2 Corınth 12
12
Paul nàtso-le kò wenazhıı enıìyah k'ehokw'o
1Wet'àaɂà nıìle wek'èehsǫ kò edeghǫ xàdahohdì ha t'ıį̀t'e. Gots'ǫ̀ K'àowo wedahxà senazhıı xègoèht'į̀ eyıts'ǫ ayìı k'èehsǫǫ̀ asį̀į̀làa sìı, weghǫ gohde ha. 2Hoònǫ-daats'ǫ̀-dı̨ xo ekò Zezì wecheekeè ı̨łè yak'e denahk'e dagǫǫwà ts'ǫ̀ newıìtı̨ ı̨lè. Eyı dǫ edezhį̀į̀ yìı wheda, edezhį̀į̀ yìı wheda-le, wek'èehsǫ-le, Nǫ̀htsı̨ zǫ yek'èezǫ hǫt'e. 3-4Eyı dǫ Hoı̨zı̨-Nèk'e ts'ǫ̀ newıìtı̨ ı̨lè wek'èehsǫ. Eyı dǫ edezhį̀į̀ yìı whedaa, edezhį̀į̀ yìı wheda-le, wek'èehsǫ-le, Nǫ̀htsı̨ zǫ yek'èezǫ hǫt'e. T'asìı sıì enıìyah t'à dǫ wı̨ı̨zìı yeghǫ gode ha dìì sìı yeèhkw'ǫ ı̨lè. Eyı sìı dǫ yeghǫ gode ha wegha wets'àet'ǫ ı̨lè. 5Eyı dǫ wexè hagòjàa sìı weghǫ xàdahohdì ha hǫt'e, hanìkò edeghǫ xàdahohdì ha-le. Ayìı t'à nàhtso-le sìı eyı zǫ weghǫ xàdahohdì ha. 6Edeghǫ xàdahohdì gohde ha dehwhǫ nı̨dè, ehkw'ı gohde t'à ezhı̨ne k'ę̀ę̀ sııtà ha-le. Hanìkò deɂǫ̀ǫ̀ t'asìı deè aht'e segı̨ı̨hwhǫ ha-le t'à edeghǫ xàdahohdì ha-le. Dànì eghàlaehda eyıts'ǫ ayìı dàehsı̨ k'ę̀ę̀ zǫ dǫ wet'àaɂàa k'ę̀ę̀ sııtà ha dehwhǫ.
7Eyı t'asìı enıìyah deè hazǫǫ̀ weehɂı̨ t'à xàdahohdì ch'à ı̨chį̀ghoò lanıı sekwǫ̀ ghaı̨ɂaà asììdlà hǫt'e. Eyı sìı wehłı̨ı̨ wecheekeè sek'alawoò at'ı̨ hǫt'e. 8Taà-eht'aà gots'ǫ̀ K'àowo seghǫ yìhchı wèehsı̨ weghǫnàdaehtì ı̨lè. 9Hanìkò sets'ǫ̀ hadı, “Nets'ǫ̀ sǫdehwhǫǫ sìı eyı negha hòt'a hǫt'e. Dǫ nàgetso-le nı̨dè, gıdzeè yìı denahk'e enıìyah eghàlaehda hǫt'e,” sèhdı. Eyıt'à ayìı t'à nàhtso-le sìı weghǫ sınà xè weghǫ denahk'e xàdahohdì ha. Hanì-ı̨dè Zezì-Krı wedahxà nàhtsoò asedle ha hǫt'e. 10Eyıt'à Zezì-Krı wets'ıhɂǫ̀ nàhtso-le nı̨dè, dǫ sek'adageedè nı̨dè, segha nàhotì nı̨dè, dǫ dasegį̀ı̨hɂa nı̨dè, sexè hoìla k'ehokw'o nı̨dè sınà hǫt'e. Nàhtso-le nı̨dè hǫdaats'ǫ̀ nàhtso hǫt'e.
Paul, Corınth got'ı̨į̀ goghǫ nànıwo
11Ezhı̨ne edèwhıhtsı̨ hanìkò naxı̨ asèahłà hǫt'e. T'asìı aht'e-le sǫnı kò seghǫ nezı̨į̀ goahde ha ı̨lè. Eyı “Nǫ̀htsı̨ deɂǫ̀ǫ̀ wecheekeèdeè,” gìahdıı sìı gık'aɂį̀ aht'e nıìle. 12Dǫ enıìyah hazǫǫ̀ xàɂaa hohtsı̨ı̨ sìı eyı weghàà Zezì wecheekeèdeè elı̨ wek'èhoedzǫ hǫt'e. Naxıxè aeht'è ekò sınì nàtso xè naxıta enıìyah łǫ hòwhıhtsı̨ ı̨lè. 13Nǫ̀htsı̨ wecheekeè kǫ̀ta eyıì-le ta nàgedèe sìı gık'aɂį̀ aaht'e naxeehwhǫ dahwhǫ nì? Nǫ̀htsı̨ wecheekeè eyıì-le sets'àgedıì agèhłà kò naxı̨ hanaxèhłà whìle; eyı gha seghǫ nahoahłe!
14Nàakeè naxıts'àwhıhtła ı̨lè, dıì k'achı̨ naxıts'àhtła ha, hanìkò t'asìı t'à sets'àahdı ha naxeehwhǫ-le, t'asìı naxıts'ǫ sìı weehwhǫ-le t'à, hanìkò naxı̨ naxeehwhǫ hǫt'e. Chekoa sìı edèot'ı̨ gha t'asìı k'ègedì nıìle wek'èts'eezǫ, gìot'ı̨ sìı edeza gha t'asìı k'ègedì hǫt'e. 15Eyıt'à t'asìı hazǫǫ̀ sets'ǫ sìı naxıts'ǫ̀ wek'ehoehwhı gha sınà, eyıts'ǫ naxıghàdèehtè gha sınà hǫt'e. Denahk'e naxıghǫneehtǫ nı̨dè dek'aɂį̀ seghǫnıahtǫ ha nì? 16T'asanìle, naxeehkè t'à naxıgha hoezhì ahłà-le. Hanìkò ts'àhohtsı̨ t'à naxıghǫyaàɂǫ seahwhǫ nì? 17Dǫ naxıts'ǫ̀ gııhɂà ekò, sedahxà t'asìı naxıghǫ gį̀į̀hchì nǫǫ̀? 18Tıtus naxıts'àtła ha naxıts'ǫ̀ wııhɂà ı̨lè, eyıts'ǫ gòet'ı̨ ı̨łè wexè ahłà ı̨lè. Tıtus sǫǫ̀mba gha naxık'adaawo-le ı̨lè. Eyıt'à ełèht'eè k'ehodıìɂa xè ełèht'eè nànedıìwo hǫt'e.
19Dıı haı̨wa gots'ǫ̀ edek'edats'eedıì ats'edı dahwhǫ ı̨lè nì? Zezì-Krı wexè ats'ı̨ı̨t'e k'ę̀ę̀ Nǫ̀htsı̨ wenadąą̀ edeghǫ gots'ede hǫt'e. Goàgı̨ą, t'asìı hazǫǫ̀ hats'ehɂı̨ı̨ sìı wet'à naxınì nàtsoò ade gha ats'et'ı̨ hǫt'e. 20Naxıts'àwhıhtła nı̨dè sınì k'ę̀ę̀ aaht'e ha-le sǫnı, eyıts'ǫ sı̨ sı naxınì k'ę̀ę̀ aht'e ha-le sǫnı, eyı weghǫ nànıhwho hǫt'e. Ełek'èch'a aahdı ha sǫnı, ełeghǫ ts'oxoahdı ha sǫnı, naxık'èch'a t'à naxınì nàìtło ha sǫnı, ełek'èch'a aahda ha sǫnı, ełeghǫ goahde ha sǫnı, xàhoahdì ha sǫnı, eyıts'ǫ naxıxè hoı̨zı̨ hòɂǫ ha-le sǫnı, eyı hazǫǫ̀ ghǫ hòtł'ò nànıhwho hǫt'e. 21K'achı̨ naxıts'àhtła nı̨dè, Senǫ̀htsı̨ naxıghǫ į̀į̀zhaehłı̨į̀ asele ha sǫnı. Naxıta dǫ łǫ ı̨nę̀ę gots'ǫ hołı̨ı̨ hogèhtsı̨ı̨ sìı gıghǫ sedzeè nànııtì ha sǫnı. Hołı̨ı̨ nàowoò k'ę̀ę̀ ełek'alagedèe sìı weghǫ edek'egı̨ı̨lı̨-le sǫnı dehwhǫ t'à, gıghǫ hòtł'ò nànıhwho.
Currently Selected:
2 Corınth 12: DNT08
Highlight
Copy
Compare
Share
Want to have your highlights saved across all your devices? Sign up or sign in
Tlicho Genesis and New Testament © Canadian Bible Society 2003, 2008.
