Rome 11
11
Nǫ̀htsı̨ Israel got'ı̨į̀ mǫ̀hdaa edegha gòį̀hchì
1Eyıt'à Nǫ̀htsı̨ edets'ǫ dǫ ɂǫ̀goèhde nì? Į̀le ne! Sı̨ xàè Israel got'ı̨į̀ aht'e, Abraham wets'ıhɂǫ̀ǫ-dǫǫ̀ aht'e, eyıts'ǫ Benjamın wets'ıhɂǫ̀ǫ-dǫǫ̀ aht'e. 2Nǫ̀htsı̨ amìı weza gı̨ı̨lı̨ ha nadąą̀ yek'èezǫǫ sìı ɂǫ̀goèhde nıìle. Nǫ̀htsı̨ Nı̨htł'è k'e nakwenàoɂǫǫ Elıjah weghǫ ayìı dek'eèhtł'èe sìı ghǫ nànıahdè. Elıjah Israel got'ı̨į̀ k'èch'a Nǫ̀htsı̨ ts'ǫ̀ xàyaı̨htı, hadı, 3“Sets'ǫ̀ K'àowo, nets'ǫ nakwenàoɂǫǫ ełaàgogį̀ı̨hdè, eyıts'ǫ kwe-ladà wek'e nets'ǫ̀ t'asìı k'eek'ǫ̀ǫ sìı nàgı̨ı̨zhì. Nets'ǫ nakwenàoɂǫǫ gha sı̨ zǫ ełaàsegį̀ı̨hwho-le, hanìkò dıì sìı ełaàsegèhwhı ha hogeèhdzà,” hadı. 4Nǫ̀htsı̨ Elıjah ts'ǫ̀ dıı hadı, “Dǫ łǫ̀hdı̨-lemì edegha gık'èhdì hǫt'e. Baal ts'ǫ̀ nàgògı̨ı̨hgè xè wets'ǫ̀ yagı̨ı̨htı whìle,” yèhdı. 5Dıì eyı lagǫ̀ht'e, Nǫ̀htsı̨ wesǫnıwǫ ts'ıhɂǫ̀ Israel got'ı̨į̀ mǫ̀hdaa edegha gòį̀hchì t'à. 6Wesǫnıwǫ ts'ıhɂǫ̀ hanì gots'ǫ̀ eghàlaı̨dà nı̨dè, wegha nezı̨į̀ hots'èhtsı̨ k'èxa agǫ̀ǫ̀là nıìle. Nezı̨į̀ hots'èhtsı̨ k'èxa gòį̀hchì nı̨dè, Nǫ̀htsı̨ wesǫnıwǫ ts'ıhɂǫ̀ gòį̀hchì ts'edı ha dìì.
7Eyı weghǫ dàts'edı welì? Israel got'ı̨į̀ t'asìı gha hòtł'ò eghàlagı̨ı̨dàa sìı eyı gıghǫ̀t'ǫ-le, hanìkò dǫ eyıì-le Nǫ̀htsı̨ gòį̀hchìı sìı eyı gıghǫ̀t'ǫ hǫt'e. Dǫ gòį̀hchì-le sìı gıkwì nàtsoò agììdlà. 8Dıı hanì gıghǫ dek'eèhtł'è:
“Nǫ̀htsı̨ sìı gıdzeè yìı ełaàgı̨ı̨dè lagǫ̀ǫ̀là. Eyı ts'ıhɂǫ̀ dıì gots'ǫ̀ ededaà t'à k'egeet'į̀-le eyıts'ǫ ededzıìhkw'ǫǫ̀ t'à egeèhkw'ǫ-le,” dek'eèhtł'è.
9Eyıts'ǫ K'àowocho Davıd dıı hadı dek'eèhtł'è:
“Ayìı ghǫ shègezhee sìı gıgha ehdzodıì welè, eyıt'à ededı̨ et'ıì gık'èchıìtła ha. Wet'à dagıìtà welè, eyıts'ǫ dànì eghàlagı̨ı̨dà k'èxa dagı̨ı̨ɂa welè. 10Gıdaà goìle welè, hanì-ı̨dè k'egeet'į̀ ha-le, eyıts'ǫ welǫ whìle ts'ǫ̀ gınǫkw'ǫǫ̀ whezòo awede,” dek'eèhtł'è.
Dǫ Israel got'ı̨į̀ agı̨ı̨t'e-le sìı kw'ıhchı̨į̀ degaı lagììdlà
11Israel got'ı̨į̀ hodàgeètł'ı t'à k'achı̨ negıìdè ha dìì nì? Į̀le ne! Hanìkò gıhołı̨į̀ ts'ıhɂǫ̀ Nǫ̀htsı̨ edaxàgolee wegodıì sìı dǫ eyıì-le xàɂaa gıts'ǫ̀ adlà. Hanì t'aa Nǫ̀htsı̨ sìı Israel got'ı̨į̀ dǫ eyıì-le xàɂaa ts'ǫ̀ dagı̨ı̨ɂaà agǫ̀ǫ̀là. 12Israel got'ı̨į̀ hołı̨ı̨ hogèhtsı̨ ts'ıhɂǫ̀ dıı nèk'e dǫ hazǫǫ̀ xàɂaa gıxè sìghà hòɂǫ hǫt'e. Dıì hagǫ̀ht'e nı̨dè, Israel got'ı̨į̀ hazǫǫ̀ Nǫ̀htsı̨ ts'ǫ̀ agejà nı̨dè, dǫ eyıì-le sìı denahk'e gıxè enıìyah agode ha hǫt'e.
13Naxı̨ Israel got'ı̨į̀ aaht'e-le sìı naxıts'ǫ̀ gohde hǫt'e. Nǫ̀htsı̨ Israel got'ı̨į̀ agı̨ı̨t'e-le sìı gıts'ǫ̀ sı̨ı̨hɂà aht'e, eyıt'à godı nezı̨ı̨ gıts'ǫ̀ ahłe ha hòtł'ò eghàlaehda hǫt'e. 14Naxıgha eghàlaehda t'à edahxǫ xàè sèot'ı̨ naxıghǫ ts'ohogeedıì ageehłe ha dehwhǫ, hanì-ı̨dè mǫ̀hdaa edaxàgeedaà ageehłe ha welì. 15Nǫ̀htsı̨ Israel got'ı̨į̀ ɂǫ̀goèhde t'à dıı nèk'e dǫ Nǫ̀htsı̨ xè ts'èwhı̨į̀ geedaà agejà hǫt'e. Ekò Israel got'ı̨į̀ Nǫ̀htsı̨ nagòchì nı̨dè weghǫ enıìyah nechà ha hǫt'e; ełaàgı̨ı̨dè gots'ǫ nagìdà lagede ha. 16Łètsı̨èhdıı wets'ǫ mǫ̀hdaa Nǫ̀htsı̨ ghàts'ı̨ı̨dìı sìı degaı hǫt'e nı̨dè, łètsı̨èhdıı hazǫǫ̀ degaı ìhłè hǫt'e. Ts'ı weghochı̨į̀ degaı hǫt'e nı̨dè, wekw'ıhchı̨į̀ sı hazǫǫ̀ degaı hǫt'e.
17Wekw'ıhchı̨į̀ mǫ̀hdaa dahchı̨atǫ̀, eyıts'ǫ naxı̨ ts'ı nezı̨-le wekw'ıhchı̨į̀ laaht'ee sìı ts'ı nezı̨ı̨ wekw'ıhchı̨į̀ ta anaxììdlà laaht'e. Eyıt'à dıì sìı ts'ı nezı̨ı̨ weghochı̨į̀ t'à dahshe lanì hǫt'e. 18Eyı kw'ıhchı̨į̀ dahchı̨atǫ̀ǫ sìı gınahk'e ats'ı̨ı̨t'e dahwhǫ t'à, edeghǫ xàdahoahdì-le. Haahdı nı̨dè dıı weghǫ nànıahdè: Naxı̨ sìı ts'ı weghochı̨į̀ nàtsoò aahwhǫ nıìle, hanìkò ts'ı weghochı̨į̀ sìı nàtsoò anaxį̀į̀hwhǫ hǫt'e. 19Eyıt'à dıı haahdı ha sǫnı, “Wetł'axǫǫ̀ nìsı̨ı̨htè ha t'à ts'ı wekw'ıhchı̨į̀ dahchı̨atǫ̀ hǫt'e,” dahdı ha tahkò. 20Eyı sìı ehkw'ı t'ıį̀t'e, Nǫ̀htsı̨ gıgha ehkw'ı adı-le t'à dahchı̨gıatǫ̀ ı̨lè. Naxı̨ Nǫ̀htsı̨ naxıgha ehkw'ı-ahodı t'à, eyı ts'ı wets'ǫ kw'ıhchı̨į̀ aaht'e anaxììdlà hǫt'e. Eyıt'à xàhoahdì-le, hanìkò edeghǫ dahjı̨ welè. 21Nǫ̀htsı̨ eyı ts'ı xàè wets'ǫ kw'ıhchı̨į̀ gıgha ehkw'ı-ahodı-le k'èxa nàyı̨ı̨zhì nı̨dè, naxı̨ ayìıha naxık'èdì welì?
22Eyıt'à Nǫ̀htsı̨ weghǫ nanıahdè; ededı̨ sìı wèhoedı-le eyıts'ǫ wedzeè sǫnıwǫ. Dǫ gıgha ehkw'ı-ahodı-le sìı gots'ǫ̀ wèhoedı-le, hanìkò naxıts'ǫ̀ wedzeè sǫnıwǫ hǫt'e. T'aats'ǫǫ̀ wegha naxınì nàtsoò aahwhǫ nı̨dè naxıts'ǫ̀ wedzeè sǫnıwǫ ha. Ekò haaht'e-le nı̨dè eyı kw'ıhchı̨į̀ lanì naxık'ıızhì ha hǫt'e. 23Israel got'ı̨į̀ edınì ładı̨į̀ agį̀į̀là nı̨dè eyıts'ǫ Nǫ̀htsı̨ gıgha ehkw'ı-ahodıì agejà nı̨dè eyı ts'ı k'e nìagòwa ha, Nǫ̀htsı̨ sìı k'achı̨ ts'ı k'e nìagòwa ha wegha dìì-le hǫt'e t'à. 24Naxı̨ sìı ts'ı nezı̨-le gots'ǫ xànaxıat'a gà ts'ı nezı̨ı̨ k'e ts'ǫ̀ anaxììdlà hǫt'e, eyı wenaahdì-le sǫ̀ǫ̀. Eyı ts'ı xàè wekw'ıhchı̨į̀ aaht'e nıìle kò, dıì wek'e dahshe hǫt'e. Ekò eyı ts'ı xàè wets'ǫ kw'ıhchı̨į̀ dahchı̨atǫ̀ǫ sìı xàè wets'ǫ ts'ı k'e ts'ǫ̀ anagììdlà nı̨dè denahk'e nezı̨į̀ dehshe ha hǫt'e!
Israel got'ı̨į̀ hazǫǫ̀ edaxàgeedè ha
25Sèot'ı̨ı̨, dıı t'asìı enıìyah deɂı̨į̀ wheɂǫǫ sìı wek'èahsǫ ha naxeehwhǫ. Hanì-ı̨dè xàhoahdì aahde ha nıìle. Israel got'ı̨į̀ agı̨ı̨t'e-le gıta gots'ǫ dǫ hazǫǫ̀ edaxàgeedè gots'ǫ̀, Israel got'ı̨į̀ gıkwì dezhì ha. 26Eyı tł'axǫǫ̀ Israel got'ı̨į̀ hazǫǫ̀ edaxàgeedè ha. Dıı hanì dek'eèhtł'è k'ę̀ę̀:
“Edaxàgolee elı̨ı̨ sìı Jerusalem gots'ǫ nììtła ha, Jacob wets'ıhɂǫ̀ǫ-dǫǫ̀ sìı hołı̨ı̨ hogehtsı̨ ch'à agole ha. 27Eyıts'ǫ gıhołı̨į̀ gıghǫ nahoehłe ha nı̨dè, gıxè nakenahohtsı̨ ha,” dek'eèhtł'è.
28Naxıxè sìghà hòɂǫ ha t'à godı nezı̨ı̨ gıgha wedę agı̨į̀là eyıts'ǫ Nǫ̀htsı̨ k'èch'a agı̨ı̨t'e. Hanìkò Nǫ̀htsı̨ gocho Abraham, Isaac eyıts'ǫ Jacob gòį̀hchì ts'ıhɂǫ̀ Israel got'ı̨į̀ goghǫneètǫ wek'èts'eezǫ. 29Nǫ̀htsı̨ sìı t'asìı dǫ ghàyele, eyıts'ǫ dǫ kayahtı nı̨dè, edınì eładı̨į̀ ayehɂį̀ nıìle. 30Įnę̀ę naxı̨ sı Nǫ̀htsı̨ k'èaht'e-le ı̨lè, hanìkò Israel got'ı̨į̀ Nǫ̀htsı̨ k'èagı̨ı̨t'e-le ts'ıhɂǫ̀ dıì Nǫ̀htsı̨ naxıts'ǫ̀ wedzeè eteèɂı̨ hǫt'e. 31Eyıt'à dıì sìı Israel got'ı̨į̀ ededı̨ sı Nǫ̀htsı̨ k'èagı̨ı̨t'e-le hǫt'e. Hanìkò Nǫ̀htsı̨ naxıts'ǫ̀ wedzeè eteèɂı̨ı̨ sìı gıgha wègaat'ı̨ ts'ıhɂǫ̀ ededı̨ sı gıgha ehkw'ı-ahodı agode ha, eyıt'à Nǫ̀htsı̨ gots'ǫ̀ wedzeè eteèɂı̨ ha. 32Dǫ hazǫǫ̀ Nǫ̀htsı̨ k'èagı̨ı̨t'e-le t'à, Nǫ̀htsı̨ gınìłı̨ı̨ gıts'ǫ̀ k'àowoò agǫ̀ǫ̀là. Hanì-ı̨dè dànì gots'ǫ̀ wedzeè eteèɂı̨ı̨ sìı dǫ hazǫǫ̀ gık'èezǫǫ̀ agole ha.
Nǫ̀htsı̨ weghàsǫts'eedı welè
33Nǫ̀htsı̨ sıì gǫǫzǫ xè t'asìı hazǫǫ̀ k'èhoezǫ ts'ıhɂǫ̀ Nǫ̀htsı̨ gogha enıìyah hǫt'e!
Wınì nıts'eedì ha dìì eyıts'ǫ edı̨į̀ wetı̨lıì nıɂàa sìı wek'èts'eezǫ-le!
34Dıı hanì dek'eèhtł'è,
“Amìı gots'ǫ̀ K'àowo wınì k'èhoezǫ? Amìı dıı hanì eghàlaı̨da yèhdı? Dǫ wı̨ı̨zìı-le!”
35“Dǫ Nǫ̀htsı̨ ghà-t'asìı-yį̀į̀ɂǫ t'à Nǫ̀htsı̨ ek'èt'à yets'ǫ̀ɂeehdì ha nì? Dǫ wı̨ı̨zìı-le!” dek'eèhtł'è.
36Nǫ̀htsı̨ t'asìı hazǫǫ̀ whehtsı̨, t'asìı hazǫǫ̀ wets'ǫ hǫt'e, eyıts'ǫ t'asìı hazǫǫ̀ wegha hǫt'e.
Welǫ whìle ts'ǫ̀ weghàsǫts'eedı welè! Amen.
Currently Selected:
Rome 11: DNT08
Highlight
Copy
Compare
Share
Want to have your highlights saved across all your devices? Sign up or sign in
Tlicho Genesis and New Testament © Canadian Bible Society 2003, 2008.
