Numbers 21
21
1Kanânemiorlo, Aradib ataninga, seᴋerngane nunalik, tusarpoᴋ Israêlikut majorarmatta nautsertoriartortut apᴋutâgut; Israêlikullo sorᴋsugvigivait, ilangillo aᴋsârnigarilugit.
2Israêlikullo angermarikput Nâlekamut, oᴋarlutik: Inôᴋatigêt tâpkoa tunijomagungne aggamnut, iglugasaksoangit asserormarigomavakka.
3Nâlekablo Israêlikut nippingat tusarpâ, Kanânemiullo tunivait tâpkonunga, tâpkoalo asserormarikpait iglugasaksoangillo; nunalo tâmna atserartauvoᴋ Hormamik.
4Aularpullo ᴋaᴋᴋamit Horemit, apᴋut imarbingmut suvlolingmut sangmijoᴋ atorlugo, nuna Edom ᴋalusariarvigivlugo; inugiartoᴋsuillo tarningita apᴋut sinaungajutigivât.
5Inugiartoᴋsuillo Gûdelo Moseselo oᴋarnilutigivakit, Suna pivlugo tikiutivitigût Egiptenemit toᴋoᴋovluta sunaᴋajuitomê? Niaᴋôjaᴋangimat imeᴋangimallo, tarniptalo nerᴋiksalugasait makkoa ariupait.
6Nâlegarlo ᴋuglugianik ikomatut âniatitsijunik tiliklerpoᴋ inugiartoᴋsuit akornganut, tâpkoalo inuit kêvait; inuillo unuktut Israêlikune toᴋovut.
7Inugiartoᴋsuillo Mosesemut aivut, oᴋarlutiglo: Idluitulidlarpogut, Nâlegaᴋ igvillo oᴋarnilutigigaptik; Nâlegaᴋ ᴋenuvigilauruk, pêjaiᴋovlugo ᴋuglugianik uvaptingnit. Mosesiblo inugiartoᴋsuit tuksiupait.
8Nâlekablo Mosese oᴋautivâ: Kuglugiangoaliorit ikomaujârtomik, napautilugolo napajomut: neliatalo kêjaujûb takonârpago inôniarpoᴋ.
9Moseselo ᴋuglugiangoaliorpoᴋ ᴋaᴋorlermit, napautilugolo napajomut: inûblo kêjaujûb ᴋuglugiarmut ᴋuglugiangoaᴋ ᴋaᴋorliojoᴋ takonârmago inôvoᴋ.
10Israêlikullo ingergarlutik tangmârterput Oboteme.
11Aularlutiglo Obotemit tangmârterput Ije-Abarime, sunaᴋajuitome Moabib nelâne, seᴋiniûb nuilervia sângalugo.
12Tagvangat ingergarlutik tangmârterput naᴋsarme Sâredeme.
13Tagvangallo aularlutik tangmârterput Arnonib akiane, sunaᴋajuitome, Amorikut kiglinganêtome; Arnon kigliongmat Moabemut, Moabib Amorikullo akorngangne.
14Tamanna pivlugo aglangne, Nâlekab sorᴋsungninginik oᴋauteᴋartune, aglaksimavoᴋ: Kêdlarput Sufame, Arnoniblo naᴋsangine,
15Naᴋsablo aksangajângane, Aremut sangmijome, situngajome Moabib kiglinganut.
16Tagvangallo aularput imeᴋtarvingmut, tamadja imeᴋtarvik Nâlekab oᴋautigijanga Mosesemut: Inugiartoᴋsuit katimatikit, tunitjivigijomavakkalo imermik.
17Tagva Israêlikut imgerut tamanna imgerutigivât: Kagvarit imeᴋtarvik; imgerutigisiuk;
18Imeᴋtarvik angajoᴋâᴋsuit aggartangat, erᴋarnartut inungne poagijartangat, perᴋojanik tunitjijûb perᴋojanga maliklugo, ajaupiaᴋotimingnut. Sunaᴋajuitomillo ingergarput Mattanamut;
19Mattanamillo Nahalielemut; Nahalielemillo Bamotemut;
20Bamotemillo naᴋsarmut Moabib nunanganêtomut, Pisgab ᴋânganut, sunaᴋajuitûb saᴋᴋâne.
21Israelikullo tiliklerput aᴋpârtuksanik Sihonemut, Amorekut ataninganut, oᴋartunik:
22Nunat apᴋutigilaulavuttôᴋ; sangujomangilagut perorsêvingmut vaineliksatalingmullônêt; imeᴋtarvit imangat imeromangilavut; ataniuble apᴋutiksauᴋojangagôrômavogut ᴋângiutiᴋârtinata kiglingnik.
23Sihonible Israêlikut apᴋuteᴋarᴋolungilait nunamigut; Sihonible inuᴋotine katersorpait, sunaᴋajuitomullo aivlune Israêlikut opaktoriartorpait; Jahazemullo tikipoᴋ, Israêlikullo sorᴋsugvigivait.
24Saviksoarmullo Israêlikut sâlagivât, nunangalo tiguvât Arnonemit Jabbokemut, Ammonib ᴋitorngangita kiglingat tikidlugo; Ammonib ᴋitorngangita kiglingat sôngomaringmat.
25Iglugasaksuillo tamakkoa tamaita Israêlikut tiguvait; Israêlikullo Amorikut iglugasaksoangit ilûnaita inigivait, Hesbonemelo, iglugasanginelo tamaine.
26Sihonib, Amorikut ataningata, Hesbone iglugasaksoaᴋutigilaungmagit, Moabib atanivininga sorᴋsugvigisimalaungmago nunangalo ilûnât aᴋsârnigarilugo tâpsoma agganginit, Arnon tikidlugo.
27Taimaimat adsiujutigut oᴋarpaktut oᴋarsôngovut: Hesbonemut ᴋaileritse, Sihonib iglugasaksoaᴋotingit senajaulit tungatitaulillo;
28Ikoma anilaungmat Hesbonemit, ikomaksoaᴋ Sihonib iglugasaksoaᴋotinginit: nungutsivoᴋ Aremik Moabeme, poᴋtojut Arnonemêtut angajoᴋânginik.
29Kapianarmêk, Moabe! asserortauvose, Kêmosib inungit; erningit ᴋemâtitauvut, paningillo aᴋsârnigarijauvut Sihonemut, Amorikut ataninganut.
30Pitiktâlauᴋpavut; Hesbon nungutauvoᴋ Dibon tikidlugo, asseroilauᴋpogut Nofa tikidlugo, ilâ, Medeba tikidlugo.
31Taimaimat Israêlikut Amorikut nunangat nunagivât.
32Mosesiblo Jazer nautsertoriartortautipâ, iglugasangillo tiguvait, Amorikullo tagvanêtut ᴋemâtipait.
33Sangulutiglo majorarput apᴋosinekut Basanemut sangmijokut; Ogiblo, Basanib ataningata, opaktoriartorpait, tâpsoma inungitalo, sorᴋsugomavlugit Edreime.
34Nâlekablo Mosese oᴋautivâ: Erksiginiarnago pit; tunimagapko inungillo nunangalo aggangnut; taimailiorvigijaksarivallo sôrlo Sihon, Amorikut ataninga, Hesboneme nunaᴋalauᴋtoᴋ, piniarvigigangne.
35Taimaimat sâlagivât, tâmna erningillo inuᴋotingillo ilûnaita, amiakoᴋarungnaiᴋârtinago; nunangalo nunagivât.
Currently Selected:
Numbers 21: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
