Mattêuse 2
2
Ilisimajut tuksiarveᴋariartorninginik Jêsusemik. ᴋemânermik Egiptenemut. Herôdesib inuarᴋojininganik sorrusiârsungnik. Jêsuse Nazaretemêdlune.
1Jêsuse erniangongmat Betleheme Jûdêamêtome, Herôdese ataniotilugo, ahâk, ilisimajut unangat (nalojut nunanginit) Jerusalemut pivut, oᴋarlutiglo:
2Erniangoᴋamertok Jûdit ataningat nanêᴋâ? Uvlorianga unane takogaptigo, tuksiarvigijartorpavut.
3Ataniub Herôdesib tamanna tussaramiuk ᴋoaksârpok, Jerusalemiullo ilûnatik;
4Ajoᴋertuijoksuillo aglangniglo ilisimajut tamaita katerᴋolerpait, kiglisiniaromavlugit, Kristûse nane inûlerniarnerartaungmangât.
5Ipkoa oᴋautivât: Betleheme Jûdêamêtome. Imak aglaksimangmat nalautaijomut:
6Igvit Betlehem nuname Jûdêame, mingnerpângungilatit iglugasangnit assingnit Jûdêamêtunit; ilingnit pijomârmat Nâlegak inuᴋotiminut Israêlib kinguvânginut ataniojuksak.
7Tagva Herôdesib angigutjilune ilisimajut ᴋaiᴋovait, aperiniarlugit uvloriamik ᴋanga takotitomik.
8Betlehemut aiᴋovait oᴋarlunalo: Aileritse, nutarârsuk aperᴋutigijartorlugo; nenigupsiuglo, oᴋautigisinga, uvangatauk tuksiarvigijartoromagivara.
9Atanek tussarêramitsuk, aularput. Ahâk, uvloriak, unane takojatik sivorlerivât; nutarârsûblo iningata ᴋolânut pigame, nokᴋarpok.
10Uvloriak takolermigamitsuk, ᴋuviasuvaksoadlarput.
11Iglomullo iterlutik, nutarârsuglo anânangalo naipipakit, pâmakterlutiglo tuksiarvigivât, perᴋutitiglo sakᴋerpait, pililâllo goldemik, tippitsiariksaumiglo kutsumiglo.
12Gûdiblo sinnaktomanikut perᴋovait, Herôdesemut uterᴋonagit. Apᴋotigilauktamiglo assiagut nunamingnut angerarput.
13Aularmattale, ahâk, Nâlekab Engelingata Jôsefe sakᴋervigivâ sinnaktomanikut oᴋarlunalo: Makitit, nutarârsuglo anânangalo ilingnut pikik, nunamullo Egiptenemut ᴋemâlerit, taikanêlutillo, uvamnut oᴋautijauᴋârtinak; Herôdesib nutarârsuk toᴋonasuarmago.
14Makiporlo tagva, nutarârsuglo anânangalo ingminut pivak, Egiptenemullo ᴋemâvok,
15Tagvanêlerdlunalo, Herôdese toᴋotsiarivlugo, Nâlekab oᴋausingit nalautserᴋovlugit nalautaijokut oᴋauserijangit: Ernera ᴋaiᴋolaukpara Egiptenemit.
16Herôdese ᴋaujimalerame ilisimajunut tapagijaugame, ᴋaningajâdlalerpok, nutarârsuillo ilûnaita Betlehemêtut erᴋânêtullo, jârilit maggûngnik, nukardlingillo toᴋotaujartorᴋovait, ilisimajut kiglisivigitsialauramigit (inûlervinganik).
17Tagva nalautaijub Jeremîasib oᴋausingit nalautsimalerput, oᴋartub:
18Râmame nippe tussartauvok ogguadlarnek, ᴋeadlarnerlo kajumidlartok. Râhelib ᴋitorngane ᴋeagivait: manigortaujomangilak ᴋitorngane pivlugit, itsungnairmatta.
19Herôdesele toᴋungmat, ahâk, Nâlekab Engelingata Jôsefe sakᴋervigivâ sinnaktomanikut Egipteneme,
20Oᴋarlunalo: Makitit, nutarârsuglo anânangalo ilingnut pikik, Israêliblo nunanganut utilerit; toᴋungmatta nutarârsungmik toᴋotsijomalauktut.
21Makiporlo tagva, nutarârsuglo anânangalo naksardlugik, Israêliblo nunanganut pivlune.
22Tussaumagamiugle Arkelause ataniolertok Jûdêame, atâtane Herôdese innangerdlugo, tâvunga ainermik sivôralerpok. Sinnaktomanikut Gûdemut perᴋojauvlune nunamut Galilêamut ailerpok.
23Iglugasangnut Nazaretemik atelingnut pivlune, tamanna nunagilerpâ, nalautaijut oᴋausingit nalautserᴋovlugit, oᴋartut: Nazaremiomik ateᴋaromârpok.
Currently Selected:
Mattêuse 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.