जकरिया 10
10
परमप्रभु यावे कली पुनीन
1परमप्रभु यावे कली नोले ङा रेउ पुनीन। परमप्रभु यावे गोस्स नु फश सेल्ब बाक्ब। मिनु इन कली नु रू नेल्ल आन कली रेउ यिपाइक्ब। 2खिं ङा देवी देवतामी फश लोव़ पाइनीम। लिंक्यु कोव़बपुकीमी जोल तशा, ङोमु ङोशा, हेंथे लोव़ पाइनीम। मिनु मुर आन कली फश लोव़ पा लेम्नीम। मोपतीके मुरपुकी गोठला मबाक्शो भेडा खोदेंशो पा श्येत जशा प्रोक्नीम। #मत्ती ९:३७
परमप्रभुम आ मुर बोल्यो सेल्ब
3मिनु परमप्रभु यावेमी “गो गोठला आन कली तशा शुश गाइश्शो बाक्नुङ। मारदे हना मुर नेल्ल आन परमप्रभु यावेमी आ बगाल, यहूदा आ मुर आन कली कोव़ब। मेकोमी आ मुर आन कली लडाइ पा गेनायो मरूब शारा खोदेंशो सेल्ब। #जकरिया ११:५ 4मिनु यहूदा रे सुर ङा फुल्लु, ताम्बु कीतीक किला, लडाइ पाइब आन लिब्रा नु कप्तान नेल्ल ग्रूनीम। #येरमीया ३०:२१ 5मिनु मेको नेल्ल लडाइम बाक्शो लडाइ पाइब खोदेंशो बाक्नीम। मेकोपुकीम आन जोरी सत्रु लां ङा हिलोम खोल्शा दिम्नीम। परमप्रभु यावे मेकोपुकी नु बाक्तीके मेकोपुकीमी लडाइ पाइनीम। शारा ङोइक्ब आन कली मुने तोक्नीम।
6गो यहूदा आ खिं ङा मुर आन कली बोल्यो सेल्नुङ। योसेफ आ खिं ङा मुर आन कली श्येत रे प्रोंइनुङ। मेको आन कली ङोंइती ङा खोदेंशो सेल्नुङ। मारदे हना गो मेको आन कली शिशी पाइनुङ। मेकोपुकी गेनायो मतिल्शो खोदेंशो दुम्नीम। मारदे हना गो परमप्रभु यावे, मेको आन परमप्रभु नङ। गो मेको आन कली लोव़ लेत्नुङमी। 7मिनु एफ्राइम आ खिं ङा मुर लडाइ पाइब खोदेंशो पा बोल्यो दुम्नीम। दाखमद्य तूशो खोदेंशो पा ग्येरसीनीम। आन आलपुकीम मेको तशा शुश ग्येरसीनीम। मेकोपुकीमी ‘गो परमप्रभु यावे आ मुर नय’ दे शुश ग्येरसीनीम।
8गो आं मुर आन कली ब्रेश्शा, खुप्नुङ। मारदे हना गो मेको आन कली श्येत रे प्रोंइता। मिनु मेकोपुकी ङोंइती ङा खोदेंशो पा सोशा बोशा, शुश दुम्नीम। 9गो मेको आन कली रागी रागीम फ्राता हना यो, मेकोपुकीमी ङोन रागीम बाक्शा, आं कली मिम्नीम। मिनु मेको आन आल कोल्पाइश्शा आन रागीम लेत्नीम। #यसैया ६६:१९; येरमीया ५१:५० 10गो मेको आन कली इजीप्त रागी रे आन आंम रागीम लेप्पाइक्नुङ। गो मेको आन कली अस्सुर रे ग्रुंइशा, गिलाद नु लेबानोनम चाक्नुङ। नोले मेकेर शुश मुर दुम्तीके बाक्तीके मबाक्ब। 11मेकोपुकी समुन्द्र ङा ठेयब ब्वाक्कु खोदेंशो श्येत जाइनीम। तन्न गो समुन्द्र ङा छाल थुम्पाइक्नुङ। मिनु नील खोला सोव़पाइक्नुङ। अस्सुर आ ठेयब लेश्शो जाम्ब। मिनु इजीप्त ङा राज्य थुम्सीब। 12गो मेको आन कली परमप्रभु यावे कली थमा सुइक्तीकेम बोल्यो सेल्नुङ। मिनु मेकोपुकी मेको आं नेंम गाक्नीम” दे परमप्रभु यावेमी देंत।
Currently Selected:
जकरिया 10: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
