Efêsusemiunut 4
4
Paulusib kaiblarpait atausioᴋovlugit naglingnerme arvertarᴋovlugillo inôsertâme.
1Tagva mâna kaiblarpapse, uvanga ᴋelaksugaujunga Nâlegaᴋ pivlugo, ᴋaiᴋojaumanise malitsiarlugo arvertarᴋovluse, taimak ᴋaiᴋojaugapse,
2Piojorijuiluse tamât, ᴋenuêluselo kamangitsertorluselo, ningarijigêktailititselo naglingnerme.
3Omarigitselo adsigêktomik issumaᴋatsainarluse anernikut, ullapirsautib ᴋelaksûtânut.
4Time atauseᴋ, anerneᴋ atauseᴋ, sorlotauᴋ ᴋaiᴋojaumagapse nerriugijaksaᴋarluse atautsemik ᴋaiᴋojaumanipsingnut.
5Nâlegaᴋ atauseᴋ, okperneᴋ atauseᴋ, baptijut atauseᴋ,
6Gûde atauseᴋ, Atâtagijavullo tamapta, tamainut tâmna Nâlegaujoᴋ, ilunapsigullo, ilupsingnêtorlo tamapse.
7Ilûnatale atunit saimarsaumik tunitsiviovogut Kristusib tunijinermine ôktûtigijanga maliklugo.
8Taimaimat oᴋauseᴋarpoᴋ: Kotsingnermut ᴋongmuartub parngnanairutjaujut aularutivait parngnanairsorlugit, inungnullo tunergutinik tunijivlune. #Img. 68:19.
9Kongmuartorle oᴋautigijaungmat, ᴋanoᴋ tukkekarᴋâ? Imâk: Sivorngagut aᴋᴋalaurametauᴋ nunab ininginut akpasiktunut.
10Aᴋᴋalauᴋtoᴋ taimnaugivoᴋ ᴋongmualauᴋtoᴋ ᴋilait ilûnatik ᴋollerpânginut, tamaita ilumertitsomavlugit.
11Tâpsomalo illangit Apostelingortilauᴋpait, illangille nelautaijungortilauᴋpait, illangit oᴋautsinik tussarnertunik oᴋâlajungortilugit, illangit pairsijungortilugit, ajoᴋertuijungortilauᴋpaillo.
12Ivjornaitut nâmaktungortitauᴋovlugit kivgartûtiksaᴋ sulairijungnarlugo, Kristusib timiksanga âᴋiktauvalliaᴋovlugo;
13Ilûnata tikitsiariluta okpernermut atautsemut illitarsinermullo Gûdib erninganik, angutemariolerdluta Kristusib aglisimaringninga tikidlugo.
14Sorusiojungnairᴋovluta, maliktitut aulatauᴋonata anoremut, tagva ajoᴋertûtsinut sunatuinarnut, inuit nalangaininginut uivêriklerninginullo, pingitsertorlutik tamartinasuarmatigut.
15Uvagulle naglingnerme nalâgôrniarta, aglivalliavlutale ilûnaine tâpsomunga niaᴋôjomut, tagva Kristusemut.
16Tâpsomangat time iluitoᴋ katisimavoᴋ, navgoallo ilûnatik ingmingnut nablisimavut, ikajortigêngnermut; avatillo ilûnatik ingmikôrlutik atornermingnut time aglivalliatipât idluarsarlugo; naglingnermelo tamakkoa tamaita pivut.
17Tamanna pivlugo oᴋarpunga; kigligiutigivlugolo Nâlekame, arvertarungnairᴋovluse nalojutitut assipsitut, piungitunik issumaᴋarlutik arvertartutitut;
18Tarningit tâᴋtoᴋsôvut, inôtsemullo Gûdemit pijomut takorngartautitauvut, nalojoᴋsônermut ilumingnêtomut, ômatimiglo sitijoᴋsôninginut.
19Taipkoa ikpigijungnangitut ingmingnik tunivut ajortulinermut, maᴋojungnartuniglo sunatuinarnik piniarlutik angijomik, pijomatudlarlutiglo.
20Ilipse taimâk ajoᴋertortaungilase Kristusemik.
21Tâpsominga tussarluse tâpsomanelo ajoᴋertortaujomavluse pilaurupse: tagva, sorlo mikseᴋârneᴋ Jêsusemêngmat,
22Inutoᴋaᴋ atorungnairsiuk piusiovalauᴋtut allarlugit, ikligunermut ingminik asseroijoᴋ tamarnartomut.
23Nutângoleritsele issumapse anerningagut;
24Inuktârlo atiniarsiuk, Gûde adsilivlugo pingortisimajoᴋ idluarnerme, ajunginermelo, ivsornainermelo.
25Taimaimat sagluneᴋ iperarlugo mikseᴋârnermik oᴋauseᴋaritse, ilûnase atunit inuᴋatipsingnut; avatauᴋatigêkapta.
26Ningarluse idluituliniarase; seᴋineᴋ nipitsiarinago ningartiluse!
27Sâtanaselo iniksaᴋalertiniarnago.
28Tiglilauᴋtoᴋ tigligungnairle, sanalunele aggangminut ajungitomik piniarle, tunijaksaᴋarᴋovlugo ajoᴋsartunut.
29Oᴋausilungmik ᴋanipsigut anitsitailileritse, idluartomigle oᴋauseᴋarniaritse âᴋiksûtiksamik pijariaᴋartune, tussartune tussarominartomik.
30Gûdiblo Anerninga ajungineᴋ kiksartiniarasiuk, tâpsominga naᴋititsiviomagapse uvlormut piulijauviksamut.
31Kaningaumajârneᴋ, ômisungnerlo, ningarnerlo, nipliadlarnerlo mitauteᴋarnerlo tamât ilipsingnit ungasiktisigik, idluitulinerillo tamaita.
32Inôtsiaritsele illanârêkluse nâpkigosukluselo, issumagijungnaitigêgitselo, sorlotauᴋ Gûdib issumagijungnaivigilaungmase Kristuseme.
Currently Selected:
Efêsusemiunut 4: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
