जकरिया 13
13
मूर्ति नु जोल पाइब
1मेको नाक्ती दाऊद आ खिं नु यरूसलेममी बाक्ब मुर आन पाप नु आन मरिम्शो पशो क्याम्चा कली ब्वाक्कु बुक्तीके का बुक्शा ग्रूब। #यसैया १२:३; यसैया ५५:१ 2मुर नेल्ल आन परमप्रभु यावेमी मार देंत देंशा हना मेको नाक्ती “गो रागी रे मूर्ति आन नें क्याम्नुङ। मिनु सुइमी मेको आन कली ममिम्नीम। मिनु गो मेको रागी रे जोल पा नोले दुम्ब लोव़ पाइब नु ग्रांग्रा दिशो वोल आन कली ग्रुंइशा खेरनुङ। #मीका ५:१२; येरमीया २९:८-९ 3मिनु लेंशा सुइमी जोल पा नोले दुम्तीक लोव़ पाप्तु हना, मेको कली थीब आ आम आफोमी मेको कली ‘गे बेक्चा माल्नेवे। मारदे हना गे परमप्रभु यावे आ नेंमी जोल लोव़ पाप्तीवी’ देंनीस। मिनु मेकोमी जोल पा नोले दुम्ब लोव़ पवानु, आ आम आफोमी मेको कली साइक्नीस। #ब्यवस्था १३:६ 4मेको नाक्ती नोले दुम्ब लोव़ पाइब नेल्ल आंम तशो नु आंम लोव़ आ पर्बम मुने पाइनीम। मेकोपुकीमी दलओंठ आ चां के प्रोव़शो वा मफेक्नीम। 5तन्न मेकोपुकीमी ‘गो दा नोले दुम्ब लोव़ पाइब मनङ। गो रू ङा गेय पाइब बाक्नुङ। मारदे हना गो ठिटा बाक्ङा रेन रू ङा गेय पा जशा ब्रोंइती’ देंनीम। 6सुइमी मेको कली ‘इ रां ङा गार मार नमी? दे हिल्लो पाम्तेक्म हना, एको आं वारच आ खिंमी दुम्शो गार नम’ देंब।
नाक्शा लीशो परमप्रभु आ मुर
7मिनु मुर नेल्ल आन परमप्रभु यावेमी मार देंत देंशा हना ‘तरवार, आं गोठला आ पर्बम बोक्को। नेल्ल क्येङा आं नेक्था ङा मुर आन पर्बम बोक्को। गोठला कली तुपो। मिनु भेडापुकी ब्रमल। मिनु गो आं गुइ आइक्च गोठला आन पर्बम क्युक्नुङ। #मत्ती २६:३१ 8एको रागी ङा मुर भाग सांमी भाग निक्शी साइक्चा पुंइसीनीम। मिनु भाग का ब्रोंइचा ताइनीम। #यसैया ६:१३ 9मिनु मेको लीशो भाग आन कली गो मीम कुरपाइनुङमी। चांदी याप्पाइश्शो खोदेंशो पा याप्पाइक्नुङमी। मिनु सुन नाक्शो खोदेंशो पा नाक्नुङमी। मिनु मेकोपुकीमी आं कली थोइनीम। मिनु गो मेको आन कली लोव़ लेत्नुङमी। मेकोपुकी आं मुर नम’ देंनुङ। मिनु मेकोपुकीमी ‘परमप्रभु यावे, आंइ परमप्रभु बाक्ब’ देंनीम” दे परमप्रभु यावेमी देंत।
Currently Selected:
जकरिया 13: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
