रोमी 15
15
1गो थमा सुइक्चामी बोल्यो दुम्शोपुकीमी, आंम कली ठेयब मसेल्थु, बोल्यो मदुम्शो थमा सुइक्ब आन कली वारच पय। #रोमी १४:१ 2इं दातेम नेल्लेमी अरु आन कली रिम्शो पा आन थमा सुइक्तीक थुं बारपाइक्ब दुम्चा माल्नय। #१ कोरिन्थी ९:१९; १ कोरिन्थी १०:२४,३३ 3ख्रीस्तमी यो आंमा दाक्शो मपव “इन कली पशो शुक्शी, आं तार मोंइसाक्व” दे ब्रेक्शो बाक्ब। #भजन संग्रह ६९:९ 4ङोंइती ब्रेक्शो नेल्ल इं कली शेंचा कली ब्रेक्शो बाक्त। मेको लोव़ पढेशा, फाल्शा इं थुं बारपा, आस पा बाक्य। #१ कोरिन्थी १०:११ 5फाल्तीक सक्ति गेब नु थुं बारपाइक्ब परमप्रभु यावेमी इन कली थुं का दुम्शा, दुशा गारशा बाक्चा गेवल। दुशा गारशा बाक्तीनी हना, ख्रीस्त येसु आ गेय पाइब दुम्नीनी। #फिलिप्पी २:२ 6मिनु गे थुं का नु लोव़ का पा इं प्रभु येसु ख्रीस्त आ आफ परमप्रभु यावे कली ठेयब सेल्ब दुम्नीनी।
7दोपा येसु ख्रीस्तमी इन कली दाक्शा ब्रवा। मोपान गेपुकी यो दाक्मुशा ब्रमुने। मो पनीनु, परमप्रभु यावे कली ठेयब सेल्नीनी। 8इं किकी पिपी आन कली गेशो लोव़ खाप्चा कली ख्रीस्त यहूदी आन कली पाप रे प्रोंइब दुम्त। मोपा परमप्रभु यावे आ देंशो थमा बाक्ब, दे कोंइचा कली मोदेंशो दुम्त। #मत्ती १५:२४; प्रेरित ३:२५ 9अर्को रागी ङा मुरपुकीमी परमप्रभु यावे आ शिशी आ पर्बम मेको कली ठेयब सेल्मेक्ल। मोपतीके “अर्को रागी ङा मुर आन दातेमी इन नें तुइक्पा कुम्सो पाइनुङ” दे ब्रेक्शो बाक्ब। #भजन संग्रह १८:४९ 10मिनु लेंशा “अर्को रागी ङा मुर आं योव़शो मुरपुकी नु थुं का दुम्शा, ग्येरसीन” दे ब्रेक्शो बाक्ब। #ब्यवस्था ३२:४३ 11चिनु “ए, अर्को रागी ङा मुर नेल्लेमी परमप्रभु यावे कली ठेयब सेलीन, जात नेल्लेमी मेको कली मान पचा माल्नीम” दे ब्रेक्शो बाक्ब। #भजन संग्रह ११७:१ 12यसैयामी “येस्से आ बङस रे का ग्रूशा, ठेयब दुम्शा, अर्को रागी ङा मुर आन कली सासन पाइब। मिनु मेको कली सासन पशो तशा, नेल्लेमी ‘इं कली श्येत रे प्रोंइब’ दे ग्येरशा, आस पा बाक्नीम” दे ब्रेक्शो बाक्त। #यसैया ११:१०; प्रकाश ५:५ 13आस गेब परमप्रभु यावे आ सोक्तीमी इन कली शुश ग्येरपा, थुं नाइक्पा बाक्चा गेवल। मोपा इन थमा सुइक्तीकेमी ठेयब आस पा बाक्कीन।
पावल आ गेय
14आं लोक्बपुकी, गे इन दातेमी दाक्मुशा, रिम्शो पा जोक्ब तुइक्ब दुम्शा नु शेंमुने चाप्ब दुम्शो बाक्नीनी, दे तुइक्ताक्ङ। 15परमप्रभु यावेमी आं कली शिशी पा शेंब सेल्ती। मोपतीके गो एको चिठीमी इच्का ठेयब लोव़ पा ब्रेक्ताक्ङ। #रोमी १:५; रोमी १२:३ 16गो रागी रागी ङा मुर आन कली ख्रीस्त येसु आ गेय पाइब दुम्ती। गो चढ़ेब खोदेंशो पा परमप्रभु यावे आ गेय पाइनुङ। परमप्रभु यावे आ सोक्त आ पतीकेमी रागी ङा मुर नेल्ल आ दाक्शो चढे़तीक खोदेंशो दुम्मल। #रोमी ११:३३ 17मेको शेंतीक गेय पचा कली ख्रीस्त येसुमी बोल नु सक्ति गेती। मिनु परमप्रभु यावे आ ङोंइती “गो ठेयब गेय पाता” देंती। 18ख्रीस्तमी पपाइश्शो गेय आ पर्बम ला लोव़ पाइनुङ। गो आंमा गेय पा अर्को रागी ङा मुर टीब दुम्मल, दे मेको आन कली शेंतीक गेय यो पना पन बाक्ती। #२ कोरिन्थी ३:५; रोमी १:५ 19परमप्रभु यावे आ सोक्तीम गेशो सक्तिमी चिन्ड नु छक लाक्चा ङा गेय कोंइताक्ङमी। यरूसलेम सहर रे लशा, इल्लीरीकुम रागी सम्म जाक्दीश्शा, सहर सहर, गाउं गाउंमी ख्रीस्त आ ग्येरपाइक्ब लोव़ नेल्ल शेंना शेंन गाक्ती। #मर्कूस १६:१७; २ कोरिन्थी १२:१२ 20ङोंइतीन ख्रीस्त आ लोव़ नेंने थुम्शो आन बाक्तीकेम, मलङ। मुल सम्म ख्रीस्त आ नें मनेंशो आन कली शेंनुङमी देंशा, शेंना शेंन गाक्ती। #२ कोरिन्थी १०:१५-१६ 21मिनु “आं लोव़ तुइक्पाइक्चा मपुंइसीशोपुकीमी तुइक्चा ताइनीम। मिनु मनेंशोपुकीमी रुप्नीम” दे ब्रेक्शो बाक्ब। #यसैया ५२:१५
रोम लचा चिक्शो
22गो मोदेंशो शेंना शेंन गाक्ङानु रोममी बाक्ब थमा सुइक्ब आन कली ग्रुम्थ लाइनुङ, दे ङोंइती रे देंती, तन्न मुल सम्म इन कली ग्रुम्चा मतङ। #रोमी १:१३ 23शुश बर्स रे इन कली ग्रुम्तीक थुं पा बाक्ती। मुल एकेर ङा गेय थुम्शा, 24गो दीसा नित्थी एकेर रे गाक्शा, स्पेन रागी लाइनुङ। मिनु इन बाक्तीके यो ओव़शा ग्रुम्नन्नी। ग्रुम्यानु, ग्येरसीशा, आं थुं नाइक्चा तङल देंती। मिनु नोले आं कली स्पेन सम्म चोव़दीनीनी कों, दे आस यो पाता।
25स्पेन लचा ङोंइती थमा सुइक्ब आन कली वारच पथ यरूसलेम लाइनुङ। #प्रेरित १८:२१; प्रेरित १९:२१; प्रेरित २०:२२; प्रेरित २४:१७ 26मासीडोनीया नु आकाया रागीमी बाक्ब थमा सुइक्बपुकीमी “यरूसलेमम बाक्ब थमा सुइक्बपुकीमी जचा मतामे” देंशो नेंशा, क्येट पोक्शा गेतीमी। मोपतीके मेको आन कली क्येट चोव़थ लाइनुङ। #१ कोरिन्थी १६:१; २ कोरिन्थी ८:१-४ 27मारदे हना ङोंइती यरूसलेमम बाक्ब थमा सुइक्बपुकीमी मेको आन कली येसु ख्रीस्त आ लोव़ शेंशो बाक्तेक्म। मोपतीके मुल मेको आन कली श्येत दुम्तीके, क्येट पोक्शा, चोव़थ सोइक्ताक्यीमी। #१ कोरिन्थी ९:११; गलाती ६:६ 28मेको आन कली सोइश्शो क्येट चोव़शा, स्पेन लाइनुङ। लङानु, इन बाक्तीके यो ओव़नुङ। 29इन बाक्तीके जाक्ङानु, ख्रीस्त आ आसीकम जाक्नुङ, दे तुइक्ताक्ङ।
30आं लोक्बपुकी, इं प्रभु येसु ख्रीस्तमी इं कली थुं का सेल्तु। परमप्रभु यावे आ सोक्तीमी दाक्मुपाइक्तु। मिनु थमा पा वोबु दुम्तय। मोपतीके आं पर्बम परमप्रभु यावे कली पुंइना पुंइन बाक्कीन। #२ कोरिन्थी १:११; २ थिस्सलोनिकी ३:१ 31मार पुनीन देंनुङ देंशा हना “पावल कली यहूदीया रागीम बाक्ब थमा मसुइक्ब आन गुइ रे प्रोनीन। मिनु यरूसलेम जाक्दीश्शा, मेकेर बाक्ब थमा सुइक्ब आन कली वारच पचा गेने। 32परमप्रभु यावे आ दाक्शो पा ग्येरसीशा यरूसलेम रे पिशा, आंइ कली ग्रुम्पतीने। इन नेंमी थुं का दुम्शा, ग्येरपाइक्मुशा बाक्चा तकल” दे पुनीन। #१ थिस्सलोनिकी २:१५ 33नेल्ल इं थुं नाइक्पाइक्ब परमप्रभु यावे गेपुकी नु बाक्ल। आमेन।
Currently Selected:
रोमी 15: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
