Apostelit Piniarningit 22

Paulusib akiorninganik.

1Ilipse angutit ᴋatangutigêt, angajoᴋâllo, akiornikka ilipsingnut tusâsigik.

2Ebrêeritut oᴋarvigingmagit, tusaramitsuk, nipangiluarput. Oᴋarporlo:

3Jûdiovunga, Tarsuseme inûlertunga Zilîziamêtome, tamânele, iglugasaksoarne tamakkonane, inugoijaulaukpunga Gamaliêlib itigangita sângane, ajoᴋertortautsiarlunga sivorlipta perᴋojanginik, Gûdemiglo kivgartorasugilunga, sorlo ilipse ilûnase uvlome;

4Okpertullo taimâk unangmilaukpakka, toᴋomut pititsomavlugit. Kelaksulauᴋpakka, pitilaitalo parngnanairsimavingmut, angutillo arnallo.

5Sorlo ajoᴋertuinerojubtauk angajoᴋâllo ilûnatik kigligiutingmanga; tâpkonangat aglangnik pilaukpunga, Damaskusemullo aivlunga tâvanêtut, ᴋelaksorᴋârdlugit âtsomagapkit Jerusalemut pidlartauᴋovlugit.

6Ingergatilungale, Damaskuse ᴋaglilerlugo, uvlub ᴋeterarningane, ᴋaumajoᴋsûb ᴋilangmit tagvainak ᴋaumarsarpânga,

7Nunamullo ochovunga, nippemiglo tusarpunga, oᴋartomik uvamnut: Saul, Saul, sôᴋ unangmivingâ?

8Kiovarale: Nâlegak kinauvêt? Oᴋautivângalo: Jêsuseovunga Nazaremiok, unangmijat.

9Ingergaᴋatimale ᴋaumajok takogalloarpât erᴋsivlutiglo; uvamnulle oᴋartub oᴋausingit tussangilait.

10Oᴋarpungale: Nâlegak sumik piniartuksauvîk? Nâlekab oᴋautivânga: Makilerit, ainiarlutillo Damaskusemut; tagvane oᴋautjaulârpotit tamainik piniaraksarnik.

11Kaumajuble tâpsoma ᴋaumajoksôninganut tautugungnanginama, ingergaᴋatima agganginut tassiortaulerpunga Damaskusemullo pivlunga.

12Tagvanele anguteᴋalaukpok Gûdemik opigosuktomik perᴋojaniglo nâletsiarlune, Ananîasemik atilingmik, Jûdit ilûnatik tagvanêtut piloriktoᴋotigijanganik.

13Tâpsoma pulârpânga nangerdlunelo sanimne, oᴋautilungalo: Saul, ᴋatangutiga, tautulerit. Tagvainarlo takovara.

14Oᴋarporle: Atâtagijapta Gûdingata anerivâtit pijomajanganik ᴋaujititauᴋovlutit idluartotuamiglo takoᴋovlutit, nipemiglo tusarᴋovlutit, ᴋaninganit.

15Kigligiutsijoᴋotiginiarmatit inungnut ilûnainut takojarniglo tusartarniglo.

16Mânalo sôᴋ tuavingikêt? nikovilerit baptitaulerlutillo, ajornernillo ubvartaulerit, Nâlekablo atinga tuksiarvigileruk.

17Jerusalemullo uterama, tuksiartilungalo katimaviksoarme, uvamnik ikpigijungnailaukpunga, (Jêsuselo) takolaukpara.

18Tagva oᴋautivânga: Tuavitit, aularsârlutillo Jerusalemit, kigligiutsinitit uvamnik okperiniangimagit.

19Oᴋarpungalo: Nâlegak, nangminek ᴋaujimavânga, parngnanairsimavingmut pitilaurapkit unatadlalaitalo okpertut ilingnut, katimavingne tamaine;

20Kigligiutsijoᴋotivîllo Stefanusib aunga kovijaungmat, nangilaukpungatauk saniane, toᴋotauningalo idluaringmilugo, toᴋotsijullo annorângit udsertulauᴋpakka.

21Oᴋautivângalo: Ailerit, tilijomagapkit ungasiktomut nalojunut.

22Oᴋauserle tamanna tikidlugo nâlekpât, nipliadlalerpullo oᴋarlutiglo: Inuk taimaitoᴋ pêrtaule nunamit; idlualungilak inôninga ôma.

23Niplialermattale anorâtiglo pêdlarlugit, sanîllo ᴋongmut egingmagit,

24Angajoᴋâviksûb âtauᴋolerpâ sorsuktuksat igloᴋarvinganut, issakajauᴋolugolo kiglisiniartauᴋovâ, tukisijomagame, suna pivlugo taimâk nipliujormangâtsuk.

25Kelaksormatsugle aklunânut, Paulusib angajoᴋâk saniminêtok oᴋautivâ: Ilipsingne idluaralloarkâ, inuk Rômioᴋ kiglisiniartauᴋârtinago isaᴋadlarlugô?

26Angajoᴋâb tamanna tusaramiuk, angajoᴋâviksoarmut oᴋariartorpok oᴋarlunelo: Udjertulerit piniartarnik, inuk una Rômiôngmat.

27Tagva angajoᴋâviksûb tikipâ, oᴋautivlugolo: Oᴋautinga, Rômiôvêt? Oᴋarporle: Ahaila.

28Angajoᴋâviksoarlo kiovok: Kênaujavaksoarnik akkilêrᴋolunga illagilerpânga (Rômiut). Paulusele oᴋarpok: Uvangale inûlernimnit Rômiovunga.

29Tuavilutik tâva kiglisiniartuksangita allarlugo ᴋemakpât. Angajoᴋâviksoarlo tusarame Rômiôngmat, sivôralerpok, ᴋelaksortauᴋolauramiuk.

30Uvlub aipangane tusaromamarilerame, sôᴋ pasijaungmangât Jûdinut, ᴋelarutjartauᴋovâ, ajoᴋertuijoksuillo kiglisiniartuksallo ilûnaita ᴋaiᴋolerpait, Pauluselo sakᴋertipâ, pitilugolo tâpkoa akornganut.

Currently Selected:

Apostelit Piniarningit 22: LIHB08

Highlight

Copy

Compare