglo, annâtôtisungunermiglo, terliaᴋatainermiglo, kigguitojoᴋsôlarmiglo;

30Pasikliluînartoᴋsôlarmiglo, Gûdemik nachojoᴋsôlarmiglo nalangaitoᴋsôlarmiglo, piojorijoᴋsôlarmiglo, piblingaitoᴋsôlarmiglo, asserorsailarmiglo, angajoᴋâmingnik tapatojoᴋsôlarmiglo;

31Silaitoᴋsôlarmiglo, okpernaitoᴋsôlarmiglo, naglingitoᴋsôlarmiglo saimajuitoᴋsôlarmiglo, takupsoajuitoᴋsôlarmiglo.

32Taipkoa Gûdib idluarninganik ᴋaujimagalloarlutik (taimailiortut toᴋotaksaungmatta,) nangmineᴋ taimailiortuinangilat assitigle taimailiortut ᴋuviagivait aglât.

Currently Selected:

Rômiunut 1: LIHB08

Highlight

Copy

Compare