Apostelit Piniarningit 26
26
Agrippasemut Paulusib kiglisiniartauninganik akiorninganiglo.
1Agrippasele Paulusemut oᴋarpok: Nangminek oᴋatuinariaᴋarpotit. Tagva Paulusib aggane isaklugit, akiorlugit ingminik oᴋâlalerpok.
2Tamanna angijomik ᴋuviagivara atanek Agrippase, uvlome tusâtilutit akiortuksaugama, tamaita Jûdit pasiklerningit uvamnik pivlugit;
3Taimailuarpunga, Jûdit ilusingit aperᴋutingillo ᴋaujimagangne. Tamanna pivlugo tuksiarvigivagit, ᴋenuêrsârlutit tusarᴋovlutit uvamnik.
4Kiglinganit inôtsima ilusingit inuᴋatima akorngane Jerusaleme Jûdit ilûnatik ᴋaujimagalloarpait;
5Ilitarsilauktut uvamnik kiglinganit, kigliguitsijomagunik. Farisêereolaurama; tâpkoa iluseᴋarpakput pijariaᴋortutitsinerpângojunik ilaptingnit Gûdemik kivgartortunit tamainit.
6Mânalo nangerpunga erᴋartortauvlunga, neriukama Gûdib angernerilauktanginik atâtagijaptingnut;
7Tamakkoa kinguvârêt 12 iojut ilapta nerriugivait katsungaitomik, Gûde kivgartorlugo, uvlôtilugo unnuamelo sorairatik. Neriungnek tamanna pitjutigilugo, nagliktara atanek Agrippase, Jûdinut pasijauvunga.
8Sôᴋ tamanna okperijaksaungitotut-inasugijauvâ ilipsingne, Gûdib toᴋungajut tupaktitsungnarmagît?
9Uvangatauk isumaᴋalaurivunga Jêsusib Nazaremiub attinga angijomik akkerartoraksarilugo.
10Taimailiulaukpungalo Jerusaleme, okpertut unuktut parngnanairsimavingmut pitilugit, tamattominga ajoᴋertuijoksoarnut perᴋojaulaurama; toᴋotaksauvlutiglo erᴋartortortaungmatta, ikajulaukpunga.
11Katimavingnelo ilûnaine kappiasuktiᴋattalaukpakka, mitautigijaunartomiglo oᴋarᴋovlugit aksorôtilauktakka, isumairutijotut pinasuarlugit, takorngartattauk iglugasaksoanginut unangmilaukpakka.
12Taimailiorlunga Damaskusemut ingergatilunga, ajoᴋertuijoᴋsoarnut perᴋojauvlunga ajugautitaularmalo;
13Nagliktara atanek, uvlok ᴋeterarmat, apᴋomêtilunga, ᴋaumajok ᴋilangmit pijok takovara, seᴋerngub ᴋaumaninganit ᴋaumaluartok, tamattoma ᴋaumarsarpânga ingergaᴋatikkalo.
14Nunamulle ilûnata ochogapta, nipemik uvamnut oᴋartomik tusarpunga, Ebrêeritut oᴋartomik: Saul, Saul, sok unangmivingâ? Kaput tukarlugo ajoksaleromârpotit (akkerartorlunga).
15Oᴋarpungale: Nâlegak, kinauvêt? Oᴋarpok: Jêsuseovunga unangmijat; makilutille itigangnut tuttît;
16Tamanna pivlugo ilingnut takotipunga, kivgartortortitsomagapkit, oᴋâlakovlutillo takojarnik, takotitsomajamniglo sulle ilingnut.
17Saputijomavagillo inungnit, nalojunillo; tâpkonunga mâna tilivagit.
18Ijingit uititaulerᴋovlugit, taᴋtomit sâgiarᴋovlugit ᴋaumajomut, Sâtanasiblo pitsartuninganit Gûdemut; ajorninginit isumangnarungnaitomik kingormgutijaksamiglo pititauᴋovlugit, ivjornaititaujut ilagivlugit, okpernermut uvamut uvamnut.
19Tâmna pivlugo, atanek Agrippase, takolauktamnik ᴋilangmit pijomik okpingilaungitunga;
20Oᴋâlavlungale sivorlermik Damaskusemêtunut Jerusalemêtunullo, ilûnainullo nuname Jûdêamêtunut, taimaktauk nalojunut, ᴋakialerᴋovlugit sâgiarᴋovlugillo Gûdemut ᴋaᴋialernerublo piniarᴋojanginik idluartunik piniarᴋovlugit.
21Tamanna pivlugo Jûdit tigudlarpânga katimaviksoarme, toᴋonasuardlungalo.
22Gûdible piulingmanga, ovanêpunga sule uvlome, kigligiutjivungalo angijullo mikijullo tusâtilugit, assianiglo oᴋâlananga nalautaijullo Môsesiblo pijoᴋaromârtomik oᴋautigilauktanginik kisênik:
23Tagva Kristusib âniatitaujariaᴋarninganik, sivorlioninganiglo makitsomârtunit toᴋungajunit, kigligiutjininganiglo ᴋaumajomik inungnut nalojunullo.
24Taimagle nangminerminik akiormat, Festuse nipperᴋortovlune oᴋarpoᴋ: Pauluse, ilisimadlarpotit: ilisimanivît silaitipâtit.
25Oᴋarporle: Erdlingnartok Festuse, isumairutingilanga; oᴋarpungale oᴋautsinik okpernartunik silatujuniglo.
26Atanek (Agrippase) nangminek tamakkoninga ᴋaujimangmat, tâpsomunga sivôrananga oᴋarpunga; nalojônasuginginapko tamakkoninga tamainik; sagvangitome tamakkoa pingimatta.
27Atanek Agrippase, nalautaijut okperivigît? Kaujimavagit, okperijatit.
28Agrippasele Paulusemut oᴋarpok: Kajumiktikasakparma Kristusemiôniardlunga.
29Paulusele oᴋarpok: Taimaimangârpit, taimaingimangârpillônêt, Gûdib sângane tusuvunga, kisiviungitoᴋ ilûnatigle uvlome tusartut uvamnik uvaptun-erᴋovlugit, ᴋelarutikka makoa kisêta pinagit.
30Taimâk oᴋalaungmat atanek nikovipok, ataneruserlo, Bernizelo iksivaᴋatingillo.
31Iglerterpullo oᴋaᴋatigêklutik: Angut una toᴋotaujutiksamik ᴋelaksortautiksamiglônêt pilaungilak.
32Agrippasele Festusemut oᴋarpok: Angut una aularᴋojaksaulauktôgalloak, ataniviksoarmut pijomalaungipat.
Currently Selected:
Apostelit Piniarningit 26: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
