Apostelit Piniarningit 18
18
Paulusib Korintemêninganik. Efêsuse apᴋotigilugo ingerganinganik Jerusalemut, uterninganiglo Antiochiamut Sîriamêtomut-Paulusib ajoᴋertuijartorlune ingerganersoangita pingajuanik, Antiochiamit Asiarârsungmut Europamullo. (Kap. 18:23‒Kap. 21.) Apollusib Efêsusemêninganik.
1Kingorngagut Pauluse Atênemit aularpok Korintemullo pivlune.
2Jûdemiglo tagvane naipitsivok, Akvilamik atilingmik; tâmna Pontuseme inûlertok Italiamit tikeᴋammertok nuliane Prisilla aiparilugo, ataniviksûb Klaudiusib Jûdit ilûnaita aularᴋolaungmagit Rômemit.
3Tâpkungnunga iterpok; adsigêngniglo sanagamik, najorpak sanavlunelo; itsaliorteovulle.
4Sabbatinelo tamaine katimavingme ajoᴋertuivok, Jûdillo Grîkillo kaiblarlugillo tukisitipait.
5Silasele Timôteuselo Mazedôniamit pingmanik, Pauluse Anernermut kajungersartauvok, Jûdinut kigligiutjerᴋovlugo Jêsusemik Kristuseojomik.
6Akkerartormattale mitauteᴋarlarmiglo, annorâne aulatidlarlugit oᴋautivait: Ause niaᴋupsingnut pile, uvanga pasijaksaungilanga; mânamit pasijaksaunanga nalojunut ainiarpunga.
7Tagvangallo aularpok, angutib Jestusemik atiliub iglunganut iterlune, Gûdemik opigosuktub, tâpsoma iglunga katimaviub tungânêtok.
8Kristusele, katimaviub angajoᴋânga, iglomioᴋatingillo ilûnatik okperput Nâlekamut; Korintemiullo unuktut nâlektut okpilerivut baptitaulerlutiglo.
9Nâlekable Pauluse oᴋautivâ takotitjutikut unnuame: Sivôranak, oᴋarille nipangernaglo;
10Ilagigapkit, inungmut atautsemullônêt idluitulivioniatsangilatit; iglugasaksoarne tamakkonane unuktunik inuᴋoteᴋârama.
11Tagvanêporle jâremik atautsemik takᴋiniglo pingasojortunik, ajoᴋertorlugillo Gûdib oᴋausinginik.
12Gallionele atanerusiongmat Achâjame, Judit ilagêklutik perajaludlarput Paulusemut, aularupâllo kiglisiniarviub iksivautangata sânganut.
13Oᴋarlutiglo: Oma inuit kajungertipait, Gûdemik kivgartorᴋovlugit perᴋojat nâlengnagit.
14Pauluse oᴋaromalermat, Gallion oᴋarpok Jûdinut: Jûdiojose! idluitomik pikpat, idluitulinermiglônêt, tusarajarpapse nâmaktomik;
15Apersûtiongmalle ajoᴋertûtsemik, aterniglo, perᴋojipsingniglo, isumapsingnik piniaritse, taimaitomik erᴋartuijomanginama.
16Aulartipaillo kiglisiniarviub iksivautanganit.
17Tagva Grîkit ilûnatik Sostenêse, katimaviub angajoᴋânga tiguvât, annaudlalâllo kiglisiniarviub iksivautangata sângane; Gallioniblo kamagingilait.
18Paulusele akunit sulle tagvanêlaukpok; kingorngagut ᴋatangutigêt sorairutiksamik oᴋautivait, Sîriamullo umiaktoromavlune Prisillalo Akvilalo ilagilugik; nujanelo (Paulusib) kipjarpait Kenᴋrêame, oᴋautsine maliklugit, taimak oᴋarsimagame.
19Efêsusemullo pivok, tagvungalo ᴋemakpak; nangminerle katimavingmut iterpok Jûdillo oᴋâlavigivait.
20Inangmatsuk najortaujomavlutik akunêrnersamik, ᴋipilukporle.
21Sorairutiksamiglo oᴋautivait oᴋarlunelo: Aularviksiorvingme tikiniartome Jerusalemêtsariaᴋarpunga; tikitsomârivapse, Gûdib perᴋokpanga. Efêsusemillo aularpok.
22Zesarêamullo pivlune, (Jerusalemullo) timmuarpok, ilagêktullo salutinamigit, Antiochiamut atersârpok.
23Tagvanelo uvlerᴋârdlune atausiungitunik, aularpok nuna Galâtsia arvertarvigilugo, Frîgialo kingorlerêktidlugik, okpertullo ilûnaita nakoksitipait.
24Jûdele Efêsusemut tikipok, Apollusemik atilik, Aleksandriame inûlertok angut oᴋaloriktoᴋ, aglangniglo ilisimatsiartok.
25Tâmna Nâlekab ajoᴋertûtânik ilanganik ajoᴋertortaulaukpok, anerneᴋarlunelo ilungertortomik oᴋâlavok, ajoᴋertuiloriklune Nâlegak oᴋautigilugo, Johannesible baptijutâ ᴋaujimajatuarivlugo.
26Tâmna sivôranane oᴋâlalerpok katimavingme. Akvilable Prisillablo tusaramikko, ingmingnut pitipâk ajoᴋertorluarlugolo Gûdib ajoᴋertûtanik.
27Achâjamulle aijomangmat, ᴋatangutigêt aglaklutik okpertut perᴋovait ilaliortauᴋovlugo; tagvungalo pigame, okpilertut (Gûdib) saimarsautânut angijomik ikajorpait.
28Jûdit pitsartunermut oᴋausiksairutigamigit, ilûnatik tusâtilugit aglangnik ᴋaujitipait Jêsusemik Kristuseojomik.
Currently Selected:
Apostelit Piniarningit 18: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
