I Atannit 1
1
Salomob mingoartauvlune saimartitauvlunelo atanningortitauninganik.
1Atannerlo Davide inutuᴋaugame, jâreᴋarlunelo unuktunik, aukanerungnarlaungilak, annorangnut ulliktaulauralloarmat.
2Tagva kivgangita oᴋautivât: Nâlegara atannek pivlugo kennerlit inosuktomik uigâsungmik, atanniub sângane nangerniartomik, pairksiniartomiglo tapsominga, talligingnelo sinningniartomik ivaniartomiglo Nâlekamnik atannermik.
3Israelitillo kiglilervingine ilûnnaine uigârsuk ânanak ᴋenerasuarpât, nachvarpâllo Abisag Sunemiok, âpâllo atannermut.
4Tamnalo uigarsôlaukpok ânanaudlartok, pairivâlo atannek, kivgartorlugolo. Atanniuble uvineᴋatigilungilâ.
5Adoniale Hagithib erninga angijorortipok, oᴋarlunelo: Ataningoromavunga; sanaᴋojilunelo ingminut ᴋammutingnik aksalloalingnik, angutiniglo ablangajunik horsine, angutiniglo 50 ginik sivurlertunik tapsominga.
6Atâtangatalo ᴋuvianailisaromalaungila nelliunermine, oᴋarajarlune: Sôg taimailiorᴋît? Tamnalotauk angutitsiangolaurivok, anânangatalo erniarilaukpa tugliovlune Absalomemut.
7Atannertortigivaglo Joabe Zerujab erninga, Abjatharelo ajuᴋertuijok. Tapᴋoa Adonia ikajorpâk.
8Zadoᴋible ajuᴋertuijub, Benajablo Jojadab erningata, Nathaniblo nellautaijub, Simeiblo, Reiblo, Davidiblo sôngojokotingita Adonia illigilungilât.
9Adoniablo saugat, tuktuvaillo, nergjutillo koinititaumajut tunnergutautigamigit ujarasuksub Soheletemik atiggub, immektarviub Rogelemik atiggub, sanianêtub tungâne, ᴋatangutine ataniub erningit ilûnnaita ᴋaikᴋovait, Judablo angutingit atanniub kivgangit ilûnnaita.
10Nellautaijorle Nathan, Benajalo, sôngojullo, Salomolo nukkane ᴋaikᴋolaungilait.
11Tagva Nathan oᴋarpok Bathsebamut Salomob anânanganut: Tusarlaungilatit Adonia Hagithib erninga, ataningorsimangmat, Nâlegavullo Davide nellomarikpok tamattominga?
12Tagva ᴋailaurit mânna atannertoromavagit, tarningnik ernerpillo Salomob tarninganik piuliklerᴋovlutit.
13Ailaurit itterlutillo ᴋammunga atannermut Davidemut, oᴋautilugolo: Nâlegâk atannek, kivgait arnak angermarilaungikiûk, oᴋarvigilugolo: Ernît Salomo kingunamne atanningortuksauvok, iksivajuksaulunelo iksivautaᴋotimne? Sôgle mânna Adonia atanningorsimava?
14Ahâk tagvanêtillutit sulle, atannermullo oᴋartillutit, kingunangne itteromavunga, oᴋausiksatillo oᴋautigijarêromavakka.
15Bathsebalo itterpok atannermut ᴋammunga aiparusermut. Atannerlo inutuᴋaudlalaukpok, Abisagiblo Sunemiub atannek kivgartorpa.
16Bathsebablo okkungalune atannek opigiva: Atannerle oᴋarpok: Suvît?
17Tapsoma oᴋautiva: Nâlegâk, igvit kivgait angermarilaukpat Nâlegarne Gûdingne: Ernît Salomo atanningortuksauvok kingunamne, iksivajuksaulunelo iksivautaᴋotimne.
18MânNâle ahâk, Adonia atanningorsimavok; igvillo Nâlegara atannek nellovat tamânna.
19Taipsoma angusalluit, tuktuvaillo, nergjutillo koinititaumajut tunnergutautilaukpait, ataniublo erningit ilûnnaita ᴋaikᴋolaukpait, taimâktauk Abjathare ajuᴋertuijok, Joabelo sorsuktuksaksoaᴋatigêt angajoᴋângat; kivgelle Salomo ᴋaikᴋolaungila.
20Illingnullo Nâlegara atannek Israelitit ijingit ilûnnatik torarput, nellojungnaititsiᴋovlutit taipkoninga, kina iksivajuksaumangât Nâlekama atanniub iksivautaksoangane tapsoma kingorngane.
21Imaitsomârporlo, Nâlegara atannek atâtagijane illagilugit sinnisimalerpat, tagva uvanga, erneralo Salomo, idluitullijonasugijauniarpoguk.
22Ahâglo, tamna oᴋartillugo sulle atannermut, nellautaijok Nathan ᴋailune itterpok.
23Atannerlo oᴋautivât tamattominga: Ahâk nellautaijok Nathan mânepok. ᴋammungalo itterame atanniub sânganut, kênane pûlugo nunamut, atannek opigiva.
24Oᴋarlunelo: Nâlegara atannek oᴋalauᴋît: Adonia kingunamne ataniojuksauvok, iksivajuksaularmelo iksivautaᴋotimne?
25Uvlome atersarmat, tuktuvaillo, nergjutillo koinitisimajut, saugallo unuktovaksuit tunergutautilaukpait, ataniublo erningit ilûnnaita ᴋaikᴋolaukpait, angajoᴋâjello, taimâktauk Abjathar ajuᴋertuijok. Ahâglo nerrivut, immerlutiglo taipsoma sângane, oᴋarlutiglo: Pilloringnartoᴋarle atannermut Adoniamut!
26Uvangale kivgait, Zadokelo ajuᴋertuijok, Benajalo, Jojadab erninga, kivgaillo Salomo, ᴋaikᴋolaungilâtigut.
27Tamânna Nâlekamnut atannermut perᴋojaumalauᴋa? kivgatillo ᴋaujilaungilet kina Nâlekama atanniub iksivautangane tapsoma kingorngane iksivajuksaumangât?
28Tagva atannek Davide kiovok oᴋarlunelo: Bathseba ᴋaikᴋolersiuk uvamnut. Tamnalo itterpok atanniub sânganut, atannerlo sângerpa.
29Atannerlo angermarikpok, oᴋarlunelo: Sorlo Nâlegak miksekârtomik inôngmat, tarnimnik piuliklerlauktok ᴋanoêtunit tamainit,
30Uvlome pinniaromavunga sorlo angermarilaurapkit Nâlekame Israelib Gûdingane, oᴋarlunga, ernît Salomo kingunamne ataniojuksaungmat; tamnalo iksivajuksauvok iksivautakotimne innangêrdlunga.
31Tagva Bathseba okkungalerpok kênane pûlugo nunamut, opigivâlo atannek, oᴋarlunelo: Pilloringnartoᴋarle Nâlekamnut atannermut Davidemut sorairane.
32Atannerlo Davide oᴋarpok: Ajuᴋertuijok Zadok ᴋaikᴋolersiuk uvamnut, nellautaijorlo Nathan, Benajalo Jojadab erninga. Ittermattalo atanniub sânganut,
33Atanniub oᴋautivait: Angajoᴋapse kivgangit illasearisigik, erneralo Salomo ikkitisiuk horseojârtoᴋotimnut, atersartilugolo unnunga Gihonemut.
34Ajuᴋertuijublo Zadoᴋib, aipaᴋarlune nellautaîjomik Nathanemik, mingoarliuk tagvane ataningortilugo Israelitinut. Tiptulausijaritselo tiptulautinut, oᴋarluselo: Pilloringnartoᴋarle atannermut Salomomut!
35Tamnalo malliklugo majoraritse ᴋailuselo, tagva iksivajuksauvok iksivautakotimne, atanniojuksauvorlo innangêrdlunga; uvangalo perᴋojomavara atannioᴋovlugo Israelitinut, Judakunullo.
36Tagva Benajab Jojadab erningata atannek kiova, oᴋarlunelo: Amen, Nâlegak Nâlekama Gûdinga oᴋarletauk taimâk!
37Sorlo Nâlekab Nâlegara aiparilaungmago, taimâk Salomotauk aipariliuk, iksivautanga anginersauᴋovlugo Davidib iksivautanganit.
38Tagva ajuᴋertuijok Zadok, nellautaijorlo Nathan, Benajalo Jojadab erninga, Kretillo Pletillo, atersarput kanunga, Salomolo ikkitipât atanniub Davidib horseojartoᴋotinganut, atersartilugolo Gihonemut.
39Zadoᴋiblo ajuᴋertuijub nakjuk orksuᴋaut tiguva tuppermit, mingoarpâlo Salomo, tiptulausijarpullo tiptulautinut, inugasaksuillo ilûnnatik oᴋarput: Pilloringnartoᴋarle atannermut Salomomut!
40Inugasaksuillo ilûnnatik malliklugo majorarput, inugasaksuillo nipsausijarput nipsautinut, ᴋuviasudlarlutiglo, nuna nippersoanginut imiadlarmat.
41Adoniablo tusarpa ilûnnatiglo ᴋaikᴋolauktangita, najortigijangita; nerrijarêrlaukpullo. Joablo tiptulautib nippinga tusaramiuk oᴋarpok: ᴋanok nipliadlarnek, aulajadlarnerlo iglugasaksoarne tukkeᴋarᴋat?
42Oᴋartillugolo sulle, ahâk, tagva Jonathan Abjatharib ajuᴋertuijub erninga ᴋaivok. Adonialo oᴋarpok: ᴋailaurit ᴋammunga, angutaugavit nellagôrtok, taigotaksaniglo ajungitunik ᴋaitsivotit.
43Jonathanele kiovok, oᴋarlunelo Adoniamut: Ilâ Nâlegapta atanniub Davidib ernine Salomo atanningortilaukpa.
44Ilagillugolo tillilaukpait ajuᴋertuijok Zadok, nellautaijorlo Nathan, Benajalo Jojadab erninga, Kretillo Pletillo: ikkitilaukpâllo ataniub horseojartoᴋotinganut.
45Ajuᴋertuijublo Zadoᴋib nellautaijok Nathan aiparilugo mingoarlaukpa ataningortilugo Gihoneme, majorarlaukpullo tagvangat ᴋuviasuklutik, iglugasaksuit aulajadlarmatta; tamânnauvok nipliadlarnek tusarlauktasse.
46Taimaglo Salomo iksivavok atanniub iksivautangane.
47Atanniublo kivgangit ittersimavut ᴋammunga, Nâlegavut Davide saimartilugo, oᴋalaukpullo: Gûdivit Salomob atinga anginersautiliuk aternit, iksivautangalo anginersautiliuk iksivautarnit. Atannerlo opigosulaukpok innangavingme.
48Atannerlo oᴋalaurivok imâk: Nertortaule Nâlegak Israelib Gûdingat, uvlome iksivakojimajok kinamik iksivautamne, ijikka takkoᴋovlugik tamattominga.
49Tagva ᴋoaksarput parngnailutiglo ilûnnatik Adoniamut ᴋaikᴋojaulauktut, aularlutiglo attunît apᴋotigijamingnut.
50Adoniable Salomo sivuragiva, parngnailerporlo ailunelo Altariblo nakjugik tigumiarpâk.
51Salomolo oᴋautsaulerpok: Ahâk, Adoniab atannek Salomo sivuragiva; ahâglo, Altarib nakjugik tigumiarpâk, oᴋarlunelo: Atanniub Salomonib angermarilinga uvlome, kivgane toᴋotsomangimago saviksoarmut.
52Salomo oᴋarpok: Nellagôrniarune, tagva nujak atauserlonêt tapsomangat kattaktuksaungilak nunamut, idluitomigle nachvarviôgune, toᴋotaksauvok.
53Atannerlo Salomo tilliklerpok tagvunga, aijauᴋolâlo Altaremit. Tikkinamelo atannek Salomo opigiva. Salomole oᴋarpok tapsomunga: Ailerit igloᴋotingnut.
Currently Selected:
I Atannit 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.