Numbers 9
9
1Nalekablo Mosese oᴋarvigivâ sunaᴋajuitome Sinaime, jârib aipangata taᴋᴋingita sivorlerpângane, nunamit Egiptenemit aularningita kingorngane, oᴋarlune:
2Israêlikut aularviksiorlit neliuningane perᴋojaujome.
3Taᴋᴋib tâpsoma uvlungita 14ingane, unnûk tuglerêk akorngangne uvloᴋsiorutigijaksarivase neliuningane perᴋojaujome; perᴋojat maligaksauᴋojallo ilûnaita tâmna pivlugo maliklugit, uvloᴋsiorutigijaksarivase.
4Mosesiblo Israêlikut oᴋautivait aularviksiortuksaugamik.
5Aularviksiorpullo taᴋᴋit sivorlerpângane uvlut 14ingane, unnûk tuglerêk akorngangne, sunaᴋajuitome Sinaime; Nâlekab perᴋojangit tamaita Mosesemut maliklugit; taimailiorput Israêlikut.
6Inuᴋalauᴋporlo ivsornartitaujunik inuk toᴋungajoᴋ pivlugo, taimaimallo aularviksiorᴋataujungnangilat uvlorme tâpsomane; tâpkoalo Mosesib Aroniblo sânganôrput uvlorme tâpsomane.
7Oᴋautilugiglo: Ivsornarpogut inuk toᴋungajoᴋ pivlugo; suna pivlugole agviartauvitâ tunitjiᴋataujungnarluta Nâlekab tunergusiarijaksanganik neliutome perᴋojaujome Israêlikut akornganê?
8Mosesiblo oᴋautivait: Utaᴋileritse, tusarungnarᴋovlunga sumik Nâlegaᴋ perᴋojiniarmangât pivluse.
9Nalekablo Mosese oᴋarvigivâ, oᴋarlune:
10Israêlikut oᴋarvigikit, oᴋarlutit: Ilapse ilangat kinguvâpselônêt ilangat ivsornarpat toᴋungajoᴋ pivlugo, ᴋaningitoliarsimakpallônêt, sulle aularviksiortuksauvoᴋ Nâlekamut:
11Taᴋᴋit aipangata uvlungita 14ingane, unnûk tuglerêk akorngangne uvloᴋsiorutigijaksarivât; nerrijaksarivât niaᴋôjarmik pubjusauteᴋangitomik perortuniglo sungarnitunik aipiujaᴋartilugo;
12Ilangalônêt torᴋoraksarilungilât ᴋaupamut, sauningitalo neliat navigaksaringilât; maligaksat tamaita aularviksiorutiksaᴋ pivlugo maliklugit uvloᴋsioraksarivât.
13Inugle ivsornartitaungitoᴋ aularsimangitorlo uvloᴋsiorᴋatautailijorle uvloᴋsiorvingmik, tâmna avitaujuksauvoᴋ inôᴋatiminit; tunitjilaunginame Nâlekab tunergusiarijaksanganik neliutome perᴋojaujome, tâmna nangmartuksauvoᴋ idluinerminik.
14Takorngartarlo nunaᴋarpat akunapsingne, aularvik siorvingmiglo uvloᴋsiorᴋataujomavlune Nâlekamut, taimailiortuksauvoᴋ perᴋojaᴋ maligaksauᴋojallo aularviksiorvik pivlugo maliklugit; perᴋojatuaᴋartuksauvose takorngartarmullo nunamelo inûlertomut ilingajomik.
15Uvlormelo tupiub napartitauvingane nuvujab tupeᴋ ulikpâ, tagva tupeᴋ kigligiutjineᴋtalik; unnungmallo tupiub ᴋânganêpoᴋ sorlo ikomaujârtoᴋ, uvlâᴋ tikidlugo.
16Taimaitsainarpoᴋ; nuvujab ulikpâ, unnuarmelo ikomaujârtûb.
17Nuvujarlo ᴋangatartitaujarangat tupiub ᴋânganit, Israêlikut ingergarput; inimelo nuvujab noᴋangavigijangane, tagvane Israêlikut tangmârterput.
18Nâlegaᴋ perᴋojingmat Israêlikut ingergarput, Nâlegarlo perᴋojingmat tangmârput: nuvujab tupiub ᴋânganêninga nâvlugo tangmârput.
19Nuvujarlo tupiub ᴋânganêtsainarpat uvlunik unuktunik, Israêlikut nâlekput Nâlekab pijomajanganik, ingergalugatiglo.
20Ilanganelo nuvujaᴋ tupiub ᴋânganêpoᴋ uvlunik ikitunik; tagva Nâlekab perᴋojanga maliklugo tangmârterput, Nâlekablo perᴋojanga maliklugo ingergarput.
21Ilanganelo nuvujaᴋ unnungmit uvlâᴋ tikidlugo tagvanêpoᴋ; nuvujarlo ᴋangatartitaukpat uvlâkut, ingergarput; uvlorle unnuarlo nâvlugo tagvanêtsainarpat, tagva ᴋangatartitautuarpat, ingergarput.
22Adsigêkpoᴋ uvlûk maggûk nâvlugik, taᴋᴋerlônêt nâvlugo, jârelônêt nâvlugo nuvujaᴋ noᴋangamangât tupiub ᴋângane, nûtsuilune, Israêlikut tangmârsimatsainarput, ingergarlugatiglo; ᴋangatartuarpalle, tagva ingergalerivut.
23Nâlekab perᴋojanga maliklugo tangmârterput, Nâlekablo perᴋojanga maliklugo ingergarput: nâlekput Nâlekab pijomajanganik, Nâlekab perᴋojanga Mosesekut maliklugo.
Currently Selected:
Numbers 9: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
