Lukase 23
23
Jêsusib Pilatusemut kiglisiniartauninganik. Herôdesemut âtauninganik. Barrabasemik. Jêsusib toᴋotaksaunerartauninganik, mitautigijauninganik, kikiaktortauninganiglo, iluvertauninganiglo.
1Ilûnatiglo katimajut nikovilutik Pilatusemut âpât;
2Pasidlalerpâllo oᴋarlutik: ᴋaujimavavut, inuit nâlegungnairtingmagit; ataniviksoarmullo kenaujat nunaliksiutauᴋojaujut tunijauᴋungilait, Kristûseovlunelo atanersoak oᴋartok.
3Pilatusible aperivâ: Jûdit atanerivâtît? Kiovâ oᴋarlune: (Nalâgut) oᴋarpotit.
4Pilatuse ajoᴋertuijoksoarnut inungnullo oᴋarpok: Inuk una pitlaraksaunasugingilara.
5Tâpkoale katsungailutik oᴋarput: Inuit aulatidlalaukpait ajoᴋertûtiminut, Jûdêame ilûnane, Galilêamit pilerame, tamaunga pivlune.
6Pilatusele Galilêamik tussarame, aperivok, Galilêamiôngmangât.
7Herôdesib ataniovinganit pijok tussaramiuk, Herôdesemut âtauᴋovâ, uvlune taipkonane taimnatauk Jerusalemêngmat.
8Herôdesible Jêsuse takogamiuk, ᴋuviasudlalerpok, akunit takojomadlalauramiuk, unuktunik tussaumagamiuk; tatamnartomik tâpsomangat takonajarasugilune.
9Sunatuinarniglo apersorpâ. Kiungilâle sumiglônêt.
10Ajoᴋertuijoksuille aglangniglo ilisimajut tagvanêtut pasivât angijomik.
11Herôdesible sorsuktuksaᴋotingitalo nachogivlugo mitautigivât, annorâmiglo ᴋaᴋortamik atitipât, amalo Pilatusemut utertipât.
12Uvlorme tâpsomane Pilatuse Herôdeselo Ilannârêlerpuk; sivorngane ingmingnut ômisûtilauramik.
13Pilatusible ajoᴋertuijoksuit angajoᴋâllo inugasaksuillo atautsemut ᴋaiᴋovait.
14Oᴋautivlugillo: Inuk una uvamnut ᴋaipase, inungnik nâlegungnaititsijomik oᴋautigijase. Ahâglo, sâpsingne kiglisinialauktara, pasitiksapsingniglo inungmut ômunga nagvâlaungilanga.
15Herôdesetauk pinginivok; tâpsomunga tililaurapse; ahâglo pasitiksarsijoᴋangilak tâpsomane toᴋotsitiksangonermik.
16Tamanna pivlugo sugiârlugo aularᴋojomavara.
17Ilusimitut parngnanairsimavingmêtomik taipkonunga aularᴋojijuksaungmat, aularviksiorvik neliutingmat.
18Tagva ilunamatsiatik nipperᴋortovlutik oᴋarput: Pêruk una, Barrabasemik tunitjivigitugut.
19Tamna parngnanairsimavingmut itertitaumajok, kipalijoksuit ilagilugit, iglugasaksoarne inungmik toᴋotsigamik.
20Pilatusib ama nipperᴋortovlune oᴋautivait, Jêsuse aularᴋojomagamiuk.
21Taipkuale ᴋaggudlarlutik oᴋarput: Kikiaktoruk, kikiaktoruk!
22Pingajuangniglo apersorpait: ᴋanoetomik idluitulilaukâ? Toᴋotaujutiksamik nagvârvigingilara; tamanna pivlugo issaᴋadlarlugo aularᴋojomavara.
23Nippersoarmulle perᴋotsainarpât Kikiaktortauᴋovlugo. Tâpkoalo ajoᴋertuijoksuillo nippersoangit sugalulerpalliadlarput.
24Pilatusib tava perᴋovâ, taimâk pijomangmatta.
25Pijomajangillo maliklugit aularᴋovâ parngnanairsimavingmut itertitaumajok, kipalijoksuit ilagilugit inungmik toᴋotsijok; Jêsusele unnertujutigivâ tâpkoa issumanginut.
26Aularutigamitsuglo, inuk tiguvât, Simonemik atilik Zirênemiok, perorsêvingmit pijok; tâpsomunga kikiaktortauviksak erᴋsuktauᴋovât, Jêsuse maliklugo.
27Inugasaksuillo, arnagasaillo malikpât, oggurivlugolo ᴋeagivât.
28Jêsusible ᴋeviarpait oᴋautivlugit: Jerusalemiut paningit, ᴋeanasinga, ilipsingnigle ᴋitorngapsingniglo ᴋeatitse.
29Ahâgle, neliutsomârpok oᴋauseᴋarviojuksak: Piloridlarput ᴋitorngisuitut, timillo ernilaungitut, iviangingillo amâmagviolaungitut.
30ᴋakᴋâlungnut oᴋaromâlerput tagva: Sittôrvigidlartigut! ᴋakᴋârulangnullo: Uliktigut!
31Napârtok ômak taimailiormatsuk, ᴋanok pannarmik Pijoᴋaromârᴋâ?
32Assîgik maggûk, idluitulijuk, âtauᴋataugivuk Toᴋotauᴋovlugik.
33Tagvungalo ᴋakᴋamut Golgatamik, imaipok niaᴋovinertalingmik taijaujomut tikinamik, tagvane kikiaktorpât, inuartuglo; aipâ talerpiata tungânut, aipâle saumiata tungânut.
34Jêsusele oᴋarpok: Atâtak issumagijungnaivigikit; sulijatik nelongmagit.
35Inugasaksuillo tagvanêtut takonârpat. Angajoᴋâllo inuit ilagivlugit mitautigivât, oᴋarlutik: Assine ikajulaukpait, ingaminik piulile, Kristûseogune, Gûdib anerijanga.
36Sorksuktuksattauk mitautigivât, ᴋanilerlugolo sêrnartomik âtsivigivât.
37Oᴋarlutiglo: Jûdit atanerikpatit, ilingnik nangminek piulidlarit.
38Aglaittauk nipitipait ᴋollânut, Grîᴋillo, Latainerillo, Ebrêerillo oᴋausinginik, imaitut: Jûdit ataningat.
39Idluitulijugle aipangata nivingaᴋatingata mitautigivâ oᴋarlunelo: Kristûseoguvit, ilingnik nangminek piulidlarit, uvaguglo.
40Aipangata suadlarlugo oᴋautivâ: Igvittauk Gûde erᴋsigingilat, tâpsotunak (toᴋomut) pitlartaugalloarlutît?
41Uvaguglo pitlartaujariaᴋaramnuk, idluitulilauramnuk; tâmnale idluitulilangilak.
42Jêsusemullo oᴋarpok: Nâlegak erᴋaringa, nâlegauvingnut tikikuvit.
43Jêsusiblo kiovâ: Âhamarik oᴋaupagit, uvlome aiparilârpagit Paradîseme.
44Stundelo 6 olermat, nuname ilûnâne tâktoksôlerpok, stundit 9 ingat tikidlugo.
45Seᴋinerlo ᴋaumajungnairpok, katimaviksûblo upkoksoanga alikpok ᴋettermigut.
46Jêsuselo nipperᴋortovlune oᴋarpok: Atâtak, anernera aggangnut perᴋovara. Taimâk oᴋarame, anernangerpok.
47Angajoᴋâble iliortoᴋalauktut takogamigit, Gûde nakoridlarpâ, oᴋarlunelo: Âhamarik, angut tâmna idluartôlauktok!
48Inuillo ilûnamatsiatik tagvanêtut, tamakkoninga takonârtut, ᴋanorlo iliortoᴋalaungmat, takogamik, sagvitik pataktordlugit uterput.
49Ilûnatigle ilangit, arnallo tâpsominga maliksimajut Galilêamit, alivasiktome nangerput, tamakkoninga tamainik takunârlutik.
50Ahâglo angut, Jôsefemik atilik, kiglisiniarpaktut ilangat, ajungitok issumagiktorlo!
51Tâpsoma issumaᴋatigilaungilait (Jêsuse toᴋoᴋovlugo); tâmna Arimatîamit, Judit iglugasaksoangita ilanginit pijok, Gûdib nâlegauvinganik neriungmijok.
52Tâpsoma Pilâtusemut ailune, Jêsusib timinga ᴋenuarivâ.
53Akᴋartipâ tagva, uvineruksajamiglo imuserdlugo, iluvermullo ilivâ ᴋairtomut ilulimajomut, inungmik ilijiviolaungitomut sulle.
54Uvlok tâmna opalungaijaiviovok, sabbateolilarmelo.
55Arnattauk ilagilugo Galilêamit pijut, malikput, iluvek ᴋemergojartordlugo, ᴋanorlo timinga ilijaulermangât.
56Utilerput tagva, mingoarutiksamiglo tipitsiariksaumiglo opalungaijaijartorput; sabbateotilugoloᴋikᴋarput, perᴋojat maliklugit.
Currently Selected:
Lukase 23: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.