Exodus 5
5
Faraub ᴋununinga. Israêlikut sugaluluartomik siorniortitauvut.
1Kingorngane Moseselo Aronelo oᴋariartorpuk Faraomut: Imâk oᴋarpok Nâlegak Israêlib Gûdinga: Inuᴋotikka aularᴋokit, inuᴋangitome uvamnut uvloksiortuksaungmata.
2Faraub kiovak: Nâlegak taimna kinauvâ, nipinga nâlagaksarigapko Israêlikut aularᴋojaksarivlugit? Nâlegak taimna nalovara, Israêlikullo aularᴋoniatsangilakka.
3Oᴋarpuk: Ebrêerit Gûdingata tikipâtigut. Inuᴋangitomut aularᴋolauktiguttôk uvlut pingasut ingergavigivlugit, Nâlekamut Gûdiptingnut tunerguseromagapta, ᴋanimasiâlungmut saviksoarmullônêt pijaurᴋonata.
4Tagva Egiptenemiut ataningata oᴋautivak: Iliptik, Mosese Aronelo, sôk inuit sulijaksanginit ᴋikartitsomavitikîk? Pijaksaᴋarvipsingnut aituinaritik.
5Faraolo oᴋarpok amma: Takovatik inuit unulualerêrtut nuname, iliptiglo ᴋikarᴋojomavatik aglât sulijaksanginit.
6Faraublo uvlorme taipsomane inuit angajoᴋângit aulatsijingillo perᴋovait oᴋarlune:
7Sivornganetut iliorungnaivluse ivît atortut ivitâlioriamut tunijaksarijungnairpase inungnut; nangminek ivingnik atoraksamingnik katersoijartulit!
8Ivitâlle unurningit, sanajaksarijangit mânna tikidlugo, sanajaksaurᴋoniarivase, ikiglitinagit mikijomiglônêt. Erᴋeasugamik niplialerput oᴋarlutik: Gûdiptingnut tunerguseriartorta.
9Angutit kivgartorvingat sugaluluartitaule, sulijaksanik ajoksarᴋonagit, oᴋautsiniglo uiverijaunartunik kamarᴋonagit.
10Tagva anivut inuit angajoᴋângit aulatsijingillo, oᴋarpullo inungnut: Farao oᴋarpok imâk: Ivingnik tunitjiviojungnairᴋovapse.
11Ilipse nangminek ivingnik katersoijartoritse nanetuinak, sanajaksarijasele ikiglititauniatsangilat.
12Tagva inuit siamalerput Egiptenemut ilûnânut, ivivinernik kippanik katersoilutik ivititut atoraksamingnik.
13Angajoᴋângitale ômaridlarᴋovait oᴋarlutik: Sanajaksarijase pijarêrsigik, uvloinak sanajaksat uvloinak pijarêrlugit sivornganetut iviᴋartitaugapse.
14Israêlikullo aulatsijingit, angajoᴋât Faraub inuᴋotingita ilijangit, anaujaulerput oᴋautjauvlutik: Sôk sanajaksarijase ikpeksarlônêt uvlomelônêt pijarêngipisigîk sivornganetut?
15Tagva Israêlikut aulatsijingit iterput nipliadlarpullo Faraomut, oᴋarlutik: Sôk kivgatit taimailiorvigivigît?
16Ivingnik kivgatit tunitjiviojungnairput, sulele oᴋautjauvogut: Ivitâlioritse! Sunaubvalo, kivgatit anaujauvut; inuᴋotitile idluitulivut.
17Faraole oᴋarpok: Erᴋeasukpose; Erᴋeasugapse ilâ oᴋarpose: Nâlekamut tunerguseriartorta.
18Anititse mânna kivgartoriartorluse. Ivingnik tunitjivioniangilase, ivitâllo unurningit sanajaksarijase sanajaksarivase.
19Tamattomuna Israêlikut aulatsijingit tukisilerput erᴋagijaunginermingnik, oᴋartoᴋarmat: Ikiglititsijuksaungilase ivitât unurninginik, uvloinak pijaksase pijarêraksarivase.
20Faraomit anigamik, Moseselo Aronelo nalaupakit utaᴋijûk.
21Oᴋautivakillo: Nâlekab takonârlitik erᴋartuivlune, ominarsitigaptigut Faraomut kivganginullo, saviksoak tunivlugo agganginut toᴋotaurᴋovluta.
22Mosesib tagva Nâlegak sâvigivâ, oᴋarlune: Nâlegak, sôk inuit ukkoa pilukpigît taimâk? Sôk tilivingâ tamaunga?
23Taimangat, Faraomut oᴋariartorama aterne, inuit ukkoa angiluartomik pilukpait, igvillo inuᴋotitit piulingimarikpatit.
Currently Selected:
Exodus 5: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
