Daniel 2

1Nebukadnezariblo atanioningata jâringita aipangani Nebukadnezar sinnartômavoᴋ sinnartômanimik; aniningalo ulapitauvoᴋ uinganêrutivorlo.

2Ataniublo ilisimajut, angakoillo, ilisêngniartullo, Kaldêarillo, ᴋaiᴋojauᴋovait, ataniᴋ nalonaijaivigivlugo sinnartômanirijanganik piᴋovlugit. Tikipullo nangilutiglo ataniub sângani.

3Ataniublo oᴋautivait: Sinnartômanimik sinnartômavunga, aniniralo ulapitauvoᴋ sinnartômaniᴋ ᴋaujijomadlarapko.

4Kaldêarit tagva oᴋarput atanimut Siriamiut oᴋausingit atorlugit: Ataniᴋ, issoᴋangitomut inôlaurit! Sinnartômaniᴋ kivgarnut oᴋautigilauruk, tagva tukkigijanga nalonairomavavut.

5Ataniubli kiovlugit Kaldêarit oᴋautivait: Erᴋaumajungnairpara. Nalonaijaivigilungikupsinga sinnartômanimiglo tukkigijanganiglo avgortaulârposi iglusilo atsiviksangortitaulârput.

6Nalonairupsiugli sinnartômaniᴋ tukkigijangalo, uvamnit pilitaulârposi tunergusianiglo piliusianiglo opinautiksaniglo angijunik; taimaimat nalonaijaivigisinga sinnartômanimiglo tukkigijanganiglo.

7Aipanganik tagva akkinikput oᴋarlutiglo: Ataniub kivgani oᴋautiligit sinnartômanimik, nalonaijaivigijomavaptigillo tagva tukkigijanganik.

8Ataniᴋ kiovoᴋ oᴋarlunilo: Nalonangitomik ᴋaujivunga katsungagapsi, malugosugapsi iᴋaumajungnainimnik.

9Sinnartômanili nalonaililungikupsiuk uvamnut, tagva atausênarmik piᴋojaᴋarpoᴋ ilipsingnut pijuksamik; sagloninik tukiᴋangituniglo atuinaruigapsi oᴋausirijomavlugit uvamnut, ilinganiᴋ assiangotsiarivlugo; tamanna pivlugo sinnartômaniᴋ nalonairsiuk uvamnut, ᴋaujiniarpunga tagva nalonaijaivigijungnarapsinga tukkigijanganik.

10Kaldêarit ataniᴋ akkivât, oᴋarlutiglo: Nunaᴋsoarmi inuᴋangilaᴋ nalonaijaijungnartomik ataniub oᴋautigijanganik; ataniᴋalaungilarlo nâlegaᴋalaungilarlônêt pitsartujoᴋalaungilarlônêt taimaitomik ᴋinujomik ilisimajomit angakomillônêt Kaldêaremillônêt.

11Ataniublo oᴋautauᴋojanga tamanna inornadlarpoᴋ, assiᴋangimarikporlo nalonailêjungnartomik tamattominga atanimut, gudit kissimik, tâpkoalo iniᴋangilat uvinilingni.

12Tamanna pitjutigivlugo ataniᴋ ningadlarpoᴋ ᴋaningaumajâdlarporlo, Babiloniblo ilisimajungit tamaita toᴋotauᴋovait.

13Piᴋojaᴋ tagva ᴋaujijautitauvoᴋ, ilisimajullo toᴋotaksauᴋojauvut; Danielilo ilangillo ᴋinipait toᴋotsomavlugit.

14Danielibli silatudlarluni iktôrluganilo Arioki, ataniub udjitortingita angajoᴋângat, toᴋotsijartortoᴋ Babilonib ilisimajunginik, atanitorpâ;

15Niplilunelo Arioki, ataniub angajoᴋângortitanga, oᴋautivâ: Suna pivlugo ataniub piᴋojanga taimâk opaluᴋtortigivâ? Ariokiblo Danieli tamattominga nalonaijaivigivâ.

16Danielili itipoᴋ, atanilo ᴋinuvigivâ issumaksarsiorviksaᴋartitaujomavluni, nalonaijaijungnarᴋovlugo tukkigijanganik atanimut.

17Danielili angirarpoᴋ tagva, ilanilo Hanania, Misailelo, Asarialo ᴋaujitilugit tamattominga;

18Kilaub Gudinga ᴋinuvigivlugo nâpkigijaujomavlutik nalonadlartoᴋ tamanna pivlugo; Danieli ilangillo toᴋotauᴋonagit Babilonib ilisimajungit ilagivlugit.

19Tagva nalonadlartoᴋ tamanna nalonaijartauvoᴋ Danielimut takotitjutikut unnuarmi. Danieliblo ᴋilaub Gudinga nakoridlarpâ.

20Danielilo nipliluni oᴋarpoᴋ: Gûdib attinga nakoridlartauli issoᴋangitomit issoᴋangitomut; ilisimaniᴋ pitsartunilo tâpsoma pigingmagik;

21Tâpsoma naliunirit iliorviksallo ablatsângortipait; atanît pêjarpait, atanîllo ilivait; ilisimaniᴋ tunivâ ilisimajunut, silatunilo tâpkonunga silatunimik ᴋaujimajunut;

22Nalonaijaivoᴋ itijunik nalonartuniglo; ᴋaujimavoᴋ tâᴋtomêtunik, ᴋaumajorlo tâpsomani iniᴋarpoᴋ.

23Kujagivagit nakorilutillo, igvit atâtagilauᴋtama Gûdingat, tunitjivigigamga ilisimanimiglo pitsartunimiglo, mânalo nalonaijaivigigamga ᴋinuarijaptingnik ilingnit; nalonaijaivigigaptigut ataniub pinganik.

24Tamanna pivlugo Danieli itipoᴋ Ariokimut, ataniub assiroiᴋojanganut Babilonib ilisimajunginik, oᴋautilugolo imâk: Babilonib ilisimajungit assirorniarnagit pît, ataniubli sânganut ititikit, atanilo nalonaijaivigijomavara sinnartômanirub tukkigijanganik.

25Ariokib tagva tuavidluni Danieli ititipâ ataniub sânganut, oᴋautivâlo imâk: Naipitsivunga angumik aularutijaujut Jûdab ᴋitorngangita ilanganik, nalonaijainiartomik atanimut sinnartômanirub tukkigijanganik.

26Atanerublo akkivâ, Danielilo, Beltesasarimik attipsâlik, oᴋautivâ: Igvit nalonaijaivigijungnarpingâ sinnartômanimik takojamnik tukkigijanganiglô?

27Danielib ataniᴋ akkivâ oᴋarlunilo: Nalonadlartoᴋ tamanna ataniub nalonairtauᴋojanga ilisimajullônêt, angakuillônêt, ilisimaniᴋsiortullônêt, uvloriaᴋsiortullônêt, nalonaijarungnangilât atanimut;

28Kilangmili Gudeᴋarpoᴋ nalonaijaijomik nalonadlartunik, tâpsomalo ataniᴋ Nebukadnizari nalonaijaivigivâ pijomârtuksanik uvluni kingorlini. Sinnartômanît, niaᴋovîllo takotitjutigijanga iglini inangatilutit, imaipoᴋ:

29Igvit, ataniojotit, inangatilutit issumalauᴋpotit sunanik mattoma kingorngani pijomârtuksanik; tâpsomalo nalonadlartunik nalonaijaijub nalonaijaivigivâtit sunanik pijomârtuksanik.

30Uvangali pivlunga, nalonartoᴋ tamanna nalonaijartaulungilaᴋ uvamnut ilisimaniᴋarnisaugama inôjunit tamainit, imâgli pivlugo, tukkigijanga nalonaijartauᴋovlugo atanimut, ᴋaujimaᴋovlutillo ômativît issumanginik.

31Igvit, ataniᴋ, takolauᴋpotit, ahâglo, inungoaᴋsoaᴋ pitsartudlartoᴋ ᴋibliridlartorlo nangipoᴋ sângni, tautualo iᴋsinadlarpoᴋ.

32Inungoab tâpsoma niaᴋoa goldiovoᴋ ilaᴋangitoᴋ, sagvinga talîgiglo silbiriovuk, ᴋatigâkiglo okpatîgiglo ᴋaᴋorliovuk,

33Niugik kikiangovuk, itigangillo ilangagut kikiangovut ilangagullo maggaᴋ.

34Takonâlauᴋpotit ujaraᴋ saviujartortauᴋârtinago aggangnu-ungitoᴋ, tâpsomalo inungoaᴋ annauvâ itigangitigut kikiangojutigut maggaujutigullo siᴋalilugillo.

35Tagva kikiaᴋ, maggarlo, ᴋaᴋorlilo, silbirilo, goldilo atautsikut sikalijaudlarput, ililutiglo iviksukatitut siᴋalijaumajutitut katjugvingmut aujarmi; annoriblo tiktautipait, ᴋikarviksairutivullo; ujaraᴋlo, inungoab annaunitinga ᴋaᴋᴋaᴋsoangorpoᴋ nuna nâmavlugo.

36Tamadja sinnartômaniᴋ; tukkigijangalo oᴋautigijomavavut ataniub sângani.

37Igvit, ataniᴋ, atanît atanirivâtit, ᴋilaub Gudingata tunitjivigivâtit nâlegauvingmik, pitsartunermiglo, sôngonermiglo, ânanaunimiglo;

38Tamaitalo inuit ᴋitorngangita iniᴋarvingit, ômajut natinamêtut tingmiallo ᴋilaub atânêtut tunivait aggangnut, tâpkonungalo tamainut nâlegangortipâtit; igvit tâmnauvotit niaᴋoᴋ goldiojoᴋ.

39Kinguninilo ataniovikpît assia nuijomârpoᴋ ilingnit pitsakiluartomik; kingornganilo ataniovingmik pingajuangnik ᴋaᴋorliojomik, nunaᴋsoarmi ilûnâni nâligauviojomârtomi.

40Ataniovillo sittamangat kikiaktut sôngotigijomârpoᴋ, kikiak siᴋalitsingmat sâlaᴋarlunilo tamainik; kikiaktut makkoninga tamainik sêmiksijotut siᴋalitsilârpoᴋ sêmiksilunilo.

41Sorlolo takolaurangni itikat inugangoallo, ilangagut maggalirijub magganga ilangagullo kikiak, taimak atanioviojomârpoᴋ aviksimajoᴋ, tâpsomanêtoᴋaromârporli kikiaktut sôngotigijomik, takolauravit kikiak akusimajoᴋarmat maggarmik.

42Sorlolo itikat inugangoangit ilangagut kikiangongmatta ilangagullo maggaungmatta, taimâk ataniovik ilangagut sangijôlârpoᴋ ilangagullo napsiktôlârluni.

43Sorlolo takolauravit kikiak akusimajoᴋarmat maggarmik, taimâk akulârput nangminimingnik inuit kinguvânginut; nipingautijomângilalli, sorlo kikiak maggarlo akulutik ajormanik.

44Atanillo tâpkoa uvlungini ᴋilaub Gûdingata ataniovik âᴋiksoromârpâ, issoᴋangitomut aglât assirortauniatsangitoᴋ, nâligauvioningalo inungita assinginut nûtuksautsangilaᴋ; siᴋalitsilârporli nungutsilunilo ataniovingnik makkoninga tamainik, issoᴋangitomulli itsainaromârpoᴋ.

45Sorlolo takolauravit ujaraᴋ saviujartortaulaungmat ᴋaᴋᴋamit aggangnu-ungitoᴋ, siᴋalilaungmagillo kikiak, ᴋaᴋorlilo, maggarlo, silbirilo, goldilo, Gudib angijoᴋsôjub ataniᴋ nalonaijaivigivâ sunamik mattoma kingorngani pijomârtuksanik: sinnartômanilo nalautsimarikpoᴋ tukkigijangalo nalonangimarikpoᴋ.

46Tagva ataniᴋ Nebukadnezar pâmaktipoᴋ, Danielilo opigivâ, piᴋojivorlo tunitjivigijaksaringmatsuk tunigutinik niᴋiksanik tipitsiariksautiksaniglo.

47Ataniublo Danieli akkivâ, oᴋarlunilo: Nalonangimariktomik Gudise gudît Gudigivât, atanîllo Nâlegarivât, nalonadlartunik nalonaijaijoᴋ, nalonadlartoᴋ tamanna nalonairlugo sapilunginavit.

48Ataniublo Danieli angijôtipâ, tunitjivigilugolo tunigutinik angijunik unuktunik, nâlegangortipâlo Babilonib nunanganut tamânut, angajoᴋâᴋsoangortilâllo Babilonib ilisimajunginut tamainut.

49Danieliblo ataniᴋ ᴋinuvigivâ, Sâdrakilo Mîsakilo Abednigolo aulatsijungortipait Babilonib nunangata pijaksanginik; Danielili ataniub itiviksoanganêtuarpoᴋ.

Currently Selected:

Daniel 2: LIHB08

Highlight

Copy